యేసు తిరు హృదయం - దేవుని ప్రేమ సందేశం

యేసు తిరు హృదయం – దేవుని అపారమైన ప్రేమ సందేశం

యెహెజ్కె34:11-16; రోమీ 5:5-11; లూకా 15:3-7

జూన్ 27, ఈరోజు మనం యేసు తిరు హృదయ మహోత్సవం జరుపుకుంటున్నాము. ఈ పండుగ దేవుని ప్రేమను, దయను మరియు కనికరాన్ని లోతుగా ధ్యానించడానికి మనకు ఒక అద్భుతమైన అవకాశాన్నిస్తుంది. హృదయం అనగానే మనకు ప్రేమ గుర్తుకు వస్తుంది. అలాగే యేసు తిరు హృదయాన్ని ధ్యానించడం అంటే, దేవుని అనంతమైన ప్రేమను, ఆయన కరుణను అర్థం చేసుకోవడమే. “యేసు తిరుహృదయం, దేవుని ప్రేమను ఎలా ప్రతిబింబిస్తుందో ధ్యానిద్దాం!

యేసు హృదయం దేవుని పవిత్రమైన ప్రేమకు, ఆయన రక్షక కార్యాచరణకు నిదర్శనం. ఇది కేవలం ఒక ప్రతీక మాత్రమే కాదు, దేవుని వాత్సల్యం, దయ, మరియు కరుణలకు ఇది ఒక జీవన సాక్ష్యం. మరియమ్మ గర్భంలో రూపుదిద్దుకున్న ఈ పవిత్ర హృదయం, తన జీవితమంతా సువార్తను బోధించింది. ఎంతోమంది రోగులను స్వస్థపరిచింది, పాపులను ఆలింగనం చేసుకుంది, మరియు ఈ లోకాన్ని అపారంగా ప్రేమించింది.

యేసు హృదయం ఈ లోక పాప పరిహారార్థం ఎన్నో శ్రమలను, అవమానాలను భరించింది. శిలువపై బల్లెంతో పొడవబడిన ఈ హృదయం చివరికి ఆగిపోయింది. కానీ అక్కడితో అంతం కాలేదు. పునరుత్థానం ద్వారా ఆ హృదయం తిరిగి కొట్టుకోవడం ప్రారంభించింది. నేటికీ, ఆ హృదయం మనపై తన అనంతమైన దయను, కరుణను కుమ్మరిస్తూనే ఉంది. అందువల్లే యేసు తిరుహృదయం దేవుని ప్రేమకు తిరుగులేని రుజువు మరియు ప్రత్యక్ష సాక్ష్యం.

యేసు తిరుహృదయం దైవిక ప్రేమను, మానవ ప్రేమను ఏకకాలంలో వ్యక్తపరుస్తుంది. ఈ హృదయంలో, భూమ్యాకాశాలను సృష్టించిన దేవుని ప్రేమను మనం చూడవచ్చు. మానవుడిని సృష్టించిన ఆ ప్రేమ, పాపంలో పడిపోయిన మానవుడిని రక్షించడానికి తన ఏకైక కుమారుడిని త్యాగం చేయడానికి వెనుకాడలేదు. తన తల్లిపై, శిష్యులపై, పాపాత్ములపై, మరియు తనను అనుసరించిన వారిపై యేసు కుమ్మరించిన అపారమైన ప్రేమను కూడా మనం ఈ హృదయంలో చూడవచ్చు. ఈ ప్రేమ ఎంత గొప్పదంటే, తనను శిలువపై కొట్టినవారిని కూడా హృదయపూర్వకంగా క్షమించిన ప్రేమను ఇది ప్రదర్శించింది.

యేసు తిరుహృదయం దేవుని నిస్వార్థమైన ప్రేమను, ఆయన కనికరాన్ని, మరియు ఆయన రక్షక ప్రణాళికను మనకు స్పష్టంగా తెలియజేస్తుంది. ఈ మహోత్సవం ద్వారా, మనం దేవుని ప్రేమను మరింత లోతుగా అర్థం చేసుకోవడమే కాకుండా, ఆ ప్రేమను మన జీవితాల్లో ప్రతిబింబించేలా జీవించడానికి ప్రయత్నిద్దాం. 

