త్రిత్వైక సర్వేశ్వరుని మహోత్సవము - జూబిలీ ఆఫ్ స్పోర్ట్, 15 జూన్ 2025

 త్రిత్వైక సర్వేశ్వరుని మహోత్సవము
జూబిలీ ఆఫ్ స్పోర్ట్
పరిశుద్ధ పొప్ లియో XIV గారి ప్రసంగము
సెయింట్ పీటర్స్ బసిలికా
ఆదివారం, 15 జూన్ 2025

ప్రియ సహోదరీ సహోదరులారా,

మొదటి పఠనంలో మనం విన్న మాటలు విజ్ఞానం యొక్క ప్రాముఖ్యతను తెలియజేస్తున్నాయి. “ప్రభువు నన్ను [విజ్ఞానాన్ని] ప్రప్రధమమున సృజించెను. తానూ పూర్వమే కలిగించినవాని యన్నింటిలో నన్ను మొదటి దానినిగా చేసెను... ఆకాశమున మేఘములను పాదుకొల్పినపుడు... నేను ప్రధాన శిల్పివలె ఆయన చెంత నిల్చియుంటిని. పసికందువలె రోజురోజు ఆయనకు ఆనందము చేకూర్చుచు నిత్యమూ ఆయన సన్నిధిలో ఆటలాడు కొనుచుంటిని. ఆయన చేసిన పుడమి మీద క్రీడించుచు ప్రమోదముతో మానవాళి మధ్య మనుచుంటిని” (సామెతలు 8:22, 28, 30-31). పునీత అగస్టీను గారు చెప్పినట్లుగా, త్రిత్వం (తండ్రి, కుమారుడు, పరిశుద్ధాత్మ) మరియు విజ్ఞానం చాలా దగ్గరి సంబంధం కలిగి ఉన్నాయి. దైవిక విజ్ఞానం పరిశుద్ధ త్రిత్వంలో వెల్లడైంది. ఈ విజ్ఞానం ఎల్లప్పుడూ మనలను సత్యం వైపు నడిపిస్తుంది. మన జీవితంలో విజ్ఞానాన్ని అలవర్చుకోవడం ద్వారా మనం దైవ సన్నిధిలో ఆనందాన్ని పొందవచ్చు మరియు సత్య మార్గంలో నడవవచ్చు.

ఈరోజు మనం పవిత్ర త్రిత్వైక సర్వేశ్వరుని మహోత్సవం జరుపుకుంటున్నాం. అదే సమయంలో క్రీడా ఉత్సవాన్ని (జూబ్లీ ఆఫ్ స్పోర్ట్) కూడా పాటిస్తున్నాం. త్రిత్వం, క్రీడల కలయిక కొంత అసాధారణంగా అనిపించినా, ఈ రెండింటినీ పక్కపక్కన ఉంచడం అనవసరమైనదైతే కాదు. ప్రతి మంచి, విలువైన మానవ కార్యం ఏదో ఒక విధంగా దేవుని అనంత సౌందర్యాన్ని ప్రతిబింబిస్తుంది. క్రీడ ఖచ్చితంగా వీటిలో ఒకటి. దేవుడు కదలిక లేనివాడు కాదు, తనలో తాను బంధీ అయినవాడు కాదు. ఆయన కార్యశీలి, సహవాసి. తండ్రి, కుమారుడు, పరిశుద్ధాత్మల మధ్య ఒక చైతన్యవంతమైన సంబంధం ఉంది. ఇది మానవత్వానికి, ప్రపంచానికి తనను తాను తెరుచుకుంటుంది. వేదాంత పండితులు పెరికోరేసిస్ (perichoresis) గురించి మాట్లాడుతారు: దేవుని జీవితం ఒక రకమైన “నృత్యం” లాంటిది. అది పరస్పర ప్రేమ కలిగిన నృత్యం. క్రీడలు కూడా ఈ దైవిక నృత్యాన్ని, చైతన్యాన్ని, సహవాసాన్ని ప్రతిబింబిస్తాయి.

