ఫాతిమా మాత / జపమాలమాత మహోత్సవ ప్రసంగం

 ఫాతిమా మాత / జపమాలమాత మహోత్సవ ప్రసంగం (యెష 61:9-11; 1 పేతు 2:1-10; లూకా 1:26-38)

పూజ్య గురువులు, గ్రామ పెద్దలు, ప్రియ సహోదరీ, సహోదరులారా! ముందుగా మీ అందరికి ఫాతిమా మాత దేవాలయ వార్షికోత్సవ పండుగ శుభాకాంక్షలు! ఈరోజు మనం అత్యంత భక్తిశ్రద్ధలతో కొనియాడుతున్న ఫాతిమా మాత దేవాలయ మహోత్సవం మనకు ఎంతో ఆనందాన్ని, ఆధ్యాత్మిక ఉత్సాహాన్ని ఇస్తుంది. ఈ పవిత్ర సందర్భంలో ఫాతిమా మాత జీవితం, ఆ తల్లి మనకు అందించే దివ్యసందేశాన్ని ధ్యానించుదాం. వార్షికోత్సవం ఎందుకు? దేవాలయ వార్షికోత్సవం జరుపుకోవడం కేవలం ఒక ఆచారం, సాంప్రదాయం మాత్రమే కాదు! దేవాలయ ప్రతిష్ట గురించి, రాజుల మొదటి గ్రంధము 8:62-66; రాజుల దినచర్య రెండవ గ్రంధము 7:8-10లో చూస్తాం. సొలొమోను మహారాజు యెరూషలేములో మొదటి దేవాలయాన్ని నిర్మించిన తర్వాత, దేవుని సన్నిధి అక్కడ నిలిచియుండునట్లు దానిని ప్రతిష్ఠించి, ప్రజలందరితో కలసి 8 రోజుల పాటు గొప్ప ఉత్సవాన్ని జరుపుకున్నాడు. మక్కబీయుల మొదటి గ్రంధము 4:59 – “ప్రతియేడు బలిపీఠము ప్రతిష్టను పురస్కరించుకొని సంతసముతో ఉత్సవము చేసికోవలెను... ఆ పండుగను ఎనిమిది దినాళ్ళు జరుపవలయును.” యూదుల చరిత్రలో అంటియోకస్ అనే రాజు దేవాలయాన్ని అపవిత్రం చేసినప్పుడు, యూదా మక్కబీ మరియు అతని సోదరులు దానిని తిరిగి శుద్ధిచేసి ప్రతిష్ఠించారు. ఈ సందర్భాన్ని గుర్తుచేసుకుంటూ ప్రతి సంవత్సరం “దేవాలయ పునర్నిర్మాణ/ప్రతిష్ఠాపన పండుగ” జరుపుకునే ఆచారం ప్రారంభమైంది. నూతన నిబంధనలో, యోహాను 10:22-23 “యెరూషలేములో దేవాలయ ప్రతిష్టోత్సవము జరుగుచుండెను. అది శీతకాలము. యేసు దేవాలయమున సోలోమోను మంటపమున నడుచుచుండెను.” యేసుప్రభువు స్వయంగా యెరూషలేములో జరిగిన దేవాలయ ప్రతిష్ఠాపన వార్షికోత్సవ పండుగలో పాల్గొని, ఆ ఆచారాన్ని గౌరవించారని సువార్త స్పష్టం చేస్తోంది.

శ్రీసభ బోధనల ప్రకారం, దేవాలయ వార్షికోత్సవానికి మూడు ప్రధానమైన ఆధ్యాత్మిక అంశాలు ఉన్నాయి:

ఒకటి, దేవాలయం అంటే దేవుని నివాసం. దేవాలయం అంటే కేవలం రాళ్ళు, సిమెంటుతో కట్టిన భవనం కాదు. దివ్యబలిపూజ ద్వారా ప్రభువైన యేసు స్వయంగా నివసించే “దైవ నివాస స్థలం”. ప్రార్ధనకు, దైవారాధనకు పవిత్రమైన స్థలం! రెండు, ఈ భౌతిక దేవాలయం మన ఆధ్యాత్మిక జీవితానికి ప్రతీక. మనమందరం క్రీస్తు అనే పునాది రాయిపై నిర్మించబడిన సజీవమైన దేవాలయాలమని శ్రీసభ బోధిస్తుంది. (చదువుము: 1 పేతురు 2:5; 1 కొరి 3:16). దేవాలయ వార్షికోత్సవం జరుపుకున్నప్పుడు, భౌతిక దేవాలయంతో పాటు మన హృదయాలనే పవిత్ర దేవాలయాలను కూడా పవిత్రంగా ఉంచుకోవాలని శ్రీసభ గుర్తుచేస్తుంది. మూడు, ప్రతిష్ఠించబడిన ప్రతి దేవుని ఆలయం విశ్వ కతోలిక శ్రీసభకు చిన్న రూపం. విశ్వాసంలో మనం అంతా దేవుని కుటుంబం, దేవుని బిడ్డలం అని గుర్తుకు చేస్తుంది.

కాబట్టి, దేవాలయ వార్షికోత్సవాలు ఎందుకు జరుపుకుంటాము అంటే,

1. మన గ్రామానికి లేదా సంఘానికి దేవుడు ఇచ్చిన పవిత్ర దేవాలయాన్ని బట్టి, ముఖ్యంగా ఈ దేవాలయంలో లభించిన దివ్యసంస్కారాలను బట్టి, కృతజ్ఞతలు తెలపడం. 2. విశ్వాసులందరూ ఒక్కటై, ఐఖ్యతగా దేవుని కుటుంబంగా ప్రార్థనలో, దివ్యబలిపూజలో మరియు సహవాసంలో పాలుపంచుకోవడం. 3. మన వ్యక్తిగత మరియు కుటుంబ జీవితాలలో పాపపరిహారం పొంది, హృదయ పరివర్తన ద్వారా నూతన ఆధ్యాత్మిక ఉత్సాహాన్ని పొందడం కోసం. 4. ఆ దేవాలయానికి నామకరణం చేయబడిన పవిత్ర దేవమాత లేదా పునీతుల జీవితాన్ని ధ్యానించి, వారి మధ్యవర్తిత్వ ప్రార్ధన సహాయాన్ని కోరడం. మన దేవాలయం ఫాతిమా మాత దేవాలయం...

