ఐదవ పాస్కా ఆదివారము, Year C

ఐదవ పాస్కా ఆదివారము, Year C

అ.కా. 14:21-27; దర్శన. 21:1-5; యోహాను 13:31-35

నూతన ఆజ్ఞ

నేడు పాస్క ఐదవ ఆదివారం. క్రీస్తు పునరుత్థాన కాంతిలో మనం పయనిస్తున్న ఈ పవిత్ర సమయంలో, ఉత్థాన ప్రభువు యొక్క దివ్యమైన వెలుగును మన హృదయాలలో నింపుకుందాం. ఆధ్యాత్మికంగా బలవంతుల మవుతూ ముందుకు సాగుదాం. పాస్క మొదటి ఆదివారం, ఈస్టర్ రోజున, 'క్రీస్తు నిజంగానే మృత్యుంజయుడై లేచారు!' అని విశ్వాసంతో చాటిచెప్పాము. పాస్క రెండవ ఆదివారంనాడు, తొలి క్రైస్తవ సంఘం యొక్క ఆరంభ చరిత్రను మననం చేసుకున్నాము. పాస్క మూడవ ఆదివారంనాడు, ప్రభువు పట్ల సంపూర్ణ విధేయతతో జీవించాలని గుర్తుచేసుకున్నాము. పాస్క నాల్గవ ఆదివారంనాడు, ప్రభువు మంచి కాపరి అని, ఆయన స్వరాన్ని విని ఆయనను అనుసరించాలని ధ్యానించాము. ఇక ఈ పాస్క ఐదవ ఆదివారంనాడు, ప్రభువు తన కడరాత్రి భోజన సమయంలో అనుగ్రహించిన ప్రేమ అనే ఆజ్ఞను లోతుగా పరిశీలిద్దాం. ప్రేమే మనకు గుర్తింపు, మన ఉనికికి మూలం అని ఈరోజు మనం గుర్తుచేసు కుంటున్నాము. కాబట్టి, ఈ ముఖ్యమైన మరియు శక్తివంతమైన ప్రేమాజ్ఞను ఈ ఐదవ పాస్క ఆదివారంనాడు ప్రత్యేకంగా ధ్యానిద్దాం. నేటి పరిశుద్ధ గ్రంథ పఠనాలు ఈ ప్రేమాజ్ఞ యొక్క లోతులను, దాని భావాన్ని, దాని ప్రాముఖ్యతను మరియు మన జీవితాలలో దానిని ఎలా ఆచరించాలో మనకు స్పష్టంగా తెలియజేస్తున్నాయి.

అపోస్తలుల కార్యములలోని మొదటి పఠనంలో, పౌలు మరియు బర్నబా యొక్క సువార్త పరిచర్య యొక్క అద్భుతమైన ప్రయాణాన్ని మనం ఆలకిస్తున్నాము. వారు ఎన్నో కష్టాలను ఎదుర్కొన్నప్పటికీ, యేసుక్రీస్తు యొక్క శుభవార్తను నిశ్చలమైన ధైర్యంతో ప్రకటించారు. ఫలితంగా, అనేకులను క్రీస్తు శిష్యులుగా మార్చి, బలమైన సంఘాలను స్థాపించారు. తిరిగి వచ్చిన తరువాత, తమ సుదీర్ఘ ప్రయాణంలో దేవుడు చేసిన మహత్తర కార్యాలన్నిటినీ వారు సంఘానికి తెలియజేశారు. క్రీస్తు ప్రేమతో నిండిన జీవితం ఎల్లప్పుడూ సుగమం కాకపోవచ్చు, కానీ విశ్వాసంతోనూ, పరస్పర సహకారంతోనూ మనం ఏ సవాలునైనా జయించగలమని నేటి మొదటి పఠనం మనకు స్పష్టంగా తెలియ జేస్తుంది. ప్రేమ మరియు పరిపూర్ణమైన అంకిత భావం, పౌలు, బర్నబాల యొక్క సువార్త పరిచర్యలో ఇతరులను క్రీస్తు వైపు నడిపించడానికి శక్తివంతమైన సాధనాలుగా పనిచేశాయి.