దేవుని అంతరంగ జీవితంలోని ఈ చైతన్యం జీవానికి జన్మనిస్తుంది. మనల్ని సృష్టించిన దేవుడు తన సృష్టికి ఉనికిని ప్రసాదించడంలో ఆనందాన్ని పొందుతాడు. మనం మొదటి పఠనంలో (సామెతలు 8:30-31) విన్నట్లుగా, ఆయన తాను చేసిన భూమి మీద “ప్రమోదం” చెందుతాడు. కొంతమంది శ్రీసభ పితరులు ఏకంగా దేయుస్ లుడెన్స్ (Deus ludens) - అంటే “క్రీడించు దేవుడు” - గురించి మాట్లాడారు (సెయింట్ సలోనియస్ అఫ్ జెనీవా, ఇన్ పరాబోలాస్ సలోమోనిస్ ఎక్స్‌పోసిటియో మిస్టికా; సెయింట్ గ్రెగరీ నజియాంజెన్, కార్మినా, I, 2, 589 చూడండి). ఈ విధంగా, క్రీడ మనకు త్రిత్వైక దేవుడిని అనుభూతి చెందడానికి దోహదపడుతుంది. ఎందుకంటే ఇది కేవలం బాహ్యంగానే కాకుండా, ముఖ్యంగా అంతర్గతంగా కూడా ఇతరులతో సంబంధాలు నెరపడానికి మనల్ని ప్రోత్సహిస్తుంది. లేకపోతే, క్రీడ అహంకారాల మధ్య ఒక శూన్యమైన పోటీగా మాత్రమే మిగిలిపోతుంది. క్రీడ ద్వారా మనం దైవిక సంబంధాన్ని, ప్రేమను, ఆనందాన్ని ఎలా అనుభవించవచ్చో ధ్యానించవచ్చు!

ఇటలీలో క్రీడా కార్యక్రమాలను చూసే ప్రేక్షకులు తరచుగా అథ్లెట్లను ఉత్సాహపరచడానికి “దాయ్!” అని అరుస్తుంటారు. దీనికి “వచ్చేయ్!/ముందుకు వెళ్ళు!” అని అర్థం వస్తుంది. అయితే, ఈ ఇటాలియన్ పదానికి అక్షరాలా “ఇవ్వు!” అని అర్థం. ఇది మనల్ని ఆలోచింపజేస్తుంది. క్రీడలు కేవలం విజయాల గురించి మాత్రమే కాదు, అవి ఎంత అసాధారణమైనవైనప్పటికీ, మనల్ని మనం అంకితం చేసుకోవడం, మనల్ని మనం “ఆటలో నిమగ్నం చేయడం” గురించి కూడా. అంటే ఇతరుల కోసం మనల్ని మనం ఇచ్చుకోవడం - మన వ్యక్తిగత అభివృద్ధి కోసం, మన క్రీడా మద్దతుదారుల కోసం, మన ప్రియమైన వారి కోసం, మన కోచ్‌లు, సహోద్యోగుల కోసం, విస్తృత ప్రజానీకం కోసం, అలాగే మన ప్రత్యర్థుల కోసం కూడా.

గెలుపోటముల కంటే “మంచి క్రీడాకారులుగా” ఉండటమే ముఖ్యం. మనకు తెలిసినట్లుగా, స్వయంగా క్రీడాకారుడైన పునీత రెండవ జాన్ పాల్ జగద్గురువులు ఇలా చెప్పారు: “క్రీడ జీవితానందం, ఒక ఆట, ఒక వేడుక. అందువల్ల, క్రీడల స్వచ్ఛమైన నిస్వార్థతను, స్నేహ బంధాలను ఏర్పరచగల దాని సామర్థ్యాన్ని, సంభాషణను మరియు ఇతరుల పట్ల బహిరంగతను ప్రోత్సహించడం ద్వారా క్రీడలను పెంపొందించాలి... ఉత్పత్తి, వినియోగం యొక్క కఠినమైన నియమాలకు, కేవలం లాభాపేక్ష మరియు భోగలాలసత్వ విధానాలకు దూరంగా ఉండాలి” (క్రీడా జూబిలీ ఉత్సవ ప్రసంగం, 12 ఏప్రిల్ 1984). దీన్నిబట్టి, క్రీడ అనేది కేవలం గెలుపు కోసం కాదు, అది మన వ్యక్తిత్వాన్ని, సంబంధాలను మెరుగుపరుచుకునే ఒక మార్గం అని తెలుస్తోంది!