కాబట్టి, ప్రియ సహోదరీ సహోదరులారా! దేవాలయ వార్షికోత్సవం అనేది దేవుడు మన మధ్య నివసిస్తున్నాడనే పరమ సత్యాన్ని కొనియాడే మహోత్సవం. ఇది భౌతిక కట్టడానికి ఇచ్చే గౌరవం మాత్రమే కాదు, ఆ కట్టడం ద్వారా, దేవుని ప్రజలైన మనందరి ఆత్మీయ ఉత్సవం!

ఫాతిమా దర్శనాల నేపధ్యం

ఫాతిమా మాత అనగానే మొదటిగా మనకు గుర్తుకు వచ్చేది, ఫాతిమా మాత దర్శనాలు. 1917 మే 13వ తేదీ నాటికి మొదటి ప్రపంచ యుద్ధం ప్రారంభమై మూడు సంవత్సరాలు పూర్తయ్యాయి. ఆ యుద్ధం వల్ల ప్రపంచమంతా అశాంతితో, ప్రాణ నష్టంతో ఛిన్నాభిన్నమైంది. దాదాపు 80 లక్షలమంది ప్రాణాలు కోల్పోయారు. సరిగ్గా అదే సమయంలో, పోర్చుగల్‌లోని ‘ఫాతిమా’ అనే చిన్న గ్రామంలో గొర్రెలు మేపుకునే లూసీ, ఫ్రాన్సిస్, జసింత అనే ముగ్గురు చిన్నారులకు పరలోకం నుండి దేవుని తల్లి మరియమాత దర్శనమిచ్చారు. ఆ తల్లినే మనం ఈరోజు ‘ఫాతిమా మాత’ అని భక్తితో గౌరవిస్తున్నాం. ఆ ముగ్గురు చిన్నారులకు ఆ తల్లి ఆరుసార్లు ప్రత్యక్షమై, మానవాళికి ఒక ప్రత్యేకమైన దివ్య సందేశాన్ని అందించారు.

ఫాతిమామాత ఇస్తున్న హెచ్చరిక మరియు సందేశం

మానవులు తమ ఆలోచనల ద్వారా, మాటల ద్వారా, చేతల ద్వారా చేస్తున్న పాపాల వలన పరలోక తండ్రి ఎంతో బాధపడుతున్నారని ఆ తల్లి ఆవేదన వ్యక్తం చేశారు. పాపాత్ములు తమ మనసు మార్చుకోవాలని, పశ్చాత్తాపం చెందాలని, ప్రాయశ్చిత్తం చేసుకోవాలని కోరారు. మానవులను నరకం నుండి రక్షించి, యేసుక్రీస్తు నేర్పిన దేవుని ప్రేమను, సోదర ప్రేమను అందరూ ఆచరించాలన్నదే ఆ తల్లి ముఖ్య ఉద్దేశం. నిజమైన పశ్చాత్తాపము: యోవేలు 2:13 (చదువుము).

అలాగే, ప్రపంచ శాంతి కోసం, సమైఖ్యతకోసం ప్రతిరోజూ భక్తితో జపమాలను ప్రార్థించమని ఆ తల్లి కోరారు.

ఆరు దర్శనాలు – నిలిచిన అద్భుతం

మొదటి దర్శనం (మే 13): గొర్రెలు కాస్తున్న ఆ ముగ్గురు చిన్నారులకు ఒక ఒలీవ చెట్టుపై బంగారు రంగు దుస్తులు ధరించి, చేతిలో జపమాలతో దర్శనమిచ్చింది. లూసీ అను చిన్నారు, ధైర్యంచేసి, మేర్రు ఎవరు?’ అని అడుగగా, ఆ తల్లి... “నేను పరలోకము నుండి దిగివచ్చాను. రాబోయే ఆరు నెలల పాటు ప్రతి నెల 13వ తేదీన మీరు తప్పకుండా ఇక్కడికి రావాలి. అప్పుడు నేనెవరినో, ఎందుకు వచ్చానో నేను ఆశించేదేమిటో తెలుపుతాను” అని చెప్పారు.

రెండవ దర్శనం (జూన్ 13): ఆ చిన్నారులకు చెప్పినట్లుగా మరియతల్లి జూన్ మాసం 13వ తేదీన పోర్చుగల్ దేశ పాలకులు పునీత అంతోని వారి పండుగ రోజున మరల ఆ చిన్నారులకు దర్శనమిచ్చారు. అక్కడ సుమారు 70 మంది హాజరైనా, వారెవరు ఆ తల్లిని చూడలేదు. ఆ ముగ్గురు చిన్నారులు మాత్రం ఆ తల్లిని కళ్ళారా చూసి ఆమె పలుకులు మనసారా విన్నారు. రెండవ దర్శనంలో ఆ తల్లి పలికిన మాటలు: “ప్రతి దినం జపమాలను జపించండి” అని చెప్పారు.

మూడవ దర్శనాలు (జూలై 13): ప్రపంచ శాంతి కోసం జపమాల చెప్పాలని ఆ తల్లి మళ్లీ మళ్లీ గుర్తుచేశారు. ఆ తల్లి ప్రాధేయపడి, ప్రతి జపమాల గుర్తు చివరన మనం నేడు చెప్పుకునే ప్రార్థనను వెల్లడిచేసారు, “ఓ నా యేసువా! నా పాపములను మన్నించండి. నరకాగ్ని నుండి నన్ను కాపాడండి. ఆత్మలన్నింటినీ, ముఖ్యంగా మీ కృపకు అత్యవసరమైన వారిని మోక్షమునకు తీసుకొనిపొండి.”

నాలుగవ దర్శనం (ఆగష్టు 19): ప్రజలు నమ్మకపోయినా, ప్రభుత్వ అధికారులు పిల్లలను భయపెట్టినా, ఆ చిన్నారులు అచంచల విశ్వాసం ముందు ఎవరి ప్రయత్నాలూ సాగలేదు. ఆగస్టు మాసంలో 19వ తేదీన వారు దేవమాత దర్శన భాగ్యానికి నోచుకున్నారు. ఈసారి దర్శనంలో ఆ తల్లి అక్టోబర్ మాసంలో ఒక గొప్ప అద్భుతాన్ని చేయబోతున్నానని. ప్రతి ఒక్కరు మరింత ఎక్కువగా ప్రార్థనలలో, జపమాల ధ్యానంలో పాల్గొనాలని ఆ తల్లి ఆదేశించి అదృశ్యమయ్యారు.