రెండవ పఠనము, దర్శన గ్రంథము నుండి, యోహాను చూసిన క్రొత్త దివి మరియు క్రొత్త భువి యొక్క అద్భుతమైన దర్శనమును గూర్చి వింటున్నాము. “అక్కడ మృత్యువు గాని, దుఃఖము గాని, ఏడుపు గాని, బాధ గాని ఉండబోవు. ఎందుకంటే పాత విషయములు గతించినవి. దేవుడే స్వయముగా తన ప్రజలతో ఉంటాడు మరియు వారి కన్నీళ్లన్నిటినీ తుడుస్తాడు”. ఈ దర్శనం మన హృదయాలలో అనంతమైన నిరీక్షణను నింపుతుంది. క్రీస్తు ప్రేమ ద్వారా మనకు వాగ్దానం చేయబడిన శాశ్వత జీవం యొక్క అపురూపమైన మహిమను ఇది మనకు గుర్తుచేస్తుంది. మన ప్రస్తుత కష్టాలు క్షణికమైనవని, దేవుడు మన కోసం సిద్ధం చేసిన మహిమ ముందు ఇవి ఏమాత్రం సాటిరావు అని ఈ దర్శనం మనకు ధైర్యాన్నిస్తుంది.

ఈనాటి సువిశేష పఠనములో, కడరాత్రి భోజన సమయములో, శిష్యులకు ప్రభువు ఇచ్చిన చివరి సందేశములోని భాగాన్ని వింటున్నాము. “ఒకరి నొకరు ప్రేమించు కొనుడు” అని ప్రభువు తన ప్రియమైన శిష్యులకు ఆత్మీయమైన పిలుపును ఇచ్చారు. “నేను మీకు ఒక నూతన ఆజ్ఞను ఇచ్చుచున్నాను. మీరు ఒకరినొకరు ప్రేమింపుడు. నేను మిమ్ము ప్రేమించినట్లే మీరును ఒకరినొకరు ప్రేమించు కొనుడు. మీరు పరస్పరము ప్రేమ కలిగి యున్నచో, దానిని బట్టి మీరు నా శిష్యులని అందరు తెలిసికొందురు” అని ప్రభువే స్వయముగా చెప్పడము యో 13:34-35లో చదువు చున్నాము.

యేసుక్రీస్తు ప్రభువు అనుగ్రహించిన ఈ ప్రేమాజ్ఞ కేవలం ఒక సాధారణ సూచన కాదు. ఇది యేసు శిష్యులుగా మనకున్న ప్రత్యేకమైన గుర్తింపు, మన జీవితానికి బలమైన పునాది. యేసు మనలను ప్రేమించిన విధముగా, నిస్వార్థముగా, త్యాగపూరిత భావముతో, సంపూర్ణముగా, మనము కూడా ఒకరినొకరు ప్రేమించాలి. ఈ ఆజ్ఞ ఒక నూతనత్వాన్ని సంతరించుకుంది, ఎందుకంటే, పాత నిబంధనలో “నీవలె నీ పొరుగు వానిని ప్రేమించుము” అని మాత్రమే లేవీ 19:18లో చెప్పబడింది. కానీ యేసు ఇక్కడ “నేను మిమ్ము ప్రేమించినట్లే” అని ఒక ఉన్నతమైన, నూతన ప్రమాణాన్ని నెలకొల్పుతున్నారు. క్రీస్తు ప్రేమ స్వీయ-త్యాగం కలిగినది, స్వార్థరహితమైనది మరియు పరిపూర్ణమైనది. యేసు తన ప్రేమను తన శిష్యుల పాదాలు కడగడము ద్వారా ప్రత్యక్షముగా చూపించారు. ఇది దాస్యము మరియు వినయానికి అత్యంత బలమైన చిహ్నము. ఆయన తనను తాను తగ్గించుకొని వారికి సేవ చేశారు. ఆయన ప్రేమ మన ప్రేమకు ఆదర్శం మాత్రమే కాదు, అది మనకు నిరంతర ప్రేరణ కూడా. మనము మాటలతో మాత్రమే కాకుండా, క్రియలతో, హృదయపూర్వక ప్రేమతో ఒకరినొకరు ప్రేమించాలి. ఈ ప్రేమ కేవలము మన స్నేహితులు, బంధువులు, మరియు ప్రియమైన వారికి మాత్రమే పరిమితము కాదు. మనకు కష్టము కలిగించే వారిని కూడా మనము ప్రేమించాలి. యేసు క్రీస్తు తన శత్రువులను కూడా ప్రేమించారు మరియు తనను హింసించిన వారి కోసం ప్రార్థించారు. కాబట్టి, మనము కూడా అందరి పట్ల దయ, కరుణ, క్షమాగుణముతో నిండిన జీవితాన్ని జీవించాలి.