తిరు హృదయం - ఆదర్శం
యేసు తిరుహృదయం మనకు ఒక గొప్ప ఆదర్శం. మానవ హృదయం దేనిని సాధించగలదో, ఎంత ప్రేమించగలదో ఈ హృదయం మనకు గుర్తుచేస్తుంది. దేవున్ని ప్రేమించాలని, మన తోటివారిని ప్రేమించాలని ఈ పవిత్ర హృదయం మనకు నేర్పిస్తుంది. రోమీ 5:5లో చెప్పబడినట్లు, “దేవుడు మనకొసగు పవిత్రాత్మద్వారా తన ప్రేమతో మన హృదయములను నింపెను”. దీని అర్థం ఏమిటంటే, దేవుని ప్రేమతో మన హృదయాలు నింపబడ్డాయి కాబట్టి, దేవున్ని మరియు మన సహచరులను ప్రేమించగల శక్తి మనకు ఉంది. అయితే, మనం తరుచుగా మన హృదయాలలో నిండిన దేవుని ప్రేమను తిరస్కరిస్తాము. మానవ చరిత్ర అంతటా ఇదే జరిగింది, మరియు నేటికీ అనేక చోట్ల ఇదే జరుగుతోంది. కానీ యేసు హృదయం మాత్రం తిరస్కరణల వల్ల గానీ, నిరాకరణల వల్ల గానీ, అవమానాల వల్ల గానీ ప్రేమించడం ఆపలేదు అని మనం నేడు గ్రహించాలి.

క్రీస్తు ప్రక్కను బల్లెంతో పొడిచినప్పుడు, యేసు హృదయం మూసుకు పోలేదు. దానికి బదులుగా, ఆ హృదయం తెరుచుకుని, దాని నుండి రక్తం, నీరు స్రవించాయి. ఇది క్రీస్తు అనంతమైన ప్రేమకు నిదర్శనం! యోహాను 19:34లో “సైనికులలో ఒకడు ఆయన ప్రక్కను బల్లెముతో పొడిచెను. వెంటనే రక్తము, నీరు స్రవించెను” అని చదువుతాం. వైద్యపరంగా ఇది పెద్ద విషయం కాకపోవచ్చు, కానీ విశ్వాసపరంగా, ఈ రక్తం మరియు నీరు దివ్య సంస్కారాలైన జ్ఞానస్నానం మరియు దివ్యసత్ప్రసాదాలను సూచిస్తున్నాయని పవిత్ర శ్రీసభ మనకు బోధిస్తుంది (సత్యోపదేశం 1225). శ్రీసభ ఆవిర్భావానికి కూడా ఇది సంకేతంగా చెబుతూ ఉంటారు.

మనం కూడా ఈ అనంత ప్రేమలో భాగస్థులం కావాలి. “నేను మిమ్ము ప్రేమించినటులనే మీరును ఒకరినొకరు ప్రేమించు కొనుడు” (యోహాను 13:34; 15:13) అని యేసు తిరుహృదయం మనలను కోరుచున్నది. “దేవుడు మనలను ఇంతగా ప్రేమించినచో మనము తప్పక ఒకరి యెడల ఒకరము ప్రేమగలవారమై ఉండవలెను” (1 యోహాను 4:11). యేసు తిరుహృదయ సందేశం ఇదియే: దేవుడు మనలను ప్రేమించునటుల, మనం ఇతరులను ప్రేమించాలి. యేసు తిరుహృదయాన్ని చూసినప్పుడల్లా, మన హృదయాలు దేవుని కొరకు ప్రజ్వరిల్లాలి. దేవుని అనంతమైన ప్రేమను, కరుణను మనం జ్ఞాపకం చేసుకోవాలి. అలాగే, ఆ తిరుహృదయానికి మనలను మనం అంకితం చేసుకోవాలి. క్రీస్తు ప్రేమలో ఐక్యమై పోవాలి.

“సాధుశీలుడననియు, వినమ్రహృదయుడననియు మీరు నా నుండి నేర్చుకొనుడు” (మత్త 11:29) అని యేసు చెప్పారు. యేసు తిరుహృదయములో ఆయన శ్రమలను, సిలువను, వినయను, క్షమాపణను, మనపట్ల ఆయనకున్న అనంతమైన ప్రేమను చూడవచ్చు. యేసు తిరుహృదయం సువార్తా సారాంశం అని చెప్పుకోవచ్చు. అందుకే ప్రభువు, “సాధుశీలుడననియు, వినమ్రహృదయుడననియు మీరు నా నుండి నేర్చుకొనుడు” అని చెప్పారు.

