లియో XIV జగద్గురువులు - సాధారణ సమావేశం, బుధవారం, 21 మే 2025

 లియో XIV జగద్గురువులు
సాధారణ సమావేశం
సెయింట్ పీటర్స్ స్క్వేర్, బుధవారం, 21 మే 2025

ఉపదేశము – జూబిలీ 2025. యేసుక్రీస్తు మన నిరీక్షణ II. యేసు జీవితం. ఉపమానాలు 6. విత్తువాని ఉపమానము. ఆయన వారికి అనేక విషయములు ఉపమాన రీతిగా చెప్పెను (మత్తయి 13:3).

 ప్రియమైన సహోదరీ సహోదరులారా,

నా మొదటి సాధారణ సమావేశానికి మిమ్మల్ని స్వాగతించడం నాకు చాలా సంతోషంగా ఉంది. పోప్ ఫ్రాన్సిస్ ప్రారంభించిన “యేసుక్రీస్తు మన నిరీక్షణ” అనే అంశంపై జూబిలీ బోధనలను ఈరోజు నేను పునరుద్ధరిస్తున్నాను.

దేవుడు చరిత్రలో ఎలా పని చేస్తాడో ఉపమానాలు మనకు తెలియజేస్తాయి కాబట్టి, అవి మన నిరీక్షణను తిరిగి పొందడంలో సహాయపడతాయి. ఈ రోజు నేను ఒక ప్రత్యేకమైన ఉపమానంపై దృష్టి సారించాలనుకుంటున్నాను. ఇది అన్ని ఉపమానాలకు ఒక పరిచయంగా ఉంది. నేను విత్తువాని ఉపమానాన్ని (మత్తయి 13:1-17) ప్రస్తావిస్తున్నాను. ఈ ఉపమానంలో, యేసు బోధించే విధానాన్ని మనం స్పష్టంగా చూడవచ్చు. నేడు సువార్తను ప్రకటించడానికి ఇది మనకు ఎంతో ఉపకరిస్తుంది.

ప్రతి ఉపమానం మన దైనందిన జీవితం నుండి తీసుకోబడిన ఒక కథను వివరిస్తుంది. అలాగే, ఇది మనకు మరింత లోతైన అర్థాన్ని తెలియజేయాలని, మరియు దాని వైపు మనల్ని నడిపించాలని కోరుకుంటుంది. ఉపమానం మనలో ఆలోచనలను, ప్రశ్నలను లేవనెత్తుతుంది. బాహ్య రూపాలకే పరిమితం కాకుండా, లోతుగా ఆలోచించమని అది మనల్ని ఆహ్వానిస్తుంది. నాకు చెప్పబడిన ఉపమానాన్ని బట్టి, నేను నన్ను నేను ఇలా ప్రశ్నించుకోవచ్చు: "ఈ ఉపమానంలో నా స్థానం ఎక్కడ ఉంది? ఇది నా జీవితానికి ఏమి చెబుతుంది?" వాస్తవానికి, “ఉపమానం” అనే పదం గ్రీకు క్రియ "పరాబల్లేన్" నుండి వచ్చింది, దీని అర్థం "ముందుకు విసరడం". ఉపమానం నన్ను ప్రేరేపించే ఒక పదాన్ని నా ముందు విసిరి, అది నన్ను ప్రశ్నించుకునేలా చేస్తుంది.

విత్తువాని ఉపమానం దేవుని వాక్యం యొక్క గతిశీలతను మరియు అది కలిగించే ప్రభావాలను స్పష్టంగా తెలియజేస్తుంది. నిజానికి, సువార్తలోని ప్రతి మాట మన జీవితమనే నేలపై చల్లబడిన విత్తనం వంటిది. యేసు విత్తనం యొక్క రూపాన్ని వివిధ అర్థాలతో అనేకసార్లు ఉపయోగించారు. మత్తయి సువార్త 13వ అధ్యాయంలో, విత్తువాని ఉపమానం అనేక ఇతర చిన్న ఉపమానాలకు నాంది పలికింది. వీటిలో కొన్ని నేలలో ఏమి జరుగుతుందో దాని గురించి ప్రత్యేకంగా మాట్లాడుతాయి: గోధుమలు, కలుపు గింజలు, ఆవగింజ, మరియు పొలములో దాచబడిన ధనము. అయితే, ఈ నేల అంటే ఏమిటి? అది మన హృదయం, కానీ అది ప్రపంచం, సమాజం, మరియు శ్రీసభ కూడా. వాస్తవానికి, దేవుని వాక్యం ప్రతి వాస్తవికతను ఫలవంతం చేస్తుంది మరియు ప్రేరేపిస్తుంది.