మనకు ఈ ప్రేమ ఎందుకు అత్యవసరం? ప్రభువు ఈ నూతన ప్రేమాజ్ఞను మనకు ఎందుకు అనుగ్రహించారు? దీనికి కారణం ఒక్కటే - దేవుడే స్వయంగా ప్రేమ స్వరూపుడు. ఆయనే ప్రేమకు మూలం. త్రిత్వైక సర్వేశ్వరుడు ప్రేమతో నిండిన ఒక దివ్యమైన సమూహము. కాబట్టి, ప్రేమ ఎక్కడ ఉంటుందో, అక్కడ దేవుడు నిశ్చయంగా ఉంటాడు. ఎవరైతే తమ హృదయంలో పరిపూర్ణమైన ప్రేమను కలిగి ఉంటారో, వారు సరైన మార్గంలో పయనిస్తున్నట్లే! ప్రేమతో నిండిన హృదయం నిజమైన సంతోషానికి ఊట. హృదయంలో ప్రేమను నింపుకున్నవారు ఎల్లప్పుడూ ఆనందంగా ఉంటారు.

మానవుని హృదయం ప్రేమ కోసం నిరంతరం తపిస్తూ ఉంటుంది. ప్రేమ లేని జీవితాన్ని ఊహించలేము. అది మన సహజ స్వభావం. ప్రేమ లేకపోతే మనం స్థిరంగా ఉండలేము, ఒక విధమైన అసంతృప్తి మనల్ని వెంటాడుతుంది. అయితే, దురదృష్టవశాత్తు, చాలామంది ప్రేమించడానికి వెనుకాడుతున్నారు. ప్రేమ తమ హృదయాలను గాయపరుస్తుందేమోనని వారు భయపడుతున్నారు. గతంలో ఎదురైన బాధాకరమైన అనుభవాలు ఇతరులకు దూరంగా ఉండాలనే బలమైన కోరికను కలిగిస్తాయి.

ప్రభువు తన శిష్యుల పాదాలను కడుగుతున్న సమయంలో ఈ నూతన ఆజ్ఞను ప్రసాదించారు. ఈ చర్య ద్వారా ప్రభువు మనకు బోధిస్తున్న సత్యం ఏమిటంటే, ప్రేమ అంటే నిస్వార్థమైన సేవ అని. ఆ కాలంలో బానిసలు మాత్రమే ఇతరుల పాదాలను కడిగే దుర్భరమైన పనిని చేసేవారు. అయినప్పటికీ, ప్రభువు స్వయంగా తన శిష్యుల పాదాలను కడగడం ద్వారా, వారిని సేవాభావంతో కూడిన జీవితానికి ఆహ్వానించారు. వినయ విధేయతలతో ఇతరుల శ్రేయస్సు కోసం నిరంతరం కృషి చేయాలని వారికి పిలుపునిచ్చారు. ప్రభువు యొక్క ప్రేమ అనంతమైనది, ఎటువంటి హద్దులు మరియు షరతులు లేనిది. మానవాళి రక్షణ కోసం ఆయన తనను తాను సంపూర్ణంగా బలిగా అర్పించుకున్నారు. ఇంతటి గొప్ప ప్రేమను ఈ లోకం గ్రహించలేకపోయింది, బదులుగా ఆయనపై ద్వేషాన్ని పెంచుకుంది, శత్రువుగా భావించింది. ఈ ద్వేషం మరియు శత్రుత్వం కారణంగా ఆయన సిలువ మరణాన్ని పొందినప్పటికీ, “తండ్రీ, వీరు చేయుచున్నది వీరు ఎరుగరు, వీరిని క్షమించు” (లూకా 23:34) అని ప్రార్ధించారు. ఎంతటి అద్భుతమైన ప్రేమ!