ఐదవ దర్శనం (సెప్టెంబరు 18): ఈసారి దేవమాత దర్శనం సెప్టెంబర్ 18వ తేదీన ఇరియాలోనే జరిగింది. అక్కడ సుమారు 25 వేల మంది హాజరయ్యారు. అప్పుడు ఆ తల్లి ఈ విధంగా అన్నారు, “ప్రతిదినం జపమాల చెప్పటం మర్చిపోవద్దు.  అక్టోబర్ మాసంలో ఒక గొప్ప అద్భుతాన్ని చేయబోతున్నాను అని మరొకసారి చెప్పి అదృశ్యమయ్యారు.

అద్భుతమైన ఆఖరి దర్శనం (అక్టోబర్ 13): ఆ తల్లి మాట ఇచ్చినట్లుగానే, అక్టోబర్ 13వ తేదీన ఇరియా లోయలో 70 వేల మందికి పైగా ప్రజల సమక్షంలో ఒక గొప్ప అద్భుతం చోటు చేసుకుంది. సూర్యుడు రంగులు మారుతూ చక్రంలా తిరగడం, వర్షం ఆగిపోవడం అక్కడ ఉన్న ప్రతి ఒక్కరూ కళ్లారా చూశారు. నాస్తికులు సైతం ఆ అద్భుతాన్ని చూసి దేవుని మహిమను నమ్మి మోకాళ్లపై నిలబడి ప్రార్థించారు. అక్టోబర్ 13వ తేదీన ఆ ముగ్గురు చిన్నారులకు చివరి సారిగా ప్రత్యక్షమై “నేను జపమాల మాతను. మానవాళి చేస్తున్న పాపాల కోసం ప్రాయశ్చిత్తం పొందాలని అడిగేందుకు నేను ఇచ్చటకి వచ్చాను. మనుషులు తమ పాపాలతో ఇప్పటికే ప్రభువును అనేక రకాలుగా హింసించారు.” అని తన చివరి దర్శనంలో దేవమాత తమ మనో వ్యధను వ్యక్తం చేశారు.

ఫాతిమామాత - మనకందరికీ ఈ దేవాలయ వార్షికోత్సవం రోజున ఇస్తున్న సందేశం:

క్రైస్తవ చరిత్రలో మరియ తల్లి ఎన్నో దర్శనాలిచ్చినా, ఫాతిమా దర్శనాలు ప్రపంచ విశ్వాసులందరినీ ఒక్కతాటిపైకి తెచ్చాయి. మరియ తల్లి కేవలం యేసును కన్న తల్లి మాత్రమే కాదు... క్రీస్తును అనుసరించిన మొదటి శిష్యురాలు. తన కుమారుని మార్గంలో మనం కూడా నడవాలనే ఆ తల్లి ఇంతగా తపన పడ్డారు.

ప్రియమైన విశ్వాసులారా! మరియ తల్లి ప్రతి దర్శనంలోనూ మనకు చెప్పిన ఒకే ఒక మాట – “జపమాలను జపించండి, హృదయ పరివర్తన చెంది క్రీస్తు మార్గంలో అడుగులు వేయండి.” ఈ పవిత్ర వార్షికోత్సవ దినాన మనమందరం ఆ తల్లి మాటను పాటిద్దాం. ప్రతిరోజూ మన ఇళ్లలో జపమాలను ప్రార్థిద్దాం. మన కష్టసుఖాలను ఆ తల్లితో పంచుకుందాం. ఫాతిమా మాత మధ్యవర్తిత్వం ద్వారా మన కుటుంబాలన్నీ ఆయురారోగ్యాలతో, సంతోషంతో, ఐక్యతతో వర్ధిల్లాలని ఆ తల్లిని వేడుకుందాం.

పునీత లూకా గారు వ్రాసిన సువార్త 1:50 - “ప్రభువుపట్ల భయభక్తులుగలవారి మీద ఆయన కనికరము తరతరముల వరకు ఉండును.” కీర్తన 103:17 – “ప్రభువు పట్ల భయభక్తులు చూపువారి యెడల ఆయన కృప అనాదినుండి అనంతకాలము వరకు ఉండును.” దేవుని ప్రేమ, దేవుని అపరిమితమైన కనికరము మరియు దేవుడు ఒసగు ధన్యత మనందరికీ లభించాలంటే - మనము దేవునికి పరిపూర్ణమైన బిడ్డలముగా జీవించాలి. మన పట్ల ఉన్న దేవుని చిత్తాన్ని నెరవేర్చడానికి సిద్ధపడాలి. మన హృదయాలను ప్రభువునకు అంకితం చేస్తూ, ప్రతిక్షణం ఆయనను స్తుతిస్తూ సాగిపోయే క్రైస్తవ జీవితమును మనం జీవించాలి. దేవుడు ఎల్లప్పుడూ తన అపారమైన కృపను మనపై కురిపించడానికి సిద్ధంగా వేచి చూస్తున్నారు.

మరియమాత సమర్పణ – విధేయతకు మాదిరి

మన పరిశుద్ధ జపమాల మాత, దేవుని సంకల్పాన్ని నెరవేర్చడానికి - “ఇదిగో నేను ప్రభువు దాసురాలను; నీ మాట చొప్పున నాకు జరుగునుగాక!” (లూకా 1:38) అని తనను తాను దేవుని చిత్తానికి సంపూర్ణంగా అప్పగించుకుంది. అందుకే ఆమె స్త్రీలందరిలో ఆశీర్వదించబడినదిగా, ధన్యురాలిగా కీర్తించబడింది.