ఈ దృక్పథం నుండి, క్రీడను, ఈ రోజుల్లో, మానవ మరియు క్రైస్తవ సద్గుణాలతో శిక్షణ పొందేందుకు ఒక విలువైన సాధనంగా మార్చే మూడు ప్రత్యేక విషయాలపై దృష్టి సారిద్దాం.

మొదటిది, ఈ రోజుల్లో సమాజంలో ఒంటరితనం పెరిగిపోతోంది. తీవ్రమైన వ్యక్తిగతవాదం “మనము” అనే భావన నుండి “నేను” అనే దానిపై ఎక్కువ దృష్టి పెడుతుంది. ఇది ఇతరుల పట్ల నిజమైన శ్రద్ధ లోపించడానికి దారితీస్తుంది. ఇలాంటి పరిస్థితులలో, క్రీడలు - ముఖ్యంగా టీమ్ స్పోర్ట్స్ - సహకరించడం, కలిసి పనిచేయడం, పంచుకోవడం వంటి విలువలను నేర్పిస్తాయి. మనం ముందే చర్చించుకున్నట్లుగా, ఈ విలువలు అన్నీ త్రిత్వైక దేవుని జీవితంలో చాలా ముఖ్యమైనవి (యోహాను 16:14-15 చూడండి). కాబట్టి, క్రీడ ప్రజల మధ్య, సంఘాలు, పాఠశాలలు, కార్యాలయాలు, కుటుంబాల మధ్య సయోధ్యకు, కలయికకు ఒక ముఖ్యమైన సాధనంగా మారగలదు. క్రీడలు మనలో ఐకమత్యాన్ని, పరస్పర సహకారాన్ని పెంపొందించగలవని అర్థమవుతోంది!

రెండవది, మనం ప్రస్తుతం డిజిటల్ సమాజంలో ఉన్నాం. సాంకేతికత దూరంగా ఉన్నవారిని దగ్గర చేసినప్పటికీ, భౌతికంగా దగ్గరగా ఉన్నవారి మధ్య తరచుగా దూరాన్ని పెంచుతుంది. ఇటువంటి పరిస్థితులలో, క్రీడ వ్యక్తులను ఒకచోట చేర్చడానికి, శరీరం, స్థలం, కృషి, మరియు సమయం పట్ల ఆరోగ్యకరమైన అవగాహనను అందించడానికి ఒక విలువైన, ఆచరణాత్మక సాధనంగా నిరూపించబడుతుంది. క్రీడ వర్చువల్ లోకాల్లోకి పారిపోయే ప్రలోభాన్ని నిరోధిస్తుంది. ఇది ప్రకృతితో, వాస్తవిక జీవితంతో ఆరోగ్యకరమైన సంబంధాన్ని కాపాడుకోవడానికి సహాయపడుతుంది, అక్కడ నిజమైన ప్రేమ అనుభవించబడుతుంది (1 యోహాను 3:18 చూడండి). క్రీడల ద్వారా మనం డిజిటల్ తెరల వెనుక దాగి ఉన్న మానవ సంబంధాలను తిరిగి పొందవచ్చని ఆలోచింప జేస్తుంది!

