పెంతెకోస్తు మహోత్సవ పరిశుద్ధ పొప్ లియో XIV గారి ప్రసంగము, 8 జూన్ 2025

 పెంతెకోస్తు మహోత్సవ పవిత్ర దివ్యబలిపూజ

పరిశుద్ధ పొప్ లియో XIV గారి ప్రసంగము

సెయింట్ పీటర్స్ స్క్వేర్

ఆదివారం 8 జూన్ 2025

 

ప్రియ సహోదరీ సహోదరులారా,

“ఆయన పునరుత్థానం తర్వాత పరలోకములోకి ఆరోహణం ద్వారా మహిమపరచబడిన దినము మనపై ఆవిష్కరించబడినప్పుడు, ప్రభువైన యేసుక్రీస్తు పరిశుద్ధాత్మను పంపి యున్నారు” (పునీత అగుస్తీను, ప్రసంగము 271, 1). ఈరోజు కూడా, అప్పట్లో పైగదిలో (Upper Room) జరిగినది ఈరోజు కూడా మన మధ్య మళ్ళీ జరుగుతుంది. బలమైన గాలుల వలె మనలను ఆవరించి, మనలను ఉలిక్కిపాటుకు గురిచేసే పెద్ద శబ్దంలా, అలాగే మనలను ప్రకాశింపజేసే అగ్నిలా, పరిశుద్ధాత్మ వరం మనపైకి దిగివస్తుంది (పోల్చండి అపొ.కా. 2:1-11).

మొదటి పఠనంలో మనము విన్నట్లుగా, పరిశుద్ధాత్మ అపొస్తలుల జీవితాలలో అసాధారణమైన దానిని సాధించింది. యేసు మరణం తరువాత, వారు భయము, దుఃఖముతో ఒక గదిలో తలుపులు మూసుకొని ఉండిపోయారు. అయితే, పరిశుద్ధాత్మ రాకతో జరిగిన విషయాలను సరికొత్తగా చూసే విధానం లభించింది. జరిగిన సంఘటనలను అర్థం చేసుకోవడానికి, పునరుత్థాన ప్రభువు సన్నిధిని ఆత్మీయంగా అనుభూతి చెందడానికి వారికి అంతర్గత అవగాహన కలిగింది. పరిశుద్ధాత్మ వారి భయాన్ని అధిగమించి, వారి అంతర్గత సంకెళ్లను తెంచి, వారి గాయాలను నయం చేసింది. వారికి బలంతో అభిషేకం చేసి, దేవుని గొప్ప కార్యాలను అందరికీ ప్రకటించడానికి ధైర్యాన్ని ప్రసాదించింది.

అపొస్తలుల కార్యములు నుండి మనం విన్నట్లుగా, ఆ సమయములో యెరూషలేములో వివిధ దేశాల నుండి వచ్చిన ప్రజలు అక్కడకు వచ్చిరి. “ఆ విశ్వాసులు ప్రతి ఒక్కరూ తన స్వంత భాషలో మాట్లాడుట విన్నారు” (వచనం 6). ఒక్కమాటలో చెప్పాలంటే, పెంతెకోస్తు దినమున, పైగది తలుపులు తెరచుకున్నాయి, ఎందుకంటే ఆత్మ సరిహద్దులను తెరుస్తుంది. బెనడిక్ట్ XVI వివరించినట్లుగా “పరిశుద్ధాత్మ అవగాహనను కలిగిస్తుంది. బాబెల్‌లో మొదలైన ‘విచ్ఛేదనాన్ని’, మనస్సులో, హృదయంలో ఒకరికొకరు వ్యతిరేకంగా నిలబెట్టే గందరగోళాన్ని ఆత్మ అధిగమిస్తుంది. ఆత్మ సరిహద్దులను తెరుస్తుంది... శ్రీసభ ఎల్లప్పుడూ తాను ఇప్పటికే ఏమై ఉందో దానిని కొత్తగా మారాలి. అది ప్రజల మధ్య సరిహద్దులను తెరవాలి. వర్గ, జాతి భేదాలను తొలగించాలి. దానిలో, నిర్లక్ష్యం చేయబడినవారు లేదా తృణీకరించబడినవారు ఉండకూడదు. శ్రీసభలో కేవలం స్వతంత్ర పురుషులు, స్త్రీలు, యేసుక్రీస్తు సహోదరీ సహోదరీలే ఉంటారు” (పెంతెకోస్తు ప్రసంగము, 15 మే 2005).

పెంతెకోస్తు దృశ్యం చాలా హృద్యంగా ఉంది. దానిపై ఒక క్షణం ఆగి, మీతో కలిసి ధ్యానించడం నాకు సంతోషంగా ఉంటుంది.