తిరు హృదయం – అపోస్తలుడు తోమా వ్యక్తిగత అనుభూతి
“నీ చేయి చాచి నా ప్రక్కలో ఉంచుము” (యోహాను 20:27). ఈ మాటలు యేసు ప్రభువు తన శిష్యుడైన తోమాతో పలికారు. ప్రభువు పునరుత్థానం చెందిన తరువాత, ఒక గదిలో తలుపులు మూసుకుని ఉన్న శిష్యులకు దర్శనమిచ్చారు. అప్పుడు తోమా వారితో లేడు.

“మేము ప్రభువును చూచితిమి” అని ఇతర శిష్యులు చెప్పినప్పుడు, తోమా విశ్వసించలేదు. “నేను ఆయన చేతులలోని చీలల గుర్తులను చూచి, అందు నా వ్రేలు పెట్టి, ఆయన ప్రక్కలో నా చేయి ఉంచిననే తప్ప విశ్వసించను” అని పలికాడు.

యేసు మరల వచ్చినపుడు, తోమా కూడా వారితోనే ఉన్నాడు. యేసు తోమాతో, “నీ వ్రేలు ఇక్కడ ఉంచుము. నా చేతులు చూడుము. నీ చేయి చాచి నా ప్రక్కలో ఉంచుము” అని పలికారు. ఆ క్షణములో తోమా, “నా ప్రభూ! నా దేవా” అని పలికాడు (యోహాను 20:28).

తోమా ఆ క్షణంలో యేసు తిరు హృదయ ప్రేమను అనుభూతి పొందాడు కాబట్టే, "నా ప్రభూ! నా దేవా!" అని పలకగలిగాడు. యేసు గాయాల వెనుక ఉన్న లోతైన ప్రేమను అతను గ్రహించాడు: లోకరక్షణ కోసం గాయపడిన హృదయాన్ని తోమా చూచాడు. లోక పాపాలను పరిహరించిన హృదయాన్ని తోమా చూశాడు. మానవాళి అవిశ్వాసం వల్ల గాయపడిన హృదయాన్ని తోమా చూశాడు. దేవుని దయను యేసు హృదయంలో తోమా చూశాడు. దేవుని దయ క్షమిస్తుంది, స్వస్థపరుస్తుంది, పునరుద్ధరిస్తుంది.

తోమా ఎప్పుడైతే, ఆ తిరుహృదయాన్ని చవిచూచాడో, ఆ క్షణములోనే అతడు క్షమించబడ్డాడు, స్వస్థత పొందాడు, పునరుద్ధరించ బడ్డాడు. తోమా హృదయం కూడా ప్రేమతో నిండిన హృదయముగా మారింది. అందుకే తోమా, “నా ప్రభూ! నా దేవా” అని పలికాడు.

యేసు తిరు హృదయం తోమాను నిరాశ నుండి విశ్వాసంలోనికి నడిపించింది. ఈ సంఘటన దేవుని అనంతమైన ప్రేమకు, ఆయన క్షమించే గుణానికి, మరియు అవిశ్వాసిని కూడా విశ్వాసిగా మార్చగల ఆయన శక్తికి అద్భుతమైన నిదర్శనం.

తిరు హృదయం - భక్తి, ఆరాధన
బైబిలులో ‘హృదయం’ అనే పదం దాదాపు వెయ్యిసార్లు ఉపయోగించబడింది. కొన్నిసార్లు మాత్రమే శరీరములో ఒక భాగంగా వాడబడింది. మిగతా అన్నిసార్లు, ప్రత్యేకమైన అర్థాలతో ఉపయోగించబడింది. ‘హృదయం’ సంపూర్ణ వ్యక్తిని, వ్యక్తిత్వాన్ని, అంత:రంగాన్ని సూచించే విధంగా వాడబడింది. ఉదాహరణకు, “నీ సంపదలున్న చోటనే నీ హృదయముండును” (మత్త 6:21). ఇక్కడ 'హృదయం' అనేది కేవలం ఒక భౌతిక అవయవం కాదు, సంపూర్ణ వ్యక్తిత్వానికి చిహ్నం.

యేసు తిరు హృదయాన్ని ఆరాధించడం అంటే, శరీరంలోని ఒక భాగమైన భౌతిక అవయవాన్ని ఆరాధించడం కాదు. హృదయం ఆత్మ-శరీరాలతో కూడిన వ్యక్తిని, అనగా సంపూర్ణ వ్యక్తిని సూచిస్తుంది. కనుక, మనం యేసు ప్రభువును ఆరాధిస్తున్నాము! యేసు తిరుహృదయ భక్తి యనగా, యేసు క్రీస్తును ఆరాధించడం, యేసు క్రీస్తుపై మన ప్రేమను చాటడం, ప్రకటించడం, వ్యక్తపరచడం! మన విశ్వాసానికి మూలమైన దేవున్ని గౌరవించడం మరియు ప్రేమించడం. యేసు తిరు హృదయం దైవీక ప్రేమకు చిహ్నం!