ఆరంభంలో, యేసు తన ఇంటిని విడిచిపెట్టి, తన చుట్టూ గొప్ప జనసమూహం చేరడాన్ని మనం చూస్తాం (మత్తయి 13:1). ఆయన మాటలు అందరినీ ఆకర్షిస్తాయి, వారిలో ఆసక్తిని రేకెత్తిస్తాయి. ప్రజల్లో అనేక భిన్నమైన పరిస్థితులు ఉన్నాయన్నది స్పష్టమే. యేసు వాక్కు అందరి కోసమే అయినప్పటికీ, అది ప్రతి ఒక్కరిలో వేర్వేరుగా పనిచేస్తుంది. ఈ సందర్భం ఉపమానం యొక్క లోతైన అర్థాన్ని మరింత బాగా అర్థం చేసుకోవడానికి మనకు సహాయపడుతుంది.

వస్తువులను లెక్కించడానికి మనం అలవాటు పడ్డాం – కొన్నిసార్లు అది అవసరమే – కానీ ప్రేమ విషయంలో ఇది వర్తించదు! ఈ "వృథా చేసే" విత్తువాడు విత్తనాన్ని విసిరే విధానం, దేవుడు మనలను ప్రేమించే విధానానికి చక్కటి ప్రతిబింబం. విత్తనం యొక్క భవిష్యత్తు అది పడే నేల ఎలా స్వీకరిస్తుంది, మరియు అది ఉన్న పరిస్థితిపై ఆధారపడి ఉంటుందన్నది నిజమే. అయితే, అన్నింటికంటే ముఖ్యంగా, ఈ ఉపమానంలో యేసు మనకు చెప్పేదేమిటంటే, దేవుడు తన వాక్యం అనే విత్తనాన్ని అన్ని రకాల నేలలపై, అంటే మన జీవితంలోని ఏ పరిస్థితిలోనైనా విసురుతాడు: కొన్నిసార్లు మనం ఉపరితలంగా, పరధ్యానంగా ఉంటాం; కొన్నిసార్లు ఉత్సాహంతో కొట్టుకుపోతాం; మరికొన్నిసార్లు జీవితంలోని చింతలతో నిండిపోతాం; కానీ మనం ఇష్టపూర్వకంగా, స్వాగతించే సమయాలు కూడా ఉంటాయి. దేవుడు నమ్మకంతో ఉన్నాడు, ఎందుకంటే, ఎప్పుడో ఒకప్పుడు ఆ విత్తనం మొలకెత్తుతుందని ఆశిస్తున్నాడు. దేవుడు మనలను ఈ విధంగా ప్రేమిస్తాడు: మనం సారవంతమైన నేలగా మారడానికి అతను వేచి ఉండడు, కానీ ఎల్లప్పుడూ ఉదారంగా తన వాక్యాన్ని మనకు ఇస్తాడు. బహుశా అతను మనలను విశ్వసిస్తున్నాడని చూసి, మంచి నేలగా ఉండాలనే కోరిక మనలో రగులుతుంది. ఇది దేవుని ఉదారత మరియు దయ అనే బండపై ఆధారపడిన నిరీక్షణ.

విత్తనం ఫలించే విధానాన్ని వివరిస్తూ, యేసు తన జీవితం గురించి కూడా మాట్లాడుతున్నాడు. యేసు స్వయంగా వాక్యం, ఆయనే విత్తనం. విత్తనం ఫలించి వృద్ధి చెందాలంటే, అది ముందుగా చనిపోవాలి. కాబట్టి, ఈ ఉపమానం మనకు ఏమి చెబుతుందంటే, దేవుడు మనకోసం తనను తాను "త్యాగం" చేసుకోవడానికి సిద్ధంగా ఉన్నాడు, మరియు మన జీవితాలను రూపాంతరం చేయడానికి యేసు మరణించడానికి సిద్ధంగా ఉన్నాడు.