పరిశుద్ధాత్మ అన్నింటికంటే ముందుగా, మన హృదయాలలో సరిహద్దులను తెరుస్తుంది. అది మన జీవితాలను ప్రేమకు తెరిచే ఒక గొప్ప వరం. దాని సన్నిధి మన హృదయ కాఠిన్యాన్ని, మన సంకుచిత మనస్తత్వాన్ని, స్వార్థాన్ని, మనలను బంధించే భయాలను, మన గురించి మాత్రమే ఆలోచించే నార్సిసిజాన్ని (స్వప్రేమ) విచ్ఛిన్నం చేస్తుంది. పరిశుద్ధాత్మ మనల్ని సవాలు చేయడానికి వేంచేయును. మన జీవితాలు వ్యక్తిగతవాదం అనే సుడిగుండంలో చిక్కుకొని కుంచించుకు పోతున్నాయనే వాస్తవాన్ని మనం ఎదుర్కొనేలా చేస్తుంది. విచిత్రంగా అనిపించినా, వేగంగా విస్తరిస్తున్న “సామాజిక” మాధ్యమాల ప్రపంచంలో, మనం మరింత ఒంటరిగా మారే ప్రమాదం ఉంది. మనం నిరంతరం అనుసంధానించబడి ఉన్నప్పటికీ, “నెట్‌వర్కింగ్” (లోతైన మానవ సంబంధాలు) చేయలేకపోతున్నాం. ఎప్పుడూ గుంపులో ఉన్నా, మనం గందరగోళంగా, ఒంటరి ప్రయాణికులుగా మిగిలిపోతున్నాం.

దేవుని ఆత్మ మనకు జీవితాన్ని సరికొత్త కోణంలో చూసే, అనుభవించే అవకాశాన్ని కల్పిస్తుంది. మనం ధరించే అన్ని ముసుగుల వెనుక ఉన్న మన అంతరంగ ఆత్మతో అది మనల్ని అనుసంధానం చేస్తుంది. ప్రభువు ప్రసాదించే ఆనందాన్ని అనుభూతి చెందడం నేర్పిస్తూ, ఆయన్ని కలుసుకోవడానికి మనల్ని నడిపిస్తుంది. యేసు మాటల్లో మనం ఇప్పుడే విన్నట్లుగా, ప్రేమలో నిలిచి యున్నప్పుడే ఆయన వాక్యానికి నమ్మకంగా ఉండటానికి, అది మనల్ని మార్చడానికి కావలసిన బలం లభిస్తుందని పరిశుద్ధాత్మ మనలను ఒప్పిస్తుంది. పరిశుద్ధాత్మ మన అంతర్గత సరిహద్దులను తెరుస్తుంది, తద్వారా మన జీవితాలు ఆహ్వానం, పునరుజ్జీవనం కలిగించే ప్రదేశాలుగా మారతాయి.

పరిశుద్ధాత్మ ఇతరులతో మన సంబంధాలలో కూడా సరిహద్దులను తెరుస్తుంది. యేసు మనకు చెప్పినట్లుగా, ఈ వరం ఆయనకు, తండ్రికి మధ్య ఉన్న ప్రేమే, ఇది మనలో వసించును. అప్పుడు మనం మన హృదయాలను మన సహోదరీ సహోదరులకు తెరవ గలుగుతాము. పరిశుద్ధాత్మ సహాయంతో, మనం మన కఠినత్వాన్ని అధిగమించి, భిన్నమైన వారి పట్ల మన భయాన్ని దాటి, మనలో రేకెత్తే కోరికలను అదుపు చేసుకో గలుగుతాము. సందేహం, పక్షపాతం, ఇతరులను తమ అధీనంలోకి తెచ్చుకోవాలనే కోరిక వంటి మన సంబంధాలను భంగపరిచే లోతైన, దాగి యున్న ప్రమాదాలను కూడా పరిశుద్ధాత్మ మారుస్తుంది. ఆధిపత్యం వహించాలనే అనారోగ్యకరమైన కోరికలతో కలిగిన సంబంధాలు, సందర్భాలను తలచుకుంటే నాకు చాలా బాధ కలుగుతుంది. ఇది తరచుగా హింసకు దారితీస్తుంది, ఇటీవలి అనేక స్త్రీ హత్యల (femicide) కేసులు విషాదకరంగా ఈ వాస్తవాన్ని రుజువు చేస్తున్నాయి.

పరిశుద్ధాత్మ, మరోవైపు, మనలో మంచి, ఆరోగ్యకరమైన సంబంధాలను పెంపొందించడానికి వీలు కల్పించే ఫలాలను పరిపక్వం చేస్తుంది. అవి, “ప్రేమ, ఆనందము, శాంతి, సహనము, దయ, మంచితనము, విశ్వసనీయత, సాత్వికత, నిగ్రహము” (గలతీ 5:22). ఈ విధంగా, పరిశుద్ధాత్మ మన సంబంధాల పరిధులను విస్తృతం చేస్తుంది, సోదరభావపు ఆనందానికి మనలను తెరుస్తుంది. ఇది శ్రీసభకు కూడా ఒక కీలకమైన కొలమానం. మన మధ్య సరిహద్దులు లేదా విభేదాలు లేనట్లయితే; మనం శ్రీసభలో ఒకరినొకరు సంభాషించుకొని, అంగీకరించగలిగితే, మన వైవిధ్యాలను సామరస్యం చేసుకోగలిగితే; శ్రీసభగా, మనం అందరికీ స్వాగతం పలికే ఆతిథ్యం ఇచ్చే స్థలంగా మారితేనే మనం నిజంగా పునరుత్థానం చెందిన ప్రభువు యొక్క శ్రీసభ, పెంతెకోస్తు శిష్యుల మవుతాము.