మూడవదిగా, ఈ పోటీ ప్రపంచంలో, బలవంతులు, విజేతలు మాత్రమే జీవించడానికి అర్హులు అన్నట్లు కనిపిస్తుంది. కానీ, క్రీడ మనకు ఓడిపోవడాన్ని కూడా నేర్పుతుంది. ఓడిపోవడాన్ని నేర్చుకోవడం ద్వారా, మనం మన మానవ స్థితిలోని అత్యంత లోతైన సత్యాలను ఎదుర్కోవలసి వస్తుంది: మన సున్నితత్వం, మన పరిమితులు మరియు మన అసంపూర్ణతలు. ఇది చాలా ముఖ్యం, ఎందుకంటే ఈ పరిమితుల అనుభవం ద్వారానే మనం ఆశకు మన హృదయాలను తెరుస్తాము. ఎప్పుడూ తప్పులు చేయని, ఎప్పుడూ ఓడిపోని క్రీడాకారులు అంటూ ఉండరు. ఛాంపియన్‌లు సంపూర్ణంగా పనిచేసే యంత్రాలు కాదు, కానీ నిజమైన స్త్రీపురుషులు. వారు పడిపోయినప్పుడు తిరిగి లేవడానికి ధైర్యాన్ని పొందుతారు.

పునీత రెండవ జాన్ పాల్ జగద్గురువులు, యేసును “దేవుని నిజమైన క్రీడాకారుడు” అని చెప్పినప్పుడు సరిగానే చెప్పారు. ఎందుకంటే ఆయన లోకాన్ని బలంతో కాదు, ప్రేమ యొక్క విశ్వసనీయతతో ఓడించాడు (క్రీడాకారుల జూబిలీ దివ్యబలిపూజ ప్రసంగం, 2000 అక్టోబర్ 29, చూడండి). క్రీడలు మనకు కేవలం గెలుపోటముల గురించే కాకుండా, జీవితంలోని ముఖ్యమైన పాఠాలను, ముఖ్యంగా ఓటమిలో కూడా ఆశను ఎలా కనుగొనాలో నేర్పుతాయి. క్రీడల ద్వారా మనం ఈ విలువలను ఎలా పెంచుకోవచ్చో ఆలోచింప జేస్తుంది!

మన కాలంలో అనేక పునీతుల జీవితాలలో క్రీడ ఒక ముఖ్యమైన పాత్రను పోషించడం కేవలం యాదృచ్చికం కాదు. ఇది వారికి వ్యక్తిగత క్రమశిక్షణగా మరియు సువార్తను ప్రకటించే సాధనంగా ఉపయోగపడింది. క్రీడాకారుల పాలకులైన ధన్య పియర్ జార్జియో ఫ్రస్సాతి గారిని ఈ సందర్భంలో మనం గుర్తు చేసుకోవచ్చు. ఈ సంవత్సరం సెప్టెంబర్ 7న వారికి పునీత పట్టం లభించనుంది. వారి నిష్కపటమైన, ప్రకాశవంతమైన జీవితం మనకు ఒక ముఖ్యమైన సత్యాన్ని గుర్తు చేస్తుంది: ఎవరూ ఛాంపియన్‌గా పుట్టరు, ఎవరూ పునీతులుగా పుట్టరు. ప్రేమలో నిత్య శిక్షణే మనల్ని అంతిమ విజయానికి చేరువ చేస్తుంది (రోమా 5:3-5 చూడండి). ఇది మనం నూతన ప్రపంచ నిర్మాణానికి సహకరించడానికి వీలు కల్పిస్తుంది. క్రీడలు, మన జీవితంలో కేవలం శారీరక కార్యకలాపాలుగా కాకుండా, ఆధ్యాత్మిక ఎదుగుదలకు, నైతిక విలువల పెంపుదలకు ఎలా సహాయపడతాయో గ్రహించాలి!

