ప్రపంచ యువత దినోత్సవం 2023
జాగరణ ప్రార్ధన - పొప్ ఫ్రాన్సిస్ సందేశం
శనివారం, 5 ఆగష్టు 2023
ప్రియమైన సోదర సోదరీమణులారా, శుభ సాయంత్రం!
మీ అందరిని చూడటం నాకు చాలా సంతోషముగా ఉన్నది. మీరందరు ఇక్కడకు వచ్చినందుకు హృదయపూర్వక ధన్యవాదములు! ఎలిశబేతమ్మను సందర్శించుటకు ప్రయాణమై పోయిన మరియమ్మను నేను జ్ఞాపకం చేసికొనుచున్నాను. “మరియమ్మ లేచి త్వరితముగా ప్రయాణమై పోయెను” (లూకా 1:39). ఎలిశబేతమ్మను చూడటానికి మరియ ఎందుకు త్వరితముగా వెళ్ళినదని ప్రశ్నించవచ్చు. ఎలిశబేతమ్మ గర్భముతో నున్నదని మరియకు అప్పుడే దూతద్వారా తెలిసింది. అలాగే, మరియకూడా గర్భము దాల్చినది. ఆమెను ఎవరు అడగనప్పుడు, ఎందుకు వెళ్లడం? ఎవరు అడగని దానిని, చేయాల్సిన అవసరం లేకున్నను, మరియ ఇష్టపూర్తిగా చేయుచున్నది. మరియ ప్రేమించింది కనుక, యిష్టపూర్తిగా వెళ్ళినది.
మరియ ఆనందం రెండు రెట్లు: లోకరక్షకుడిని తన గర్భాన స్వాగతిస్తున్నదన్న దేవదూత శుభవార్తను అందుకొని యున్నది. అలాగే, తన చుట్టమగు ఎలిశబేతమ్మ గర్భము ధరించినదన్న వార్త తెలుసుకోవడం. మరియ వెంటనే తన గురించి ఆలోచించకుండా, ఇతరుల గురించి ఆలోచించింది. ఎందుకన నిజమైన సువార్తానందం ఇతరులతో పంచుకున్నప్పుడే కనుక. ఇక్కడ మీరందరు కూడా ఇతరులను కలుసుకోవడానికి, క్రీస్తు సందేశాన్ని కనుగొనడానికి, జీవిత పరమార్ధాన్ని చవిచూచుటకు వచ్చియున్నారు. మరి ఈ ఆనందాన్ని మీతోపాటే ఉంచుకుంటారా లేక ఇతరులతో పంచుకుంటారా? మీరు ఏమంటారు? ఖచ్చితముగా ఇతరులతో పంచుకొంటారు, ఎందుకన, నిజమైన సంతోషం ఇతరులతో పంచుకోవడమే!
మనం ఈ ఆనందాన్ని పొందుటకు మనకు ఇతరులు సహాయం చేసియున్నారు. మనం పొందిన సహాయాన్ని వెనుకకు తిరిగి చూద్దాం. అది మన హృదయాలను ఆనందముతో నింపినది. మన జీవితాలలో వెలుగులు నింపినవారు మన తల్లిదండ్రులు, తాతమామ్మలు, స్నేహితులు, గురువులు, ఆధ్యాత్మిక వ్యక్తులు, ఉపదేశకులు, యువనాయకులు, ఉపాధ్యాయులు ... వారే మన ఈ ఆనందానికి కారకులు. వారే మన మూలాలు. వారి గురించి తలంచుకుంటూ కొద్ది క్షణాలు మౌనముగా గడుపుదాం.
మనకు సహాయం చేసిన వారి ముఖాలు, సంఘటనలు గుర్తుకు వచ్చాయా? మన ఆనందానికి కారకులైన వారికి, సహాయం చేసిన వారికి హృదయపూర్వకముగా ధ్యన్యవాదములు తెలియచేద్దాం. అలాగే, మనంకూడా ఇతరుల ఆనందానికి కారకులము కావాలి. ఇది క్షణికమైన ఆనందం గురించి కాదు. శాశ్వతమైన, లోతైన ఆనందం.