చివరగా, పరిశుద్ధాత్మ ప్రజల మధ్య సరిహద్దులను కూడా తెరుస్తుంది. పెంతెకోస్తు నాడు, అపొస్తలులు తాము కలిసిన వారి భాషలలో మాట్లాడారు. ఆత్మ తీసుకువచ్చిన సామరస్యం ద్వారా బాబెల్ గందరగోళం చివరికి పరిష్కరించబడింది. దేవుని “శ్వాస” మన హృదయాలను ఏకం చేసి, ఇతరులను మన సహోదరీ సహోదరులుగా చూసేలా చేసినప్పుడల్లా, తేడాలు, విభజన, సంఘర్షణకు కారణం కావు. బదులుగా, అవి మనం అందరం పొందగలిగే ఒక భాగస్వామ్య వారసత్వంగా మారతాయి. ఇది మనందరినీ కలిసి సౌభ్రాతృత్వంతో ప్రయాణించేలా చేస్తుంది.

పరిశుద్ధాత్మ అడ్డంకులను తొలగిస్తుంది. ఉదాసీనత, ద్వేషం అనే గోడలను కూల్చివేస్తుంది. ఎందుకంటే, “అది మనకు సమస్త విషయములను బోధిస్తుంది” మరియు “యేసు చెప్పినవన్నియు మనకు తలపునకు తెచ్చును” (యోహాను 14:26 చూడండి). అన్నిటికంటే ముందు, ప్రభువు తన బోధనలకు కేంద్రంగా, శిఖరంగా చేసిన ప్రేమ ఆజ్ఞను పరిశుద్ధాత్మ మనకు బోధిస్తుంది, గుర్తు చేస్తుంది, మన హృదయాలలో లిఖిస్తుంది. ప్రేమ ఉన్న చోట, పక్షపాతానికి తావు ఉండదు. మన పొరుగువారి నుండి మనల్ని వేరుచేసే “భద్రతా” అంశాలు ఉండవు. విషాదకరంగా, ఇప్పుడు రాజకీయ జాతీయవాదాలలో కూడా కనిపిస్తున్న ఆ మినహాయింపు ధోరణికి ప్రేమలో చోటు లేదు. ప్రేమ సమైక్యతను ప్రోత్సహిస్తుంది, సరిహద్దులను చెరిపివేస్తుంది, మానవాళిని ఏకతాటిపైకి తెస్తుంది.

పోప్ ఫ్రాన్సిస్ 2023 మే 28న పెంతెకోస్తు పండుగ సందర్భంగా మాట్లాడుతూ, “ఈనాటి మన ప్రపంచంలో ఎంతో అనైక్యత, విభజన ఉంది. మనమంతా ‘అనుసంధానించబడి’ ఉన్నప్పటికీ, ఒకరికొకరు దూరమై, ఉదాసీనతతో మొద్దుబారి, ఒంటరితనంతో కృంగిపోతున్నాం” అని వ్యాఖ్యానించారు. మన ప్రపంచాన్ని పట్టిపీడిస్తున్న యుద్ధాలు దీనికి విషాదకరమైన నిదర్శనం. ప్రేమ, శాంతికి ప్రతీక అయిన పరిశుద్ధాత్మను మనం వేడుకుందాం. సరిహద్దులను తెరవడానికి, అడ్డుగోడలను కూల్చివేయడానికి, ద్వేషాన్ని తొలగించడానికి, పరలోకములో నున్న ఏకైక తండ్రి బిడ్డలుగా జీవించడానికి ఆయన మనకు సహాయం చేయుగాక.

ప్రియ సహోదరీ, సహోదరులారా, పెంతెకోస్తు పండుగ శ్రీసభను, ప్రపంచాన్ని పునరుద్ధరిస్తుంది! పరిశుద్ధాత్మ యొక్క శక్తివంతమైన గాలి మనపైకి, మన అంతరంగంలోకి వచ్చుగాక. అది మన హృదయాల సరిహద్దులను తెరుచుగాక, దేవునితో ఐక్యం అయ్యే కృపను ప్రసాదించుగాక, మన ప్రేమ యొక్క దిగంతాలను విశాలం చేయుగాక, శాంతి రాజ్యమేలే ప్రపంచాన్ని నిర్మించడానికి మన ప్రయత్నాలకు తోడుగా నిలుచుగాక.

పరిశుద్ధ మరియమ్మ, పెంతెకోస్తు వనిత, ఆత్మచే సందర్శించబడిన కన్యక, కృపతో నిండిన తల్లి, మనకు తోడుగా యుండి మన కొరకు విజ్ఞాపన చేయునుగాక!

మూలము:

https://www.vatican.va/content/leo-xiv/en/homilies/2025/documents/20250608-omelia-pentecoste.html

గురుశ్రీ ప్రవీణ్ గోపు OFM Cap.