ప్రభువు ప్రసావించిన ఈ నూతన ప్రేమాజ్ఞలో మనం ప్రధానంగా మూడు అంశాలను గుర్తించాలి:

(1). మొదటిది, ప్రభువు స్పష్టంగా ఆజ్ఞాపిస్తూ "ఒకరినొకరు ప్రేమించుకోండి" (యో 13:34) అని సెలవిచ్చారు. ఇది కేవలం ఒక సూచన కాదు, ఒక నిర్దిష్టమైన ఆజ్ఞ. కాబట్టి, మనకు వేరే అవకాశం కానీ, ప్రత్యామ్నాయ మార్గం కానీ లేదు. ప్రభువు యొక్క ఈ ఆజ్ఞకు మనం తప్పక విధేయులై ఉండాలి. ఇతరులను ప్రేమించడం మన యొక్క ప్రాథమిక బాధ్యత అని మనం గ్రహించాలి!

(2). రెండవది, “ఒకరి నొకరు ప్రేమింపుడు” అనే మాటల యొక్క అంతరార్థం ఏమిటంటే, మనం ఎటువంటి షరతులు లేదా పరిమితులు లేకుండా ప్రేమించాలి. ప్రభువు కేవలం ప్రేమించమని మాత్రమే చెప్పారు. ప్రేమ అనంతమైనది, కాబట్టి మనం కూడా ఒకరినొకరు అనంతంగా ప్రేమించడానికి ప్రయత్నించాలి.

(3). మూడవది, ప్రభువు మరింత లోతుగా చెబుతూ “నేను మిమ్మును ప్రేమించినట్లే మీరును ఒకరినొకరు ప్రేమించు కొనుడు” (యో 13:34) అని ఉద్ఘాటించారు. దీని అర్థం ఏమిటంటే, ముందుగా క్రీస్తు మనలను ఎంతగా ప్రేమిస్తున్నారో మనం పూర్తిగా తెలుసుకోవాలి. దేవుడు మనలను అత్యంత ఎక్కువగా, అనంతమైన ప్రేమతో ప్రేమిస్తున్నారు. మనం పాపులైనప్పటికీ, ఆయన మనపై తన ప్రేమను కురిపిస్తూనే ఉన్నారు. కాబట్టి, క్రైస్తవ జీవితంలో 'ప్రేమ' అన్నిటికంటే ముఖ్యమైన మరియు ప్రాథమికమైన అంశం అని మనం స్పష్టంగా అర్థం చేసుకోవాలి.

