ప్రభువు మోక్షారోహణము, Year C

ప్రభువు మోక్షారోహణము, Year C
అ.కా. 1:1-11; ఎఫెసీ. 1:17-23; లూకా. 24:46-53

ప్రభువు మోక్షారోహణము ఒక పరమ రహస్యము. ప్రభువు తన శిష్యులను వీడి తన తండ్రి వద్దకు వెళ్లాడని, అంతిమ దినమున తిరిగి మరల వస్తారని వాగ్ధానం చేసినట్లుగా బైబిలులో చదువుచున్నాము. ఈనాటి మొదటి పఠనము, సువిశేష పఠనము క్రీస్తు మోక్షారోహణము గూర్చి చెబుతున్నాయి. ప్రభువు తన భూలోక పరిచర్యను ముగించుట వలన, తద్వారా తిరుసభ పరిచర్య ఆరంభమైనది. శిష్యులు ప్రభువునకు వీడ్కోలు చెబుతున్నారు. ప్రభువు ఈ లోకమును వీడి వెళ్లుచుండగా శిష్యులకు కొన్ని అనుగ్రహాలను దయచేసారు: (i). లేఖనములు అర్ధమగునట్లు వారికి బుద్ధి వికాసము కలుగజేసెను (లూకా 24:45); (ii). పైనుండి పవిత్రాత్మ శక్తిని వారు పొందుతారని వాగ్ధానం చేసాడు (లూకా 24:49; అ.కా.1:4); (iii). తన చేతులెత్తి వారిని ఆశీర్వదించి (లూకా 24:50), (iv). అంతిమ దినముల వరకు వారితో ఉంటానని వాగ్ధానం చేసియున్నారు. అప్పుడు శిష్యులు ఆయనను ఆరాధించి మహానందముతో యెరూషలేమునకు తిరిగిపోయి, అక్కడ వారు ఎడతెగక దేవాలయమున దేవుని స్తుతించిరి (లూకా 24:52-53). 

శిష్యులలో గొప్ప మార్పు కలిగినది. క్రీస్తు సిలువ మరణము తరువాత భయముతో పారిపోయి దాగుకొనిన వారిలో ఇప్పుడు గొప్ప మార్పు సంభవించినది. కొత్త వ్యక్తులుగా రూపాంతరం చెందారు. విశ్వాసములో బలపడి, భవిష్యత్తుపై గొప్ప నిరీక్షణ కలిగి యున్నారు. యెరూషలేమునుండి భూదిగంతముల వరకు వారు తనకు సాక్షులుగా ఉండవలెనని ప్రభువు వారిని ఆదేశించారు (అ.కా.1:8). ప్రభువు తన అంతిమ సందేశములో, "వెళ్లి, సకల జాతి జనులకు పిత, పుత్ర, పవిత్రాత్మ నామమున జ్ఞానస్నాన మొసగుచు, వారిని నా శిష్యులు చేయుడు" (మత్త. 28:19) అని శిష్యులను కోరారు. అలాగే పవిత్రాత్మశక్తి వరము కొరకు వేచియుండాలని ఆదేశించారు. పరలోక దూతలు (తెల్లని దుస్తులు ధరించిన ఇద్దరు మనుష్యులు) శిష్యుల యొద్ద నిలిచి యేసు ఎట్లు పరలోకమునకు పోవుట మీరు చూచితిరో, అట్లే ఆయన మరల వచ్చును అని వారికి భయమును ఇచ్చారు (అ.కా.1:11).

ప్రభువు మోక్షారోహణ పండుగ, తన మహోన్నత ఉత్థానము తరువాత 40 రోజులకు, తన శిష్యుల సమక్షంలో యేసు ప్రభువు తన శక్తి చేత పరలోకమునకు ఎత్తబడుటను కొనియాడుచున్నది. ఈ పండగ ప్రభువు భూలోకంలోని తన రక్షణ కార్యము పరిపూర్తి అయినదని తెలియ జేయుచున్నది. ఉత్థానమునకు మోక్షారోహణమునకు మధ్యలో ప్రభువు అనేకమంది విశ్వాసులకు కనిపించి ముఖ్యముగా రెండు విషయాలను రూఢీపరచినారు: మొదటగా, తాను వాగ్ధానము చేయబడిన మెస్సయ్య అని నిరూపించారు. రెండవదిగా, మరణాన్ని జయించిన తాను ఎవరయితే విశ్వాసములో చివరికంటా జీవిస్తారో వారు కూడా మరణాన్ని జయించి దైవరాజ్యాన్ని పొందుతారని నిరూపించారు. పునీత అగుస్తీను వలన ఈ పండుగ విశ్వశ్రీసభ అంతయూ కొనియాడటం జరుగుతుంది.

ప్రభువు మోక్షారోహణ దినమున తాను తన శిష్యులకు ఇచ్చిన సందేశము - వారు ప్రపంచమంతట వెళ్లి సువార్తను బోధించాలి. సువార్తను విశ్వసించి జ్ఞానస్నానము పొందువారు రక్షింపబడుదురు. విశ్వసింపనివారు ఖండింపబడుదురు. క్రీస్తును విశ్వసింపనివారు ఆయన సన్నిధానమును కోల్పోవుదురు. ఆయనను విశ్వసించువారిని ఆధ్యాత్మిక వరములతో నింపును. ప్రభువు నామమున వారు దయ్యములను వెడలగొట్టెదరు. అనేక భాషలలో మాట్లాడగలుగుదురు. పాములను చేతులలో ఎత్తి పట్టుదురు. అనారోగ్యులపై వారి చేతులు చాచిన వారు స్వస్థత పొందెదరు. క్రీస్తు మోక్షారోహణము అయిన తరువాత శిష్యులు అంతటా వెళ్లి సువార్తను బోధించారు.