తిరు హృదయ చిత్రపటాన్ని మనం గమనిస్తే, యేసు తన పవిత్ర హృదయాన్ని మనకు బహిర్గతం చేస్తున్నట్లు కనిపిస్తారు. తన ఎడమ చేతితో ఆ హృదయాన్ని మనలను చూడమని చెబుతున్నారు. ఆ హృదయం, ముళ్లకిరీటముతోను, సిలువతోను అలంకరించబడి ఉంటుంది. ఇది ఆయన భరించిన శ్రమలను, త్యాగాన్ని సూచిస్తుంది. బల్లెముతో పొడవబడి ఉంటుంది. ఇది ఆయన అపారమైన ప్రేమను, పాప పరిహారం కోసం ఆయన పొందిన గాయాలను గుర్తు చేస్తుంది. హృదయముపై మండుతున్న అగ్నిజ్వాలలు మనపై ఆయనకున్న ప్రేమను చాటుతుంది. ఆ ప్రేమ వలననే మన పాపములనుండి రక్షించ బడ్డాము. ఈ భక్తి మనలను యేసు ప్రేమకు మరింత దగ్గర చేస్తుంది మరియు ఆయన త్యాగాన్ని, కనికరాన్ని నిరంతరం మనకు గుర్తు చేస్తుంది.

యేసు తిరుహృదయము పట్ల భక్తిగలవారు పొందే అనుగ్రహాలు:
యేసు తిరు హృదయం పట్ల భక్తి, కేవలం ఆరాధన మాత్రమే కాదు, ఇది అనేక ఆశీర్వాదాలను, అనుగ్రహాలను కూడా తీసుకొస్తుంది. ఈ భక్తిని కలిగి ఉన్నవారు పొందే కొన్ని ముఖ్యమైన అనుగ్రహాలను పరిశీలిద్దాం:
(1). కుటుంబములో శాంతి, సమాధానాలు: యేసు తిరుహృదయానికి తమ కుటుంబాలను అంకితం చేసుకున్నప్పుడు, ఆ కుటుంబాలలో శాంతి, సమాధానం వెల్లివిరుస్తాయి. ఆయన ప్రేమ కుటుంబ సభ్యుల మధ్య ఐక్యతను, పరస్పర అవగాహనను పెంపొందిస్తుంది.
(2). కష్టాలలో ఓదార్పు: జీవితంలో ఎదురయ్యే కష్టాలు, శ్రమలు, బాధల సమయాల్లో యేసు తిరుహృదయం భక్తులకు గొప్ప ఓదార్పును ఇస్తుంది. ఆయన అపారమైన దయ, కనికరం నిస్సహాయ స్థితిలో ఉన్నవారికి ధైర్యాన్ని, ఆశను కలుగజేస్తాయి.
(3). జీవితములో, ముఖ్యముగా మరణావస్థలో దేవుని తోడ్పాటు: యేసు తిరుహృదయం పట్ల భక్తి కలిగిన వారికి దేవుడు జీవితాంతం తోడుగా ఉంటారు. ముఖ్యంగా మరణావస్థలో ఉన్నప్పుడు, ఆయన దయ వారిని పాపము నుండి విడిపించి, నిత్యజీవం వైపు నడిపిస్తుంది.
(4). చేపట్టే కార్యాలు సమృద్ధిగా ఆశీర్వదింప బడును: దేవుని మహిమ కొరకు, ఇతరుల సేవ కొరకు చేపట్టిన పనులను యేసు తిరుహృదయం సమృద్ధిగా ఆశీర్వదిస్తుంది. ఈ భక్తితో చేసే పనులు విజయాన్ని సాధిస్తాయి.
(5). తిరుహృదయ పటాలను గౌరవించే ప్రదేశాలను దేవుడు ఆశీర్వదిస్తారు: తమ ఇళ్ళలో లేదా సంస్థలలో యేసు తిరుహృదయ చిత్రపటాలను భక్తితో గౌరవించే ప్రదేశాలను దేవుడు ప్రత్యేకంగా ఆశీర్వదిస్తారు. ఇది దైవిక ఉనికిని, రక్షణను సూచిస్తుంది.
(6). కఠిన హృదయము గలవారిని తాకే శక్తిని గురువులు పొందుతారు: యేసు తిరుహృదయ భక్తిని బోధించే గురువులకు, కఠిన హృదయం గలవారిని సైతం దేవుని ప్రేమ వైపు మళ్ళించగలిగే ప్రత్యేకమైన శక్తిని ఇస్తారు.
(7). వరుసగా తొమ్మిది నెలలపాటు, మొదటి శుక్రవారాలలో దివ్యసత్ప్రసాదం స్వీకరించే వారికి ప్రత్యేక అనుగ్రహం:  మొదటి శుక్రవారాల భక్తిగా పిలవబడే ఈ ఆచారం ప్రకారం, వరుసగా తొమ్మిది నెలలపాటు, ప్రతి నెల మొదటి శుక్రవారం దివ్యసత్ప్రసాదం స్వీకరించేవారు, దివ్యసత్ప్రసాదం లోకొనకుండా మరణించరని ఒక గొప్ప అనుగ్రహం ఉంది. ఇది వారి అంతిమ రక్షణకు ఒక హామీగా భావించబడుతుంది.
ఈ అనుగ్రహాలు యేసు తిరుహృదయం పట్ల మనకున్న భక్తిని బలపరుస్తాయి మరియు ఆయన అపారమైన ప్రేమను, దయను మనకు గుర్తు చేస్తాయి.