ప్రేమ - క్రైస్తవ జీవితానికి విశిష్టమైన గుర్తింపు, జీవనాధారమైన మూలం

“మీరు పరస్పరము ప్రేమ కలిగి యున్నచో, దానిని బట్టి మీరు నా శిష్యులని అందరు తెలిసి కొందురు” (యో 13:35) అని ప్రభువు పలికి యున్నారు. క్రైస్తవులుగా లేదా క్రీస్తు శిష్యులుగా ఈ లోకానికి మనల్ని మనం పరిచయం చేయడానికి ఉన్న ఏకైక మార్గం - ప్రేమ. మనం ధరించే బాహ్యమైన వస్త్రాల కంటే, మనం జీవించే విధానమే అత్యంత ప్రాముఖ్యమైనది! ప్రేమే మన క్రైస్తవ గుర్తింపు, మన ఉనికికి మూలం. మన నిజమైన యూనిఫాం ప్రేమ. అనగా, ప్రేమను మన జీవితంలో నింపుకొని జీవించాలి. మన జీవితం ద్వారానే మనం ఇతరులకు సాక్ష్యంగా నిలవాలి. పునీత అస్సీసి ఫ్రాన్సిస్ ఒక సందర్భంలో చెప్పినట్లుగా, “అన్ని వేళలా సువార్తను బోధించు. అవసరమైనప్పుడే మాటలను ఉపయోగించు”. ప్రభువు మాటలను మళ్ళీ గుర్తుచేసుకుందాం, “మీరు పరస్పరము ప్రేమ కలిగి యున్నచో, దానిని బట్టి మీరు నా శిష్యులని అందరు తెలిసి కొందురు” (యో 13:35).

1 యోహాను 4:7-8 వచనాలను జ్ఞాపకం చేసుకుందాము. “ప్రేమ దేవుని నుండి పుట్టినది. కనుక మనము పరస్పరము ప్రేమింతుము. ప్రేమించువాడు దేవుని మూలముగ జన్మించినవాడు. అతడు దేవుని ఎరిగిన వాడగును. దేవుడు ప్రేమ స్వరూపుడు. కనుక ప్రేమింపనివాడు దేవుని ఎరుగని వాడే.” అలాగే, 1 యోహాను 4:16, “దేవుడు ప్రేమ స్వరూపుడు. ఏ వ్యక్తి ప్రేమమయుడై జీవించునో అతడు దేవుని యందును, దేవుడు అతని యందును ఉందురు. 1 యోహాను 4:20-21, “కాని, ఎవరైనను తాను దేవుని ప్రేమింతునని చెప్పుకొనుచు తన సోదరుని ద్వేషించినచో అట్టివాడు అసత్యవాది. తన కనులారా తాను చూచిన సోదరుని ప్రేమింపనిచో తాను చూడని దేవున్ని అతడు ప్రేమింపలేడు. కనుక దేవుని ప్రేమించువాడు, తన సోదరుని కూడ ప్రేమింప వలెను అనునదియే క్రీస్తు మనకు ఒసగిన ప్రేమాజ్ఞ.”

ప్రేమ అనేది క్రైస్తవ జీవితానికి తిరుగులేని పునాది అని పవిత్ర శ్రీసభ నొక్కి చెబుతోంది. దేవుని యొక్క నిస్వార్థమైన ప్రేమను హృదయ పూర్వకంగా అనుభవించిన వారు మాత్రమే తమ పొరుగువారిని నిజమైన ప్రేమతో ప్రేమించ గలుగుతారు. ఈ ప్రేమ కేవలం క్షణికమైన భావోద్వేగం కాదు; ఇది మన చర్యల ద్వారా స్పష్టంగా చూపబడే క్రియాశీలమైన ప్రేమ. మరి యేసుక్రీస్తు ప్రభువు మనకు అనుగ్రహించిన ఈ నూతన ఆజ్ఞను మన దైనందిన జీవితంలో మనం ఎలా ఆచరణలో పెట్టగలము? యేసుక్రీస్తు ఇచ్చిన నూతన ప్రేమాజ్ఞను మన జీవితాలలో ఆచరించడానికి కొన్ని మార్గాలు:

1. ఓర్పుతో క్షమించండి: ఇతరుల బలహీనతలను, పొరపాట్లను సహనంతో స్వీకరించడానికి ప్రయత్నించండి. వారిని క్షమించడానికి ఎల్లప్పుడూ సిద్ధంగా ఉండండి.

2. నిస్వార్థంగా సేవ చేయండి: అవసరంలో ఉన్నవారికి సహాయం అందించడానికి మీ సమయాన్ని, శక్తిని వినియోగించండి. ఇతరుల కష్టాలలో పాలుపంచుకోండి మరియు స్వార్థం లేకుండా వారికి సేవ చేయండి..

