మంగళవారం, ఆగమన కాల రెండవ వారము (II)

 దేవుని ప్రేమ సందేశం: అనుదిన ధ్యానాంశాలు

మంగళవారం, ఆగమన కాల రెండవ వారము

యెషయా 40:1-11; మత్తయి 18:12-14

ధ్యానాంశము: దేవుని అనంతమైన ప్రేమ

ధ్యానమునకు ఉపకరించు వాక్యములు: “తప్పిపోయిన దానిని వెదకి రక్షింప వచ్చియున్నాడు” (మత్తయి 18:11)

ధ్యానము: త్రోవ తప్పిన గొఱ్ఱె ఉదాంతము ద్వారా, పాపము వలన తప్పిపోవుచున్న మానవున్ని దేవుడు తప్పక వెదకునని యేసు తెలియజేయు చున్నాడు. దేవుడు ఏకారణం చేతను ఎవరిని ఉపేక్షింపడు. తప్పిపోయిన దానిని వెదకి రక్షింప తన కుమారున్ని ఈ లోకమునకు పంపియున్నాడు. మనలో ప్రతీ ఒక్కరిని ఆయన ప్రేమించుచున్నాడు. ప్రతీ ఒక్కరు ముఖ్యమైనవారే, విలువైనవారే. మనలను రక్షించడానికి దేవుడు ఏమైనా చేస్తాడు; తన కుమారుని ప్రాణాలను సైతం అర్పిస్తాడు. ఎందుకన, ఒకడైనను నాశనమగుట పరలోకమందున్న తండ్రి చిత్తము కాదు. "పశ్చాత్తాపము అవసరము లేని తొంబది తొమ్మిది మంది నీతిమంతుల కంటే, హృదయ పరివర్తనము పొందు ఒక పాపాత్ముని విషయమై పరలోకమున ఎక్కువ ఆనందము ఉండును" (లూకా 15:7). కనుక, పాపములో పడి రక్షణ మార్గమును తప్పిన వాడు, హృదయపరివర్తనము చెంది తిరిగి దేవుని దరికి చేరినప్పుడు దేవుడు ఎంతగానో సంతోషిస్తాడు. తన అనంతమైన ప్రేమ కౌగిలిలో బంధిస్తాడు. పరలోకములో పండగ చేస్తాడు. ముఖ్యమైన విషయం ఇమిటంటే, మన పరివర్తనకు దేవుడు తప్పక సహాయం చేయును. 

యెషయా ‘దేవుని ఆగమనం’ గురించి ప్రస్తావిస్తూ, దేవుడు కాపరివలె తన ముందను మేపును. గొర్రె పిల్లలను చేతులలోనికి తీసికొని, రొమ్ముమీద పెట్టుకొని మోసికొనిపోవును" (40:11) అని దేవుని గాఢమైన ప్రేమను వ్యక్తపరచాడు. యేసు మన మార్గం, సత్యం, జీవం. ఆయనను అనుసరిస్తే, మనం ఎప్పటికీ తప్పిపోము. ఒక వేళ తప్పిపోయినను, ఆయన మనలను కనుగొని తన మందలోనికి చేర్చుకొనును.