దేవుని ప్రేమ - తండ్రి హృదయం

“దేవుడు ప్రేమ స్వరూపుడు” (1 యోహాను 4:8). ఈ వాక్యం దేవుని స్వభావాన్ని స్పష్టంగా తెలియజేస్తుంది. తిరుహృదయం అనగా దేవుని అపారమైన ప్రేమ. “దేవుడు లోకమును ఎంతో ప్రేమించి, తన ఏకైక కుమారుని ప్రసాదించెను” అని యోహాను 3:16లో చదువుచున్నాము. అలాగే, “మనము దేవుని ప్రేమించితిమని కాదు. ఆయన మనలను ప్రేమించి మన పాపములకు విమోచకునిగ తన కుమారుని పంపెను. ప్రేమ యన ఇట్టిది” అని 1 యోహాను 4:10లో చదువుచున్నాము. హోషేయ 14:4లో “నిండు హృదయముతో వారిని ప్రేమింతును” అని దేవుడు స్వయంగా సెలవిచ్చారు.

దేవుని హృదయం తల్లి హృదయం లాంటిది. తల్లి తన బిడ్డలను ఎలా పోషిస్తుందో, చేతుల మీద అల్లారు ముద్దుగా ఎలా పెంచుతుందో, వారి అభివృద్ధిని ఎలా కాంక్షిస్తుందో, అలాగే దేవుడు ప్రతీక్షణం మనలను ప్రేమిస్తూ ఉంటారు. మనం ఎటువంటి వారమైనా, ఆయన ప్రేమ ఒకేలా ఉంటుంది. దేవుడు మనలను ఎప్పుడూ విస్మరించడు. తప్పిపోయిన కుమారుని కొరకు ఎదురుచూసిన తండ్రివలె, ఆయన మన కొరకు ఎదురుచూస్తున్నారు.

దైవప్రేమ పరిశుద్ధాత్మ యొక్క పవిత్రీకరణ శక్తి ద్వారా, మన ఆధ్యాత్మిక ఎదుగుదల ద్వారా, దేవునినుండి మన వైపుకు ప్రవహిస్తుంది. ఎలాంటి హద్దులు, సంకోచం లేకుండా తననుతాను సంపూర్ణముగా ఒసగే ప్రేమ దేవుని ప్రేమ.

మనపై దేవుని ప్రేమ ఎంత గొప్పది అంటే, ఆయన మనలను తన పవిత్ర ప్రజలుగా, సొంత ప్రజలుగా ఎన్నుకొన్నాడు. దేవుని కనికరాన్ని పొందాలంటే, ఆయనను ప్రేమించి, ఆయన ఆజ్ఞలను పాటించాలి. దేవుని ఆజ్ఞ ప్రేమించడం. కనుక, మనము పరస్పరము ప్రేమించుకోవాలి. ప్రేమించువాడు దేవుని ఎరిగిన వాడగును. దేవుని ఎవరును, ఎన్నడును చూడలేదు. మనము ఒకరి యెడల ఒకరము ప్రేమ కలవారమైనచో,  దేవుడు మనయందు ఉండును. ఆయన ప్రేమ మనయందు పరిపూర్ణమగును.