జపమాల రాజ్ఞిగా అమ్మ ఎన్నో అద్భుత కార్యములను చేస్తూనే ఉన్నారు. వివిధ దర్శనాల ద్వారా విశ్వాసులను దేవుని చిత్తం వైపు నడిపిస్తున్నారు. స్వచ్ఛమైన ప్రేమతో జీవించాలని, దేవుని అనుసరణలో ఆయన చెప్పినట్లు నడుచుకోవాలని మనల్ని నిరంతరం హెచ్చరిస్తూ, కాపాడుతున్నారు.

ప్రేమ రాజ్య నిర్మాణం - శాంతి పిలుపు

మనందరి హృదయాలలో స్వచ్ఛమైన దైవప్రేమ పొంగిపొర్లాలి. కుట్రలు, కుతంత్రాలు, శత్రుత్వము, ద్వేషము మరియు యుద్ధాలు దేవుని హృదయాన్ని తీవ్రంగా గాయపరుస్తాయి. ప్రపంచ దేశాలన్నీ సమైక్యతతో మెలగాలి; ఒక దేశం మరొక దేశంపై యుద్ధానికి దిగకూడదు. దేవుడు కోరుకున్నది ప్రేమ రాజ్యాన్ని, శాంతి వాతావరణాన్ని మాత్రమే! మత్త 5:9 – “శాంతి స్థాపకులు ధన్యులు, వారు దేవుని కుమారులనబడుదురు”. రోమీ 12:18 – “అందరి తోడను సౌమ్యముగా జీవించునట్లు మీకు సాధ్యమైనంత వరకు ప్రయత్నింపుడు.”

వ్యక్తిగతంగా మరియు కుటుంబపరంగా మనమందరం గొడవలకు, మనస్పర్ధలకు దూరంగా ఉండాలి. దేవుని పట్ల భయభక్తులు కలిగి, ఆయనకు విధేయులమై జీవించినప్పుడే, ఆయన కనికరాన్ని మన తరతరాలు పొందుకుంటాయి. అప్పుడే మనం దేవునిచే ఎన్నుకోబడతాము, ఆశీర్వదించబడతాము, ఆయన మహిమలో ఘనపరచబడతాము.

జపమాల – మన ఆత్మరక్షణ ఆయుధం

ప్రతి ఒక్కరి ఇంటా, ప్రతి ఒక్కరి చేతిలో ‘పవిత్ర జపమాల’ అనే క్షేమకరమైన ఆత్మీయ ఆయుధం తోడుగా ఉండాలి. ఏకాగ్రతతో, ధ్యాసతో జపమాలను ప్రార్థిద్దాం. ప్రతి కుటుంబంలో జపమాల ప్రార్థనను విధిగా పాటిద్దాం. మన పిల్లలకు జపమాల విశిష్టతను, దాని ఆధ్యాత్మిక విలువను నేర్పిద్దాం. కృతజ్ఞతా భావంతో ప్రార్ధన చేద్దాం - ఫిలిప్పీ 4:6 (చదువుము)

“ఓ జపమాల రాజ్ఞీ! మా కొరకు మీ ప్రియ కుమారుని వేడుకొనండి తల్లీ! మమ్ములను, మా కుటుంబాలను క్షేమంగా కాపాడండి” అని నిత్యం అమ్మను ప్రార్థిద్దాం. దేవుని దయలో, ఆయన దివ్య ప్రేమలో మన జీవితాలు, కుటుంబాలు నూతన మేలులతో నిండుగాక! దేవుని కృప ద్వారా మన అనుదిన జీవితంలో ఆశ్చర్యకార్యములను చవిచూద్దాం.

నేటి సమాజ పరిస్థితులకు అనుగుణంగా ఆచరణాత్మక జీవిత మార్గదర్శకాలు:

1. నేడు చిన్నపిల్లల నుండి పెద్దల వరకు రోజూ గంటల తరబడి స్మార్ట్‌ఫోన్‌లు, సోషల్ మీడియా మరియు టీవీలకే సమయం కేటాయిస్తున్నారు. ప్రతిరోజూ కనీసం కొంత సమయం ఫోన్‌లు పక్కన పెట్టి, కుటుంబమంతా కలసి జపమాల ప్రార్థన చేయడం అలవర్చుకోవాలి. డిజిటల్ ప్రచారాలకు గురికాకుండా, దేవుని వాక్యం మరియు ప్రార్థనల ద్వారా మన హృదయాలలో ప్రశాంతతను, సమాధానాన్ని, సంతోషాన్ని, ఆత్మసంతృప్తిని నెలకొల్పుకోవాలి.

2. కులాలు, మతాలు, రాజకీయాలు మరియు సమాజంలో, సంఘములో చిన్న విషయాలకే కోపతాపాలు, విద్వేషాలు, గొడవలు పెరుగుతున్నాయి. ఫాతిమా మాత కోరినట్లుగా, సమాజంలో లేదా పొరుగువారితో వివాదాలు వచ్చినప్పుడు క్రోధాన్ని చూపక, ఓర్పుతో, ప్రేమతో సమాధానపరచాలి. “శాంతి స్థాపకులు ధన్యులు” అన్న వాక్యాన్ని పదేపదే గుర్తుచేసుకుందాం. మన చుట్టూ ఉన్న ఇతర మతాల వారితో, ఇరుగుపొరుగు వారితో క్రీస్తు ప్రేమను ప్రతిబింబించేలా సోదరభావంతో జీవించడానికి ప్రయత్నం చేద్దాం.

3. కుటుంబాలలో చిన్న చిన్న మనస్పర్ధలు, అహం వలన, ఆస్తి తగాదాల వలన, రక్తం పంచుకు పుట్టిన తోబుట్టువులు, అలాగే భార్యాభర్తలు విడిపోతున్నారు. జపమాల ప్రార్థనతో పాటు, పగలు-ప్రతీకారాలు పక్కన పెట్టి ఒకరినొకరు క్షమించుకోవాలి.   ప్రతిరోజూ “ఓ నా యేసువా! మా పాపములను మన్నించండి” అని ప్రార్థించే మనం, మనకు హాని చేసినవారిని కూడా హృదయపూర్వకంగా మన్నించే గుణాన్ని అలవర్చుకోవాలి.