3. దయ, కరుణతో వ్యవహరించండి: మీ మాటలు మరియు చేతలు దయ, కరుణతో నిండి ఉండాలి. ఇతరులను ప్రోత్సహించండి మరియు వారికి ఆసరాగా నిలవండి.

4. ఐక్యత, శాంతిని నెలకొల్పండి: మీ సంఘంలోనూ, సమాజంలోనూ ఐక్యతను, శాంతిని పెంపొందించడానికి కృషి చేయండి. విభేదాలను అధిగమించడానికి ప్రయత్నించండి మరియు సామరస్యపూర్వకమైన వాతావరణాన్ని సృష్టించండి.

5. ఒకరి కోసం ఒకరు ప్రార్థించండి: ఒకరి కోసం ఒకరు చేసే ప్రార్థన మన ప్రేమను వ్యక్తం చేసే గొప్ప మార్గం. మన తోటి విశ్వాసుల కోసం, వారి అవసరాల కోసం మరియు వారి ఆధ్యాత్మిక ఎదుగుదల కోసం నిరంతరం ప్రార్థన చేయండి.

సోదరప్రేమ అనేది దైవప్రేమ యొక్క ప్రతిబింబం. ఈ ప్రేమాజ్ఞకు మనం విధేయులైనప్పుడు, ప్రభువులో మన ప్రేమ పరిపూర్ణతను చేరుకుంటుంది. తద్వారా, పరలోకపు తండ్రి తన కుమారుడైన యేసును ప్రేమించిన విధంగానే మనలను కూడా ప్రేమిస్తాడు. ప్రేమ లేకుండా, ఈ లోకంలో దుష్టత్వంతో జీవిస్తే, మనం మనల్ని మనమే మోసగించుకున్న వారమవుతాము! మొదటి పఠనంలో పౌలు మరియు బర్నబాలు సంఘాలను విశ్వాసంలోనూ, ప్రేమలోనూ నడిపించిన విధానం నేటికీ మనకు ఆదర్శంగా నిలుస్తుంది. రెండవ పఠనంలో యోహాను దర్శించిన “కొత్త దివి, కొత్త భువి” మన ప్రేమతో నిండిన జీవితానికి ఫలితంగా మనం చూడవచ్చు.

ప్రభువు మనకు అనుగ్రహించిన ఈ నూతన ఆజ్ఞను నిజంగా జీవించాలంటే, ఆ గొప్ప ప్రేమను స్వయంగా ఆయనే మన హృదయాలలో నింపాలి. ప్రతి ఒక్కరినీ ప్రేమించడం మానవ మాత్రులకు సులభం కాదు. అయితే, దేవుని సహాయంతో అసాధ్యమైనది ఏదీ లేదు. ప్రేమలో మనం ఎదగాలంటే, దేవుని శక్తిపై పూర్తిగా ఆధారపడాలి. ప్రేమించడం ఎలాగో మనకు నేర్పగలిగేది కేవలం దేవుడు మాత్రమే. మన వంతుగా ప్రేమించడానికి మనం నిరంతరం ప్రయత్నించాలి. మన హృదయపూర్వకమైన కృషిని బట్టే, దేవుడు తన కృపతో మనకు సహాయం చేస్తారు.

కాబట్టి, యేసు మనకు అనుగ్రహించిన ఈ నూతన ప్రేమాజ్ఞను మన హృదయాలలో శాశ్వతంగా నిలుపుకుందాం. ఆయన మనలను ప్రేమించినట్లే మనం కూడా ఒకరినొకరు ప్రేమిద్దాం. ఈ ప్రేమ మన విశ్వాసానికి బలమైన నిదర్శనంగా ఉండాలి. మన ప్రేమ ద్వారానే మనం క్రీస్తు శిష్యులమని ప్రపంచానికి చాటిచెబుదాం. మనం పరస్పరం ప్రేమించుకున్నప్పుడు, దేవుని ప్రేమను ఈ లోకంలో ప్రతిబింబిస్తున్నామని ఎల్లప్పుడూ గుర్తుంచుకుందాం.