మోక్షారోహణము ద్వారా క్రీస్తు తండ్రిలో సంపూర్ణముగా కలకాలము ఐక్యమై యున్నారు. "శిష్యులు చూచుచుండగా ఆయన పరలోకమునకు కొనిపోబడెను. అప్పుడు వారి కన్నులకు కనబడకుండ, ఒక మేఘము ఆయనను కమ్మివేసెను." బైబిలులో "మేఘము" దేవుని సాన్నిధ్యాన్ని సూచిస్తుంది. తండ్రి దేవుడు తన కుమారున్ని తిరిగి తన దరికి తీసుకొని వెళ్ళారు.

మోక్షారోహణముతో శ్రీసభ పరిచర్య మొదలైనది. అనగా మన పరిచర్య మొదలైనది. క్రీస్తు జీవితము, బోధన, శ్రమలు, మరణము, ఉత్తానము గూర్చి బోధింపవలసిన బాధ్యత మనందరిపై యున్నది. దేవుని ప్రేమను, దయా కనికరమును, పాపమన్నింపును, దేవునితో, తోటివారితో సఖ్యతను బోధించాలి. కనుక ఈ సువార్తా పరిచర్యకు మనలను మనము సంసిద్ధము చేసుకోవాలి. దీనినిమిత్తమై, పరిశుద్ధాత్మను పొందాలి. అందుకే ప్రభువు శిష్యులను పవిత్రాత్మ రాకడ కొరకు వేచియుండాలని పదేపదే కోరారు. మనముకూడా ఆత్మపూరితులము కావాలి. అప్పుడే సువార్త పరిచర్య చేయగలం. క్రీస్తుకు సాక్షులముగా ఉండగలం. సువార్తా ప్రచారంలో పవిత్రాత్మ మనకి తోడుగా ఉండును. 

ఈరోజు క్రీస్తు మహిమను ధ్యానిస్తున్నాము. తండ్రి మహిమలో కుమారుడు సమానముగా పాలుపంచుకొని యున్నారు. తన మహిమలో శ్రీసభను ఎప్పుడు కూడా విడిచిపెట్టరు. త్రిత్వైక సన్నిధి శ్రీసభతో ఎల్లప్పుడూ ఉంటుంది (మత్త. 28:20). యేసు మన హృదయాలలో వాసము చేయుచున్నారు అని ఈనాటి పండుగ మనకు గుర్తు చేయుచున్నది. అలాగే ఆయన శ్రీసభలో వాసము చేయుచున్నారు. దివ్యసత్ప్రసాదములో వాసము చేయుచున్నారు. ఆయన మోక్షారోహణము అయినప్పటికిని ఆయన మనతోనే ఉన్నారు.

మోక్షారోహణ పండుగ క్రీస్తు మెస్సయ్య అని నిశ్చయముగా తెలియజేయు చున్నది. "యేసు నామము"న శిష్యులు పరిచర్య చేయవలెను. అనగా క్రీస్తు దైవానుసంభూతుడని నిరూపితమగుచున్నది. మోక్షారోహణమున ప్రభువు "తన చేతులెత్తి వారిని ఆశీర్వదించెను." ఇది ఒక సాధారణమైన ఆశీర్వాదము కాదు. గొప్ప ప్రధాన యాజకుడిగా వారిని ఆశీర్వదించారు. 

క్రీస్తు మోక్షారోహణము ఆయన తండ్రి వద్దకు వెళ్లిపోవడము మాత్రమే కాదు, ఆయన సాన్నిధ్యం మనతో కలకాలం ఉన్నదని ఈ మహోత్సవం మనకు గుర్తు చేయుచున్నది. మనకు ప్రభువు చేసిన రక్షణ కార్యమును మనము కొనసాగించాలి. మన ప్రేషిత కార్యములో మనము చేయవలసిన కార్యములు: సువార్తను బోధించాలి, అనగా, క్రీస్తు జీవితమును, ఆశయమును తెలియ జేయాలి; శారీరక, ఆధ్యాత్మికమగు క్రీస్తు స్వస్థతా పరిచర్యను కొనసాగించాలి; పవిత్రాత్మ శక్తిని అనుభవించులాగా చేయాలి; క్రీస్తు సాన్నిధ్యమును అనుభవించులాగా చేయాలి.

"మీకు ఆత్మను ప్రసాదింప వలసినదిగ, మన ప్రభువైన క్రీస్తు దేవుడు, మహిమాన్వితుడగు తండ్రిని అర్ధించుచుందును. మీరు ఆయనను ఎరుగునట్లుగ, ఆ ఆత్మ మీకు వివేకమును కలిగించి, దేవుడు మీకు విదిత మొనర్చును. ఆయన వెలుగును చూచునట్లు మీ మనస్సులు వికాసము పొందునుగాక అని నా అభ్యర్ధన. అప్పుడే ఆయన మిమ్ము చేరబిలిచిన, ఆ నిరీక్షణ ఎట్టిదియో, ఆయన తన ప్రజలకు వాగ్ధానము చేసిన దీవెనలు ఎంత మహత్తరమైనవో, విశ్వాసులమగు మనలో ఉన్న ఆయన శక్తి ఎంత అతీతమైనదో మీరు తెలిసికొనగలరు" (ఎఫెసీ. 1:17-18).