4. నేటి యువత, పిల్లలు లోకసంబంధమైన ఆకర్షణలకు, వ్యసనాలకు త్వరగా లోనవుతున్నారు. (ఆన్‌లైన్ గేమ్స్, బెట్టింగులు, చెడు అలవాట్లు, కొన్నిచోట్ల మత్తుపదార్ధాలు, తాగుడు, జూదం... మొ.వి.). తల్లిదండ్రులు కేవలం పిల్లల చదువులు, భవిష్యత్తు కోసమే కాక, వారి ఆధ్యాత్మిక ఎదుగుదలపై దృష్టి పెట్టాలి. ఫాతిమాలో మరియతల్లి చిన్న పిల్లలైన లూసీ, ఫ్రాన్సిస్, జసింతలను ఎన్నుకున్నట్లే, మన పిల్లలకు కూడా భక్తి, వినయం, నిజాయితి మరియు జపమాల ప్రాముఖ్యతను పసి వయసు నుండే నేర్పించాలి.

5. ఆర్థిక ఇబ్బందులు, అనారోగ్యాలు, ఒంటరితనంతో బాధపడేవారు మన చుట్టూ ఎందరో ఉన్నారు. ప్రార్థన కేవలం పెదవులకే పరిమితం కాకుండా క్రియలలో కనిపించాలి. మన గ్రామంలో లేదా ఇరుగుపొరుగున ఉన్న పేదలకు, వృద్ధులకు, వ్యాధిగ్రస్తులకు మనకు తోచిన రీతిలో సహాయం చేయడం ద్వారా క్రీస్తు ప్రేమను కార్యాచరణలో చూపించాలి.

ప్రియమైన విశ్వాసులారా! నేటి కాలంలో మన చేతుల్లో స్మార్ట్‌ఫోన్‌లు ఎంత సహజమైపోయాయో, మన హృదయాలలో ‘జపమాల’ అంతకంటే ఎక్కువగా భాగం కావాలి. సోషల్ మీడియాలో సమయం గడిపే మనం, దేవుని సన్నిధిలో జపమాల చెప్పడానికి సమయం కేటాయిద్దాం. మన ఇళ్లలో శాంతిని, మన పొరుగువారితో ప్రేమను, మన పిల్లలలో భక్తిని పెంపొందించుకోవడమే ఫాతిమా మాత మనకు ఇస్తున్న నిజమైన ఆచరణాత్మక సందేశం!

సకల సమస్యలకూ... సహాయకమాత కన్య మరియ!

 సకల సమస్యలకూ... సహాయకమాత కన్య మరియ!

కన్య మరియ తల్లిని గూర్చి... ఎన్ని ప్రసంగాలు చేసినా! ఎన్ని సందేశాలు వ్రాసినా! చాలా తక్కువే! ఆమెను గూర్చి చెప్పాలంటే, పరిశుద్ధాత్మ దేవుని ద్వారా, ఎవరికివారు తెలుసుకోగలగాలి. తల్లి కన్య మరియ గొప్పతనము, కన్య మరియమాత ధన్యత చాలా ప్రత్యేకమైనది. సర్వమానవాళిలో... ఎవరికీ దక్కనిదని చెప్పడంలో ఎటువంటి ఆశ్చర్యం లేదు! దేవుడు కన్య మరియ తల్లికి దయచేసిన ఆశీర్వాదములు కూడా, చాలా ప్రత్యేకమైనవి!
మరియతల్లి! దేవున్ని మాత్రమే కాదు, దేవుని వాక్కును, దేవునికి తన యెడల ఉన్న ప్రణాళికను విశ్వసించి, పాటించి, నెరవేర్చిన గొప్ప భక్తురాలు. స్త్రీలందరిలో… ధన్యత కలిగిన దేవుని మాత వినయం కలిగిన స్త్రీ... కన్య మరియ. ప్రతి స్త్రీ కన్య మరియ మాతను సుమాతృకగా తీసుకోవాలి.

జనులను ఏలే రాజు, నిజ దేవుడు ఐన క్రీస్తు ప్రభువునకు ఆమె తల్లి. జననికి మాత. “స్వచ్ఛమైన తల్లి హృదయం” మరియ మాతలో మనం చూడవచ్చు. జననికి మాత అయిన కన్యమరియ మాతలో, దేవుడు మెచ్చే భక్తి, విశ్వాసము, వినయము, కన్య మరియ మాతస్వభావములో, ఉన్నాయి. కన్యమరియ తల్లిలో ఉన్న అన్ని స్వభావములలో... సంపూర్ణత్వం ఉంది. మానవులముగా పుట్టిన మన స్వభావములలో... అనగా! గుణములో... ఆలోచనలలో.. మాటలలో... క్రియలలో... భక్తిలో... విశ్వాసములో... ప్రవర్తనలో... సంపూర్ణత లేదు. అవసరతలో ఉన్న విశ్వాసులకు సహాయపడటమే కన్య మరియ తల్లి కర్తవ్యం.

“పునీత యోహాను గారు వ్రాసిన సువార్త 2:3-5” కానా పల్లెలో పెండ్లి విందులో, వివాహ వేడుక జరుగుతుండగా, అచట ద్రాక్షారసము తక్కువ పడగా, యేసు తల్లి వారికి ద్రాక్షారసము లేదని, తన కుమారునితో చెప్పి, ఆయన చెప్పినట్లు చేయుడు అని, అక్కడ ఉన్న సేవకులతో తెలియపరచినది. ఆ పెండ్లి విందులో ద్రాక్షారసము కొరత లేకుండా చేసినది. ఎక్కడ లోటు పాట్లు ఉంటే, ఎక్కడ అవసరం ఉంటే, ఎక్కడ ఆందోళన అయితే ఉంటుందో... ఎక్కడ సమస్యలు అయితే ఉంటాయో... ఆ తల్లి అక్కడ ప్రత్యక్షమై సహాయపడుతుంది. ఈ సత్యాన్ని గ్రహించిన విశ్వాసులకు, విశ్వాసముతో జపమాలను ధ్యానించిన ప్రతి ఒక్కరి జీవితాలలో అనేక అద్భుతాలు కలుగజేస్తారు.

