Tuesday, December 20, 2011

తొమ్మిదవ దినము: 24 డిశంబర్ 2011: బేత్లెహేమున పశువులపాకలో యేసు జన్మించుట

తొమ్మిదవ దినము: 24 డిశంబర్ 2011
బేత్లెహేమున పశువులపాకలో యేసు జన్మించుట

ధ్యానాంశం: తన సామ్రాజ్యమునందు జనాభా లెక్కలు సేకరింప వలెనని ఆగస్తు చక్రవర్తి అధికారులకు ఆజ్ఞ ఇచ్చినప్పుడు, యోసేపు, దావీదు వంశస్తుడైనందున గలిలయ సీమలోని నజరేతునుండి యూదయా సీమలో ఉన్న దావీదు గ్రామమగు బేత్లెహేమునకు జనాభా లెక్కలలో తమ పేర్లు చేర్పించుటకై, తన భార్యయు, గర్భవతియునైన మరియమ్మనుకూడా వెంట బెట్టుకొని వెళ్ళెను. గర్భవతియైయున్న మరియ నాలుగుదినాలపాటు, చలిలో, కొండలమీద ప్రయాణముతో ఎంత వేదన పడి ఉంటుందో! వారు బేత్లెహేములో ఉండగానే మరియమ్మకు ప్రసవకాలము సమీపించెను. యోసేపు వారికి సత్రమున స్థలమును వెదికాడు. కాని, ఎక్కడ స్థలము లేకుండెను. వారు పేదవారు కాబట్టి, అన్ని సత్రములనుండి వారు వెడలగొట్టబడ్డారు.

ఆ రాత్రంతయు చోటుకోసం వెదికారు. చివరికి, గ్రామమునకు బయట పశువులపాకగాఉన్న ఒక గుహను కనుగొన్నారు. యోసేపు మరియతో, 'మరియ, ఇంత చలిలో ఈ పశువుల పాకలో రాత్రంతయు నీవు ఎలా ఉండగలవు?' అప్పుడు మరియ 'యోసేపు, రాజులకు రాజైన దైవకుమారుడు జన్మించకోరుకున్న రాజభవనము ఈ గుహనే! పాన్పు ఈ పశువుల తోట్టియే! ఆహా...! ఎంత గొప్ప మనసు! ఎంత గొప్ప వినయం! ఎంత గొప్ప సహనం!.

ప్రసవకాలం ఆసన్నమైనప్పుడు, మరియమ్మ తన తొలిచూలు కుమారుని కని, పొత్తి గుడ్డలలో చుట్టి పశువులతొట్టిలో పరుండబెట్టెను. దైవకుమారుడు, భూలోకమునకేతెంచిన అద్భుత క్షణాలు! ప్రభువుమహిమ ప్రకాశించిన మధుర క్షణాలు! గుహ అంతయు కూడా, జ్వాలాలతో ప్రకాశించిన క్షణాలు! దేవున్ని మరియ తన హృదయానికి హత్తుకున్న క్షణాలు! మరియ యోసేపులు, ప్రకృతితోకలసి, మోకరిల్లి, దివ్య బాలయేసుని ఆరాధించిన క్షణాలు! చిన్నియేసయ్యను పోత్తిగుడ్డలలో చుట్టి పశువులతొట్టిలో పరుండబెట్టిన క్షణాలు! ఇలా దైవ కుమారుడు మనమధ్యలో జన్మించడమువలన, ఆయన అనంతమైనప్రేమ నిరూపితమగుచున్నది.

ప్రార్ధన: ఆరాధనకు పాత్రుడవైన ఓ దివ్యబాలయేసువా! నేను నీనుండి ఎంతగా పరుగెడాలని ప్రయత్నంచేసినా, నీవు మాత్రం నావెంటే ఉన్నావు. అన్ని ఆపదలనుండి రక్షిస్తున్నావు. నేను నీ పాదముల దగ్గరైనా ఉండుటకు అర్హుడనుకాను. నా పాప భారమే, బేత్లెహేములోని పశువుల తొట్టిలో నీకన్నీటికి కారణం. పాపాత్ములను మన్నించి రక్షించుటకే పరలోకమునుండి, భూలోకానికి ఏతెంచావు. ఈ పాపినికూడా క్షమించి, రక్షించమని దీనముగా వేడుకొంటున్నాను. నేవే నాదేవుడవు, నా రక్షకుడవు!

ఈలోకాన్ని నీవెలుగుతో ప్రకాశింప భువికేగిన నీవు ఈ రాత్రికి నన్నునూ, నా హృదయాన్ని, నా జీవితాన్ని, నీ వెలుగుతో నింప అర్ధిస్తున్నాను. నిన్ను ఎల్లప్పుడూ ప్రేమించువరాన్ని దయచేయండి.

ఓ మరియా, యేసుని తల్లి, నా తల్లి! నీ ప్రార్ధనలవలన నీ కుమారునినుండి సమస్తమును ప్రాప్తించగలవు. నాకొరకు యేసయ్యను ప్రార్ధింపమని నా ఒకే ఒక ప్రార్ధన. ఆమెన్.

No comments:

Post a Comment