ఆనందం అనేది తాళం వేసిన లైబ్రరీలో దొరకదు. ఆనందాన్ని మనం వెదకాలి, కనుగొనాలి. ఇతరులతో సంభాషించేప్పుడు కనుగొనాలి. అక్కడ మనం పొందిన ఆనందాన్ని పంచుకుంటాము. నేను మిమ్మల్ని ఒక ప్రశ్న అడుగుతాను: మీరు ఎప్పుడైనా అలిసిపోతారా? అలిసిపోయినప్పుడు ఏమి చేస్తాము? ఆలోచించండి! ఏమీ చేయాలని అనిపించదు. కొన్నిసార్లు వస్తువులను విసిరేస్తూ ఉంటాము. జీవితములో ఓటమిని చవిచూసినవారి, జీవితములో పడిపోయినవారి లేదా జీవితములో పెద్దపెద్ద తప్పులు చేసిన వారి జీవితాలు ముగిసిపోయినవని మీరు నమ్ముతారా? లేదు! కాబట్టి ఏమి చేయాలి? వారు తిరిగి లేవాలి. ఈ విషయాన్ని మీరు ఎల్లప్పుడూ గుర్తుంచుకోవాలని కోరుకుంటున్నాను: పర్వతాలను అధిరోహించడానికి ఆల్ఫ్ నుండి వచ్చేవారు, ఒక అందమైన పాటను పాడుకుంటారు. అదేమిటంటే, “పర్వతము ఎక్కే కళలో, పడిపోవడం ముఖ్యం కాదు, పడిపోయి అక్కడే ఉండక లేచి ముందుకు సాగడం ముఖ్యం”.
పడిపోయి అక్కడే ఉన్నవారు జీవితముపై ఆశలు వదిలేసుకున్నటువంటివారు. అలాంటివారు జీవితములో ఆశను కోల్పోయినవారు. జీవితములో పడిపోయిన మన స్నేహితులను చూసినప్పుడు మనం ఏమి చేయాలి? వారిని పైకి లేపండి. వారికి మనం ఎలా సహాయం చేయాలి? ముందుగా మనం వారిని చిన్నచూపుతో చూడరాదు. వారికి సహాయం చేయండి.
జీవితములో ముందుకు ఎలా సాగాలి? జీవితములో ఏదైనా సాధించడానికి, జీవితములో ప్రయాణం చేయడానికి, మనం శిక్షణ పొందాలి. కొన్నిసార్లు జీవితములో ముందుకు వెళ్లాలని అనిపించదు. ప్రయంత్నంకూడా చేయాలనిపించదు. ఏమీ చేయడానికి ఇష్టముండదు. ఏమీ చదవాలని అనిపించదు. మనం అనుకున్న ఫలితాలు రావు. అందుకే, పరీక్షలలో కాపీలు కొడుతూ ఉంటాము. మీలో ఫుట్ బాల్ ఆటను ఎంతమంది ఇష్టపడతారో ఖచ్చితముగా నాకు తెలియదు. నాకైతే చాలా ఇష్టం. గోల్ చేయడానికి ఎంత శిక్షణ అవసరమో ఆలోచించండి. ఒక నిర్దిష్ట ఫలితాన్ని సాధించడానికి ఎంతో ప్రయత్నం అవసరం. జీవితములో కూడా మనకు కావలసినది ఎల్లప్పుడూ చేయలేము. మన అంత:రంగములో లోతుగా, పిలుపుకు తగ్గట్టుగా మనం ప్రతిస్పందించడానికి దారితీసే వాటిని మనం చేయాలి. జీవితములో ముందుకు సాగిపోతూనే ఉండండి. పడిపోతే, తిరిగి లేవండి. తిరిగి లేవడానికి సహాయం చేసేవారు ఉంటారు. పడిపోయిన చోటే ఉండకూడదు. క్రమశిక్షణతో ముందుకు సాగుదాం. జీవితములో ఎలా ప్రయాణించాలో నేర్పించే కోర్సులు లేవు. అనుభవ పూర్వకముగా నేర్చుకుంటూ ముందుకు సాగిపోవాలి. అలాగే, మన తల్లిదండ్రులనుండి, పెద్దలనుండి, స్నేహితులనుండి నేర్చుకుంటాము.
No comments:
Post a Comment