అనేక సమస్యలతో కొట్టుమిట్టాడుతున్న సకల మానవాళికీ... “కన్య మరియ మాత! సహాయకమాతగా కొనియాడబడుతున్నారు” అనేక అద్భుతకార్యములు! ప్రతి ఒక్కరి జీవితాలలో జరిపించి, అనేక పేర్లతో మరియ తల్లి ప్రత్యేకతతో, దేవుని వరప్రసాదంతో, కొనియాడబడుతున్నారు.

ఆరోగ్యానికి సంబంధించిన విషయాలలో ఆరోగ్యమాతగా కొనియాడుతున్నారు. వేలాంకని మాతగా నాగపట్నంలో ఎన్నో అద్భుతాలను ఆరోగ్య సమస్యలను, ఆమె ప్రార్థన సహాయం ద్వారా విశ్వాసులకు సహాయపడుతున్నారు. గుణదల మాతగా... గుణదల మాత పుణ్యక్షేత్రాన్ని సందర్శించే విశ్వాసులకు, ఆమె ప్రార్థన సహాయము కోరిన అనేకులకు, గొప్ప కార్యాలను, దేవుని మహిమా ద్వారా... జరిపించి, దేవునికి మహిమను చెల్లిస్తున్నారు. విశ్వాసులకు, ఎవరెవరికైతే అనారోగ్యాలు... ఆరోగ్య సమస్యలు ఉన్నాయో! అటువంటివారు, ఆ మరియ మాత ప్రార్థనా సహాయమును విశ్వాసముతో వేడుకొని, మరియ మాతకు తమ ఆరోగ్య సమస్యలను తెలియపరుస్తున్నారు. ప్రార్థించిన వారందరి విన్నపములను ఆలకించి, తన ప్రియమైన కుమారుని ద్వారా ఎన్నో స్వస్థతలను, అద్భుతాలను, జరిపిస్తున్నారు.

వర ప్రసాదాల మాత ఎవరెవరికి అయితే ఏ ఏ సమస్యలు ఉంటున్నాయో ఉదాహరణకు బిడ్డలు లేని వారు, ఆ తల్లిని సందర్శించి, తమ సమస్యలను తెలిపి, ఆ సమస్యలను పరిష్కరించుకుంటున్నారు. బిడ్డలు లేని వారు బిడ్డలను పొందుకుంటున్నారు. నిత్య సహాయమాత ఏ సమస్యకైనా పరిష్కార మార్గాన్ని! తన కుమారుని వద్ద నుండి, మోసుకుని వచ్చి, మన సమస్యలను తీర్చే దయగల తల్లి మరియ తల్లి. అనేకులు, సాటివారిని నమ్మి, తమ ఆస్తులను కోల్పోతున్నారు. ఎందరో చేతులలో కొందరు బలి అవుతున్నారు. ఎందరో... ఇతరుల ద్వారా శాంతిని కోల్పోతున్నారు. ఇలాంటి వారందరూ... మరియతల్లి సహాయాన్ని కోరినప్పుడు, ఆమె సహాయక మాతగా అందరికీ తన వంతు సహాయాన్ని! నిత్యమూ... ఆ దేవుని ద్వారా మనకు ప్రాప్తింపజేస్తున్నారు. మౌనంగా పెట్టే ఆర్తనాధాలను వినే తల్లి! వినయము గల మరియ తల్లి.

శాంతి మాత శాంతి లేని కుటుంబాలలో శాంతిని ప్రసాదించే దయగల తల్లి మరియమాత. శాంతి సమాధానములు కొరతగా ఉన్న కుటుంబాలలో... సంస్థలలో... ఆమె శాంతిని ప్రసాదించే శాంతి మాత.

వినయములో, విధేయతలో, మరియ తల్లికి మించిన మానవ జీవితం పొందుకున్న వారు ఎవరూ... లేరేమో! అని చెప్పడంలో ఎటువంటి అతిశయోక్తి లేదు. ఈ సంగతి మనకు పవిత్ర బైబులు గ్రంధమే రూఢిపరుస్తున్నది.

పునీత యోహాను గారు రాసిన సువార్త 19:25-27: క్రీస్తు ప్రభువు సిలువ పాటులను మన పాపమున కొరకై భరిస్తున్నప్పుడు, యేసు సిలువ చెంత మరియ తల్లియు, యేసు ప్రేమించిన శిష్యుడును దగ్గర నిలిచియుండుట, యేసు చూచి, యేసు తన తల్లితో, "స్త్రీ ఇదిగో నీ కుమారుడు అనెను. ఆ తరువాత శిష్యునితో ఇదిగో నీ తల్లి అనెను. శిష్యుడు ఆ గడియ నుండి ఆమెను స్వీకరించి, తన సొంత ఇంటికి తీసుకొనిపోయెను. తన బాధను వినయముతో ప్రభుని చెంత ఉండి మౌనంతో భరించిన గొప్పతల్లి మరియ తల్లి. నా కుమారుడైన యేసు మరణించిన తరువాత, తాను పరలోక రాజ్యం చేరుకొనిన తరువాత, తన పరిస్థితిని గూర్చి, ఆమె ఆలోచించలేదు. తన సమస్త బాధ్యతను, బాధను, దుఃఖమును, సమస్తం దేవునికి సమర్పించుకుంది. నిజ దేవుడైన తన ప్రియ కుమారుడే! మౌనంతో, తన సిలువ చెంత ఉన్న, తన తల్లి ఐన కన్య మరియను చూచి, కుమారుడుగా తన తల్లి బాధ్యతను తన ప్రియ శిష్యునికి అప్పగించారు. “తల్లి – తనయుడు” సకల మానవాళి కొరకై నిత్యమూ.... తమ బాధ్యతలను నిర్వర్తిస్తున్నారు. సకల మానవాళి భారాలన్నీ తన భారముగా... భారముల మాతగా తనపై మోసుకుంటూ.... తన ప్రియ కుమారుని చెంత చేర్చి, మన భారాలను తేలికచేస్తున్నారు.