క్రీస్తు ప్రేమ - కనికరంతో నిండిన హృదయం
“కాపరి లేని గొర్రెల వలె చెదరియున్న జనసమూహమును చూచి, ఆ కరుణామయుని కడుపు తరుగుకొని పోయెను” (మత్త 9:36). “ఈ లోకమున ఉన్న తన వారిని ఆయన ప్రేమించెను. వారిని చివరి వరకు ప్రేమించెను” (యోహాను 13:1). ఈ వాక్యాలు యేసు క్రీస్తు అపారమైన ప్రేమను, కరుణను స్పష్టంగా తెలియజేస్తాయి. దేవుని ప్రేమ యేసు క్రీస్తులో పరిపూర్ణమైంది, ఆయన దయగల తండ్రికి నిజమైన ప్రతిబింబం.

యేసుతిరుహృదయం కనికరముగల హృదయం. బైబిలులో ‘కనికరము’ అంటే లోతైన, హృదయంతరాలలోని భావం. ఇది ఒక తల్లి తన బిడ్డల బాధను అనుభవించగల ప్రేమ వంటిది. అలాగే, దేవుడు మనలను ప్రేమిస్తున్నాడు. ఈ ప్రేమ ఫలితం జీవం. ఇది మనలను జీవించునట్లు చేస్తుంది. ఈ విషయాన్ని లూకా 7:11-17లో స్పష్టంగా చూడవచ్చు. నాయినులో వితంతువు వితంతువు యొక్క ఏకైక కుమారుడు మరణించినప్పుడు, ఆ తల్లిని చూచి, యేసు కనికరించి, “ఏడవ వద్ధమ్మా” అని ఓదార్చి, మరణించిన ఆ బిడ్డను జీవముతో లేపారు. ఇది ఆయన కనికరం యొక్క ప్రత్యక్ష నిదర్శనం.

ప్రభువు ఎల్లప్పుడూ మనలను ప్రేమతో, కనికరముతో చూస్తూ ఉంటారు. ఆయన హృదయం కనికరమైనది. మనలోని పాపాలను, గాయాలను, ఆయనకు చూపిస్తే, వాటిని క్షమిస్తారు. మన పాపాల వలన ఆయన హృదయం గాయపరచబడింది. కాని, మానవ హృదయంతో మనల్ని ప్రేమించారు. మనల్ని రక్షించారు. అందుకే ఆయన హృదయం ప్రేమకు గొప్ప గుర్తుగా, సంకేతంగా నిలిచింది.

యేసు తిరుహృదయం మనలను ఈవిధంగా ఆహ్వానిస్తుంది, “భారముచే అలసి సొలసియున్న సమస్త జనులారా! నా యొద్ధకు రండు. మీకు విశ్రాంతి నొసగెదను. నా కాడిని మీరెత్తుకొనుడు. సాధుశీలుడననియు, వినమ్ర హృదయుడననియు మీరు నా నుండి నేర్చుకొనుడు. అపుడు మీరు మీ ఆత్మలందు విశ్రాంతి పొందుదురు” (మత్త 11:28-29). కనుక, మన హృదయాలను దేవునికి తెరుద్ధాం. తిరుహృదయానికి అంకితం చేద్దాం. దేవునితో, తోటి వారితో సఖ్యపడుదాం. ఆయన ప్రేమలో విశ్రాంతిని పొందుదాం.

తిరుహృదయ పిలుపు
యేసు తిరుహృదయం పట్ల భక్తి మనకు మూడు ముఖ్యమైన విషయాలను గుర్తుచేస్తుంది. అవి కృతజ్ఞత, ప్రార్థన, మరియు హృదయ పరివర్తన.

