21వ సామాన్య గురువారము (I)

 21వ సామాన్య  గురువారము
1 తెస్స. 3:7-13; మత్త. 24:42-51

ధ్యానాంశము: క్రీస్తు రెండవ రాకడ-జాగరూకత

ధ్యానమునకు ఉపకరించు వాక్యములు: “మీరును సిద్ధముగా ఉండుడు. ఏలయన, మనుష్యకుమారుడు మీరు ఊహింపని గడియలో వచ్చును” (మత్త. 24:44)

ధ్యానము: క్రీస్తు రెండవ రాకడ అనూహ్యమైన గడియలో వచ్చును అని మత్తయి సువార్తలో వింటున్నాము. మత్తయి సువార్తీకుడు, మూడు సంఘటనలను మనకు గుర్తుచేస్తున్నాడు. మొదటిది, నోవా దినములందు వచ్చిన ప్రళయం: ప్రజలు ధర్మమును, నీతిని మరచి, తినుచు, త్రాగుచు, వివాహములాడుచు, విచ్చలవిడి జీవితమును జీవించునప్పుడు ప్రళయము సంభవించినది. అలాగే, మనుష్యులు ఊహించని దినమునందు రెండవ రాకడ వచ్చును (మత్త. 24:37-39). రెండవది, “ఆ సమయమున ఇరువురు పొలములో పనిచేయుచుండ ఒకరు కొనిపోబడును, మరియొకరు విడిచిపెట్టబడును. ఇద్దరు స్త్రీలు తిరుగలి త్రిప్పుచుండ, ఒకతె కొనిపోబడును, మరియొకతె విడిచిపెట్టబడును”. కనుక, రెండవ రాకడ కొరకై జాగరూకులై యుండాలి (మత్త. 24:40-42). మూడవది, రెండవ రాకడ (ప్రభువు దినము) దొంగవలె వచ్చును (మత్త. 24:43-44; 2 పేతు. 3:10). అందుకే, ప్రతి క్రైస్తవుడు ఒక కావలివాడు. కనురెప్ప మూయక గస్తికాయునట్లు మెలకువతో నిరీక్షించాలి. మెలకువగా యుండటం, క్రైస్తవ గొప్పలక్షణం.

ప్రభువు రెండవ రాకడకై మన సంసిద్ధతకు రెండు కారణాలు: మొదటిది, రెండవ రాకడ సమయము, గడియ, రోజు ఎప్పుడు వచ్చునో మనకు తెలియదు. “మేలుకొని ఉండుడు. అతడు అకస్మాత్తుగా వచ్చి మీరు నిద్రించుచుండుట చూడవచ్చును. జాగరూకులై ఉండుడు” (మార్కు. 13:35-37). అందుకే, పౌలు, “నిద్రితుడా! మేల్కొనుము. మృతులనుండి లెమ్ము! క్రీస్తు నీపై ప్రకాశించును” (ఎఫెసీ. 5:14) అని హెచ్చరిస్తున్నాడు. “కనుక ఇతరులవలె, మనము నిద్రించుచుండరాదు. మేల్కొని జాగరూకులమై ఉండవలెను (1 తెస్స. 5:6). ప్రభువు రాకడ ఎప్పుడు సంభవించునో మనకు తెలియదు కనుక, మనము ఎల్లప్పుడూ మేల్కొని, జాగరూకులమై యుండాలి. ఈ క్షణములోనే వచ్చును అన్న భావనతో మనం సంసిద్ధ పడాలి.

గమనించండి! “ఆయన వచ్చినప్పుడు మేల్కొని సిద్ధముగా ఉన్నవారు ధన్యులు! అతడు నడుము కట్టుకొని, వారిని భోజనమునకు కూర్చుండ బెట్టి, తానే వచ్చి వారలకు వడ్డించును” (లూకా. 12:37). మత్తయి 25లో ‘పదిమంది కన్యలు’ ఉపమానములో, సిద్దముగనున్నవారు అతని వెంట వెళ్ళిరి. మిగతావారికి తలుపు మూయబడెను. కనుక, మెలకువతో ఉండుడు. ఆరోజును, ఆ గడియను మీరెరుగరు (1-13). ప్రభువు రాకడ, అంత్యదినమున మాత్రమేగాక, మన అంత్యదినమునకూడా సంభవించును. అది ఎప్పుడైనా సంభవించవచ్చు. మరి సిద్ధముగానున్నావా? మన ఆకస్మిక మరణం గురించి తప్పక ధ్యానం చేయాలి. అప్పుడే, దేవుడు ఇచ్చిన జీవితము, సమయముయొక్క విలువను తెలుసుకుంటాం. కనుక, సిద్ధపాటుతో జీవించుదాం.