విశ్వాసులు అందరూ... జపమాలను ధ్యానించి, వినయముతో, విధేయతతో, దేవుని యెడల భక్తి విశ్వాసములతో జీవిస్తూ... ఆ తల్లి ఆశ్రయమును పొందుకొని, తమ తమ జీవితాలలో అనేక మేలులను పొందుకొని సాక్షులుగా నిలవాలని ఈ ప్రత్యేక సందేశం మీ ముందుకు తీసుకురావడం జరిగింది. ప్రతి ఒక్కరూ భక్తితో ఏకాంతముగా జపమాలను ధ్యానించండి. మరియూ... సమిష్టి జపమాల ప్రార్ధనకు దేవాలయమునకు వెళ్లి, విశ్వాసులు అందరితో జపమాలను జపించండి. కన్య మరియతల్లి! ప్రతి కుటుంబమును... ప్రతి వ్యక్తి సమస్యలను రూపుమాపునుగాక! జపమాల మాత సకల సమస్యలకు సహాయకమాత! కన్యమరియ మాతా! మా కొరకు ప్రార్ధించమ్మా అని, మనమందరము వేడుకొని ఆ తల్లి దీవెనలను పొందుకుందాం. తల్లి మరయ ద్వారా, మోసుకొచ్చిన! ఆ దేవుని ఆశీర్వాదములను, పొందుకొని దేవునికి సాక్షులముగా నిలుద్దాం. ఆమెన్.

అస్సీసిపుర ఫ్రాన్సిస్ 800వ మరణ వార్షికోత్సవం: ‘సోదరి మరణం’ - ఒక ఆధ్యాత్మిక పండుగ

 అస్సీసిపుర ఫ్రాన్సిస్ 800వ మరణ వార్షికోత్సవం: ‘సోదరి మరణం’ - ఒక ఆధ్యాత్మిక పండుగ

గురుశ్రీ ప్రవీణ్ గోపు, కపూచిన్

రెక్టర్, వియాన్ని కాలేజి, జానంపేట (ఏలూరు)

పునీత అస్సీసిపుర ఫ్రాన్సిస్ గారు 1226 అక్టోబర్ 3న స్వర్గస్తులయ్యారు. శ్రీసభ ప్రతి ఏటా అక్టోబర్ 4న ఫ్రాన్సిస్ గారి మహోత్సవాన్ని ఎంతో భక్తిశ్రద్ధలతో జరుపుకుంటుంది. 2026 నాటికి వారు ధన్యమరణం పొంది 800 సంవత్సరాలు పూర్తవుతున్న సందర్భంగా, జగద్గురువులు పొప్ లియో XIV గారు, ఈ సంవత్సరాన్ని ప్రత్యేకంగా “ఫ్రాన్సిస్ జూబిలీ సంవత్సరం”గా ప్రకటించారు. మరణానికి రెండేళ్ల ముందు, అనగా 1224లో, ఫ్రాన్సిస్ గారు అల్వెర్నా కొండపై ప్రార్థిస్తుండగా, క్రీస్తు పంచగాయాలను శరీరంపై పొందుకున్నారు. శారీరక వేదన అనుభవిస్తున్నప్పటికీ ఆయన దైవానందంలో మునిగిపోయారు. క్రీస్తు శ్రమలలో ఆయన ఎంతగా భాగస్వామి అయ్యారో చెప్పడానికి గొప్ప నిదర్శనం!

పరివర్తన నుంచి పవిత్రత వైపు: మారుమనస్సు పొందక ముందు ఫ్రాన్సిస్ ‘యోహాను/జాన్’గా పిలువబడేవారు. ఇటలీ దేశంలోని అస్సీసిపురములో ఒక ధనిక బట్టల వ్యాపారి కుమారుడైన ఆయన, గొప్ప యోధుడిగా ఎదగాలని కలలు కన్నారు. అయితే ఒక యుద్ధంలో ఖైదీగా చిక్కి, చెరసాలలో తీవ్ర అనారోగ్యానికి గురైనప్పుడు, ఆయన అంతరంగంలో గొప్ప పరివర్తన మొదలైంది. కుటుంబ ఆస్తినంతటినీ త్యజించి, స్వచ్ఛంద పేదరికంలో క్రీస్తు నిజమైన శిష్యునిగా జీవించాలని నిర్ణయించుకున్నారు.

సంఘం నుండి వెలివేసిన వారికి, పేదలకు, ముఖ్యంగా కుష్ఠురోగులకు సేవ చేయడమే తన జీవిత సేవగా మలుచుకున్నారు. కుష్ఠురోగులను ఆలింగనం చేసుకోవడం ద్వారా సకల మానవాళిని గౌరవించడమే కాక, సృష్టిలోని ప్రతి జీవితో సోదరభావాన్ని పెంపొందించుకున్నారు.

1219లో ఈజిప్టు సుల్తాన్‌ను కలసి శాంతి సందేశాన్ని బోధించడం వారి అహింసా మార్గానికి గొప్ప నిదర్శనం. “ఓ ప్రభువా! నన్ను నీ శాంతికి సాధనంగా చేయుము...” అనే ప్రసిద్ధ ప్రార్థన ఫ్రాన్సిస్ గారి ఆత్మసౌందర్యానికి ప్రతీకగా నిలుస్తుంది. ఆయన నిరాడంబర జీవితాన్ని చూసి ఎంతోమంది అనుసరించడంతో ‘చిన్న సహోదరుల సంఘం’ ఆవిర్భవించింది.

‘మరో క్రీస్తు’గా ఫ్రాన్సిస్: సువార్తను అక్షరాలా జీవించిన ఫ్రాన్సిస్‌ గారిని చరిత్రకారులు ‘మరో క్రీస్తు’ అని పిలిచారు. “క్రీస్తు లేకుండా ధనవంతునిగా ఉండడం కంటే, క్రీస్తు కొరకు నిరుపేదగా ఉండడమే మేలు” అని విశ్వసించిన ఆయన, తన సిలువను ఎత్తుకొని ప్రభువును అనుసరించారు. తన మరణావస్థలో కూడా సహోదరులతో, “ఇప్పటి వరకు మనం ఏమీ చేయలేదు, దేవుని సేవించడం ఇప్పటికైనా మొదలుపెడదాం” అని పలికిన వారి ధ్యాస అంతా క్రీస్తు వలె జీవించడమే.