(1). కృతజ్ఞత: దేవుని ప్రేమను, యేసు తిరుహృదయాన్ని ధ్యానిస్తున్న మనం, మొట్టమొదటిగా చేయవలసినది, కృతజ్ఞతలు చెల్లించడం. దేవుని ప్రేమ ఎంత విశాలమో, ఎంత దీర్ఘమో, ఎంత ఉన్నతమో, ఎంత గాఢమో మనం పూర్తిగా గ్రహించలేము. క్రీస్తు ప్రేమను సంపూర్ణముగా ఎరుగడం అసాధ్యము (ఎఫెసీ 3:18-19). కీర్తనలు 9:1లో చెప్పినట్లుగా, ప్రభువును పూర్ణహృదయంతో, కృతజ్ఞతతో స్తుతించాలి. మత్తయి 15:8లో ప్రభువు ఇలా అన్నారు, “ఈ ప్రజలు పెదవులతో నన్ను స్తుతించు చున్నారు. కాని, వారి హృదయములు నాకు కడు దూరముగా ఉన్నవి.” మనము కేవలం పెదవులతో దేవుని స్తుతిస్తున్నామా లేక మాన్ హృదయాలతో దేవుని ఆరాధిస్తున్నామా అని ఆత్మపరిశీలన చేసుకోవాలి. నిజమైన ఆరాధన హృదయం నుండి వస్తుంది.

(2) ప్రార్థన: పవిత్ర హృదయముతో చేసే ప్రార్థనలను దేవుడు ఆలకిస్తాడు. ఉదా: దావీదు, నతనయేలు వంటివారు దీనికి ఉదాహరణలు. ఫిలిప్పీయులకు 4:6-7లో పౌలు ఇలా ఉద్బోధించారు , “దేనిని గూర్చియు విచారింపకుడు. మీకు ఏమి అవసరమో, వాని కొరకు మీ ప్రార్థనలలో దేవుని అర్ధింపుడు. కాని, ఆవిధముగ అర్ధించునపుడు కృతజ్ఞతా పూర్వకమైన హృదయముతో ప్రార్ధింపుడు. మానవ అవగాహనను అతీతమైన దేవుని శాంతి మీ హృదయములను, మనస్సులను యేసు క్రీస్తు నందు భద్రముగ ఉంచును”. యేసు క్రీస్తు శాంతి, మన హృదయాలలో నెలకొనాలంటే, ప్రతీ విషయములో కృతజ్ఞతాభావముతో ప్రార్ధన చేయాలి. యిర్మీయా 17:10లో ప్రభువు ఇలా అన్నారు, “ప్రభువైన నేను హృదయమును పరిశోధించుదును”. దీని అర్థం, మన హృదయాంతరాలను దేవుడు ఎరిగి ఉంటారు. యేసు నతనయేలును చూచి, “ఇదిగో! కపటములేని నిజమైన యిస్రాయేలీయుడు” (యోహాను 1:47) అని చెప్పారు. దేవుడు మన హృదయాన్ని పరిశోధించేవాడు కాబట్టి, మనం కపటం లేని హృదయంతో ప్రార్థించాలి.

(3). హృదయ పరివర్తన: మనం హృదయ పరివర్తన చెందాలి. మన హృదయాలు యేసు తిరుహృదయాన్ని పోలి యుండాలి. క్రీస్తును పోలి, ఆయనవలె జీవించాలి (1 యోహాను 2:6). ద్వితీయోపదేశకాండం 7:6-9లో చెప్పినట్లు, “మీరు ప్రభువుకు పవిత్ర ప్రజలు. మిమ్మే తన సొంత ప్రజగా ఎన్నుకొనెను. ఆయన స్వయముగా మిమ్ము ప్రేమించెను. ప్రభువు తన ఆజ్ఞలను పాటించువారిని కరుణించును”.

పాపులను సైతము ప్రేమించిన గొప్ప హృదయం యేసుతిరుహృదయం. మన హృదయము పవిత్రముగా లేకపోతే ఈరోజే పశ్చాత్తాపపడి దేవుని క్షమాపణ అడుగుదాం. ఆయన నమ్మదగినవాడు. యేసుక్రీస్తు రక్తము మనల్ని పరిశుద్ధపరచి, ఆయన వాక్యముతో మన హృదయాలను కడుగుతుంది. దీనికి మనకు దేవుని కృప చాలా అవసరం.

“హృదయశుద్ధి గలవారు ధన్యులు, వారు దేవుని దర్శింతురు” (మత్త 5:8). హృదయశుద్ధి అనగా పాపములేని జీవితము. పవిత్రమైన జీవితాన్ని జీవించడం. పవిత్రమైన ఉద్దేశాలను కలిగి ఉండటం. సంపూర్ణముగా దేవునికి లోబడి జీవించడం. దేవునితో సన్నిహిత సహవాసము కలిగి ఉండటం. హెబ్రీయులు 12:14లో, “పవిత్ర జీవితము లేక ఎవరు ప్రభువును దర్శింపలేరు” అని చదువుచున్నాం. యేసు క్రీస్తు మనలను ప్రోత్సహిస్తూ, “మీ హృదయములను కలవర పడనీయకుడు. దేవుని విశ్వసింపుడు. నన్నును విశ్వసింపుడు” (యోహాను 14:1, 27) అని చెబుతున్నారు. కనుక, మన హృదయాలను ఆయనకు పూర్తిగా అంకితం చేద్దాం.