రెండవ ప్రపంచ యుద్ధం ముగిసిన ఇరవై సంవత్సరాల తర్వాత, పునీత ఆరవ పాల్ జగద్గురువులు కూడా ఇదే విషయాన్ని గమనించారు. కాథలిక్ అథ్లెటిక్ అసోసియేషన్ (C.S.I. - Centro Sportivo Italiano) సభ్యులను ఉద్దేశించి ఆయన ప్రసంగిస్తూ, యుద్ధం వలన విచ్చిన్నమైన సమాజంలో శాంతిని, ఆశను తిరిగి తీసుకురావడంలో క్రీడలు ఎంతో తోడ్పాడ్డాయని గుర్తు చేశారు (C.S.I. సభ్యులకు ప్రసంగం, 1965 మార్చి 20, చూడండి). ఆయన ఇంకా ఇలా అన్నారు: “మీ ప్రయత్నాలు ఒక నూతన సమాజ నిర్మాణానికి ఉద్దేశించబడ్డాయి... క్రీడ, అది ప్రోత్సహించే గొప్ప విద్యా విలువలతో, మానవ వ్యక్తి యొక్క ఆధ్యాత్మిక ఉన్నతికి అత్యంత ఉపయోగకరమైన సాధనంగా మారగలదనే గుర్తింపుతో; ఇది క్రమబద్ధమైన, శాంతియుతమైన మరియు నిర్మాణాత్మకమైన సమాజానికి ప్రాథమిక మరియు అనివార్యమైన షరతు.” దీని ద్వారా, క్రీడలు కేవలం వినోదం కాదని, అవి సమాజంలో సానుకూల మార్పులకు, వ్యక్తిత్వ వికాసానికి ఎంతగానో ఉపయోగపడతాయని పునీత ఆరవ పాల్ జగద్గురువులు నొక్కిచెప్పారు. క్రీడలు మన సమాజంలో ఎలాంటి మార్పులు తీసుకురాగలవని భావిస్తున్నాము?

ప్రియమైన క్రీడాకారులారా, శ్రీసభ మీకు ఒక గొప్ప బాధ్యతను అప్పగిస్తోంది: మీ కార్యకలాపాలన్నింటిలోనూ త్రిత్వైక దేవుని ప్రేమను ప్రతిబింబించడం. ఇది మీ స్వంత మేలు కోసం, అలాగే మీ తోటి సోదర సోదరీమణుల శ్రేయస్సు కోసం. ఈ బాధ్యతను మీరు క్రీడాకారులుగా, శిక్షకులుగా, సంఘాలుగా, బృందాలుగా, మీ కుటుంబాలలో కూడా ఉత్సాహంగా నిర్వర్తించాలి. పోప్ ఫ్రాన్సిస్ తరచుగా ఒక విషయాన్ని గుర్తు చేసేవారు: కన్య మరియను సువార్త ఎప్పుడూ చురుకుగా, కదలికలో, “పరుగెడుతూ” ఉండేదని ప్రస్తావించింది (లూకా 1:39 చూడండి). తల్లులు తమ పిల్లలకు సహాయం చేయడానికి దేవుని సంకేతం అందిన వెంటనే బయలుదేరడానికి ఎలా సిద్ధంగా ఉంటారో, మరియ కూడా అలాగే సిద్ధంగా ఉంటుంది (ప్రపంచ యువజన దినోత్సవ స్వచ్ఛంద సేవకులకు ప్రసంగం, 2023 ఆగస్టు 6, చూడండి). మన ప్రయత్నాలకు, ఉత్సాహానికి తోడుగా ఉండమని, అన్నిటికంటే గొప్ప విజయానికి మనల్ని నడిపించమని మరియ తల్లిని ప్రార్థిద్దాం. ఆ గొప్ప విజయం ఏమిటంటే, మన ఆనందం సంపూర్ణమయ్యే ఆ క్రీడా మైదానంలో నిత్యజీవ బహుమతి (1 కొరి 9:24-25; 2 తిమోతి 4:7-8 చూడండి).

మూలము:

https://www.vatican.va/content/leo-xiv/en/homilies/2025/documents/20250615-omelia-giubileo-sport.html

గురుశ్రీ ప్రవీణ్ కుమార్ గోపు OFM Cap.