నా మదిలో వాన్ గోగ్ చిత్రించిన అద్భుతమైన దృశ్యం, 'ది సోవర్ ఎట్ సన్‌సెట్' (సూర్యాస్తమయం వద్ద విత్తువాడు) మెదులుతోంది. మండుతున్న సూర్యునిలో విత్తువాని ఆ చిత్రం, రైతు పడే శ్రమను నాకు గుర్తుచేస్తుంది. నన్ను ఆకట్టుకున్న మరో విషయం ఏమిటంటే, విత్తువాని వెనుక, వాన్ గోగ్ అప్పటికే పండిన ధాన్యాన్ని చిత్రీకరించాడు. ఇది నాకు ఆశకు ఒక ప్రతిరూపంగా అనిపిస్తుంది: ఏదో ఒక విధంగా, విత్తనం ఫలించింది. అది ఎలా జరిగిందో మనకు ఖచ్చితంగా తెలియదు, కానీ అది జరిగింది. అయితే, ఆ దృశ్యం మధ్యలో విత్తువాడు లేడు; అతను ఒక ప్రక్కగా నిలబడి ఉన్నాడు. బదులుగా, చిత్రం మొత్తం సూర్యుని చిత్రంతో నిండియుంది. బహుశా చరిత్రను కదిలించేది దేవుడే అని మనకు గుర్తు చేయడానికి కావచ్చు! విత్తువాడు దూరంగా ఉన్నట్లు అనిపించినా, మట్టి గడ్డలను వేడి చేసి విత్తనాన్ని పండించేది సూర్యుడే!

ప్రియమైన సహోదరీ సహోదరులారా, నేడు దేవుని వాక్యం మన జీవితంలోని ఏ పరిస్థితిలో మనల్ని చేరుకుంటోంది? ఆయన వాక్యమైన ఈ విత్తనాన్ని ఎల్లప్పుడూ స్వీకరించడానికి ప్రభువు కృప కోసం ప్రార్థిద్దాం. ఒకవేళ మనం సారవంతమైన నేల కాదని గ్రహిస్తే, నిరుత్సాహపడకుండా, మరింత మెరుగైన నేలగా మారడానికి మనపై కృషి చేయమని ఆయనను కోరుదాం.

విజ్ఞప్తి

గాజా స్ట్రిప్‌లో పరిస్థితి రోజురోజుకు మరింత ఆందోళనకరంగా, హృదయ విదారకంగా మారుతోంది. ఈ క్లిష్ట సమయంలో, గౌరవప్రదమైన మానవతా సహాయాన్ని తక్షణమే అనుమతించాలని, మరియు అక్కడ జరుగుతున్న శత్రుత్వాలను పూర్తిగా ఆపివేయాలని నేను నా హృదయపూర్వక విజ్ఞప్తిని పునరుద్ఘాటిస్తున్నాను. ముఖ్యంగా, ఈ యుద్ధం వల్ల పిల్లలు, వృద్ధులు మరియు అనారోగ్యంతో బాధపడుతున్న వారు చెల్లిస్తున్న ఘోరమైన మూల్యాన్ని నివారించాలి. వారికి తక్షణ ఉపశమనం లభించాలి.

ప్రత్యేక అభినందనలు:

ఇంగ్లాండ్, ఐర్లాండ్, హంగరీ, నార్వే, నైజీరియా, సెనెగల్, టాంజానియా, ఆస్ట్రేలియా, న్యూజిలాండ్, భారతదేశం, ఇండోనేషియా, మలేషియా, మంగోలియా, ఫిలిప్పీన్స్, దక్షిణ కొరియా, వియత్నాం, కెనడా మరియు యునైటెడ్ స్టేట్స్ నుండి విచ్చేసిన ఆంగ్ల భాష మాట్లాడే యాత్రికులకు మరియు సందర్శకులకు నేను స్వాగతం పలుకుతున్నాను. ముఖ్యంగా, సిస్టర్స్ ఆఫ్ సెయింట్ జోసెఫ్ ఆఫ్ అన్నెసీ, పల్లోటిన్ మిషనరీ సిస్టర్స్ ఆఫ్ ది కాథలిక్ అపోస్టోలేట్, డాటర్స్ ఆఫ్ సెయింట్ జెరోమ్ ఎమిలియాని, కపుల్స్ ఫర్ క్రైస్ట్ గ్రూప్, కెర్రీ డియోసెస్ నుండి వచ్చిన యాత్రికులకు, మరియు సెయింట్ కాసియన్ సెంటర్ నుండి వచ్చిన యువ స్వచ్ఛంద సేవకుల అంతర్జాతీయ బృందానికి నేను ప్రత్యేక శుభాకాంక్షలు తెలియజేస్తున్నాను. ప్రస్తుత నిరీక్షణ జూబిలీ మీకు మరియు మీ కుటుంబాలకు కృప మరియు ఆధ్యాత్మిక పునరుద్ధరణకు సమయం కావాలని ప్రార్థనాపూర్వక శుభాకాంక్షలతో, మీ అందరికీ ప్రభువైన యేసు యొక్క ఆనందం మరియు శాంతిని కోరుకుంటున్నాను.

 

పరిశుద్ధ జగద్గురువు మాటల సారాంశం:

ప్రియమైన సహోదరీ సహోదరులారా, నా పోంటిఫికేట్‌లో మొదటి సాధారణ సమావేశమైన ఈ సమావేశంలో మీతో ఉండటం నాకు సంతోషంగా ఉంది. నేడు, పోప్ ఫ్రాన్సిస్ ప్రారంభించిన “క్రీస్తు మన నిరీక్షణ” అనే జూబిలీ అంశంపై బోధనలను కొనసాగించి, విత్తువాని మరియు విత్తనం గురించిన యేసు ఉపమానంపై నేను ధ్యానించాలనుకుంటున్నాను. విత్తనము విత్తువాడు అన్ని రకాల నేలలపై, చివరికి రాతినేలపై కూడా, అత్యంత నిరాశాజనకంగా కనిపించే నేలలపై కూడా విత్తనాన్ని ఎంత ఉదారంగా, నిర్లక్ష్యంగా విసురుతాడో అది మనల్ని ఆకట్టుకుంటుంది. దేవుని వాక్యం విత్తనం అని యేసు వివరిస్తాడు. ఇది ఎవరినీ మినహాయించకుండా అందరి హృదయాలలో పాతుకుపోవడానికి ఉద్దేశించబడింది. ఈ ఉపమానాన్ని విని, మన జీవితాలకు అన్వయించుకునే మనం, ఆయన కృప కార్యకలాపానికి మరింత మెరుగైన, గ్రాహక నేలగా మారడానికి ఇది మనల్ని సవాలు చేస్తుంది. అయినప్పటికీ, విత్తువాని ఉపమానం యేసును గురించి కూడా మనకు ఆలోచింపజేస్తుంది. ఆయన తన మరణం మరియు పునరుత్థానంలో, నేలపై పడి, గొప్ప ఫలాలను ఫలించడానికి చనిపోయిన విత్తనంగా మారాడు. విత్తువాని చిత్రం – మనం వాన్ గోగ్ యొక్క ప్రసిద్ధ దృశ్యాన్ని గుర్తుచేసుకోవచ్చు – రాబోయే పంట యొక్క వాగ్దానంలో నిరీక్షణకు చిహ్నం. నేడు, మరియు ప్రతిరోజూ, ప్రభువు మన హృదయాలను తన రక్షించే వాక్యానికి మరియు మన జీవితాలను, మనం నివసించే ప్రపంచాన్ని మార్చడానికి, సుసంపన్నం చేయడానికి దాని శక్తికి తెరవమని అడుగుదాం.

 

మూలము:

https://www.vatican.va/content/leo-xiv/en/audiences/2025/documents/20250521-udienza-generale.html

గురుశ్రీ ప్రవీణ్ గోపు OFM Cap.