తిరు హృదయం - మార్గరెట్ మేరీ అలకోక్ దివ్య అనుభవం
1675వ సంవత్సరం జూన్ 16న, ఫ్రాన్స్‌కు చెందిన మఠకన్య మార్గరెట్ మేరీ అలకోక్ ఒక విశేషమైన దివ్య అనుభవాన్ని పొందారు. ఆమె దివ్యసత్ప్రసాదం గురించి ధ్యానిస్తుండగా, యేసు ప్రభువు ఆమెకు కనిపించి తన తిరు హృదయాన్ని చూపించారు. ఆ సమయంలో ఆమెకు అందిన సందేశం ఇది: “ఇదిగో తిరుహృదయం! మానవాళిని ఎంతగానో ప్రేమించినది, కాని, ప్రతిఫలంగా, వారినుండి కృతజ్ఞతలేమిని తప్ప మరేమియును పొందలేదు”.

 ఈ సందేశం, సర్వమానవాళి పట్ల క్రీస్తు ప్రేమ నిస్వార్ధమైనది, త్యాగపూరితమైనది అని స్పష్టం చేస్తుంది. క్రీస్తు మనలను ప్రేమించినట్లుగానే, మనము కూడా ఒకరినొకరం ప్రేమించుకోవాలని ఇది గుర్తు చేస్తుంది. మన చుట్టూ ఇన్ని బాధలు, కష్టాలు, అనారోగ్యం, ఆకలిదప్పులు, హింస, ద్వేషం, యుద్ధాలు, విభజనలు, శత్రుత్వం ఉన్నాయంటే దానికి ప్రధాన కారణం, మనం ఒకరినొకరం ప్రేమించుకొనక పోవడమే!

కనుక, హృదయ పరివర్తన ఎంతో అవసరమని మార్గరెట్ మేరీ అలకోక్ ఈ అనుభవం ద్వారా తెలియజేశారు. ప్రేమ-సేవ భావముతో జీవించాలి. ప్రేమించే-సేవించే హృదయం మాత్రమే పవిత్ర హృదయంగా మారగలదని ఆమె బోధించారు.
 
ఆత్మ పరిశీలన
మానవాళిపట్ల దేవుని ప్రేమ, క్రీస్తు ప్రేమ గొప్పది, అద్భుతమైనది. అయితే, మనలో చాలా మందిమి ఆ అపారమైన ప్రేమను తిరస్కరిస్తున్నాము. మన అవిధేయత, అవిశ్వాసం మరియు హృదయ కాఠిన్యత వలన, దేవుని ప్రేమను మనం దూరంగా ఉంచుతున్నాము. వాస్తవానికి, క్రీస్తు మనకోసం శ్రమలను, అవమానములను, బాధలను, చివరికి మరణాన్ని కూడా అనుభవించారు.
కనుక, మనం ఆయన ప్రేమను తెలుసుకుందాం, గ్రహిద్దాం మరియు ఆయనకు కృతజ్ఞతలు చెల్లించుకుందాం. ఆయన ప్రేమ మార్గంలో పయనిద్దాం!

యేసు తిరుహృదయం వైపునకు మన హృదయాలను త్రిప్పి, ఇప్పటినుండైనా మంచి జీవితాన్ని, పవిత్రమైన జీవితాన్ని జీవిద్దాం! వినయ విధేయతలతో తిరుహృదయానికి మనల్ని మనం అంకితం చేసుకున్నట్లయితే, శాంతి, ఆనందమును పొందుతాము.

అలాగే, మన కుటుంబాలను కూడా తిరుహృదయానికి అంకితం చేద్దాం. మన సంపూర్ణ నమ్మకాన్ని ఆయనలో ఉంచుదాం. మనపై ప్రేమాగ్నితో రగిలిపోతున్న తిరుహృదయం మనలను రక్షించును, శాంతి సమాధానము ఒసగును. 1 యోహాను 4:7-9లో చెప్పినట్లుగా, పరస్పరం ప్రేమ కలిగి జీవిద్దాం.
యేసు తిరుహృదయము మనలను ప్రేమించి, ఆశీర్వదించును గాక! ఆమెన్!