మరణం పట్ల ఫ్రాన్సిస్ దృక్పథం - ‘సోదరి మరణం’: సాధారణంగా లోకంలో మరణం అంటే భయం, దిగులు. అంధకారం, అనివార్యమైన శోకం. కానీ ఫ్రాన్సిస్ గారికి మరణం ఒక భయానక ముగింపు కాదు, అది పరలోక తండ్రి వద్దకు చేర్చే ఒక మధురమైన నిత్యజీవ ద్వారం. సృష్టిలోని సూర్యుడిని “సోదరుడు” అని, చంద్రుడిని “సోదరి” అని ఎంత ఆప్యాయంగా సంబోధించారో, జీవిత చరమాంకంలో ఎదురయ్యే మరణాన్ని కూడా “సోదరి మరణం” అని ఎంతో ప్రేమగా, పవిత్రంగా పిలిచారు.

పాపంలో జీవించేవారికి మరణం భయంకరమైనదే అయినప్పటికీ, దేవుని చిత్తాన్ని నెరవేర్చేవారికి అది పరలోక తండ్రి వద్దకు చేర్చే ఒక మిత్రుని లాంటిదని వారు నమ్మారు. మరణ పడకపై ఉన్నప్పుడు కూడా భయపడకుండా, “నా సోదరి మరణమా! నీకు స్వాగతం” అని పాడుతూ ఆనందంగా ధన్యమరణాన్ని పొందారు. దేవుని ఉనికిని ప్రతీక్షణం అనుభవించిన వ్యక్తికి మరణం కూడా ఒక పండుగేనని వారి జీవితం నిరూపించింది.

ఫ్రాన్సిస్ గారి ఈ విలక్షణమైన దృక్పథం వెనుక మూడు ప్రధాన ఆధ్యాత్మిక సత్యాలు ఉన్నాయి:

సృష్టిలోని ప్రతిదీ దేవుని బహుమానమే: ఫ్రాన్సిస్ గారి దృష్టిలో పుట్టుక ఎంత సహజమైనదో, మరణం కూడా అంతటి సహజ సిద్ధమైన దైవిక క్రమమే. భౌతిక దేహాన్ని వీడి, ఆత్మ దేవుని సాన్నిధ్యంలోకి ప్రవేశించే ఈ ప్రక్రియను ఆయన భయంతో కాక, విశ్వాసంతో స్వీకరించారు. మరణం మన భూమిపై ప్రయాణానికి ముగింపు కాదని, అది నిత్యత్వంలోనికి నడిపించే ఒక ఆశీర్వాదకరమైన మార్గమని వారు నమ్మారు.

‘సృష్టించబడినవాటిపై కీర్తన’ - ఆధ్యాత్మిక శిఖరాగ్రం: తన జీవిత చరమాంకంలో, తీవ్రమైన శారీరక వేదన, అంధత్వం ఆవహించిన సమయంలో ఫ్రాన్సిస్ గారు ఈ ప్రసిద్ధ కీర్తనను రచించారు. చివరి ఘడియల్లో ఆయన ఈ గీతానికి మరో చరణాన్ని చేర్చారు: “మా శారీరక సోదరి మరణాన్ని బట్టి, ఓ నా ప్రభూ! నీకు స్తుతి కలుగును గాక! జీవించి ఉన్న ఏ మానవుడు కూడా దీని నుండి తప్పించుకోలేడు...”

పాపంలో జీవిస్తూ, దేవునికి దూరమైన వారికి మరణం భయంకరమైనదే కావచ్చు. కానీ, దేవుని చిత్తాన్ని నెరవేరుస్తూ, క్రీస్తు ప్రేమలో జీవించేవారికి శారీరక మరణం ఎలాంటి హాని చేయలేదు. అది క్రీస్తు నిత్య మహిమలోకి ప్రవేశపెట్టే ఒక మిత్రుని వంటిదని ఆయన చాటిచెప్పారు.

దిగంబరంగా క్రీస్తును అనుసరించడం: ఫ్రాన్సిస్ గారు మరణించే కొద్ది క్షణాల ముందు, తనను నేలపై దిగంబరంగా పడుకోబెట్టమని తన సహోదరులను కోరారు. ఈ లోకంలోకి ఖాళీ చేతులతో వచ్చిన మానవుడు, తిరిగి వెళ్లేటప్పుడు కూడా సమస్తాన్ని వదిలి దిగంబరంగానే దేవుని ముందుకు వెళ్లాలనే పరిపూర్ణ సమర్పణ భావాన్ని ఇది సూచిస్తుంది.

మనకో సవాలు... ఒక ఆహ్వానం!: ఈ 800ల సంవత్సరాల జూబిలీ సందర్భంగా ఫ్రాన్సిస్ గారి జీవితం మనల్ని ప్రశ్నిస్తోంది: ఆయన నడచిన త్యాగమార్గంలో నడవడానికి, భిన్నంగా ఆలోచించడానికి నీవు ధైర్యం చేయగలవా? మన కుటుంబాన్ని, శ్రీసభను, ఈ సమాజాన్ని క్రీస్తు ప్రేమతో పునర్నిర్మించడానికి సిద్ధంగా ఉన్నావా?

రండి, ఫ్రాన్సిస్ గారి జీవన స్ఫూర్తితో మన నుండి మార్పును ప్రారంభిద్దాం. ఈ లోకాన్ని మరింత మానవత్వంతో, ప్రేమతో నింపుదాం.

ప్రార్థన: ఓ పునీత ఫ్రాన్సిస్ గారా! సిలువ ముందు నిలబడడం ఎలాగో మాకు నేర్పించండి. సిలువ వేయబడిన క్రీస్తు ప్రేమపూర్వక దృష్టి మాపై పడేలా చేసి, ఆ చూపులో మేము లీనమయ్యేలా సహాయం చేయండి. క్రీస్తు ప్రేమ ద్వారా మేము క్షమించబడి, నూతన సృష్టిగా మారడానికి మాకు మార్గదర్శకత్వం వహించండి. ఆమెన్.

 

సకల మృతుల స్మరణ

 సకల మృతుల స్మరణ

నవంబరు 2న సకల మృతులను స్మరించుకుంటున్నాము. మరణించిన సకల విశ్వాసుల సంస్మరణము. సకల ఆత్మల పండుగ. సమాధుల పండుగ! ఈ సందర్భముగా, మొట్టమొదటిగా, మరణం అంతం కాదని గుర్తుచేసుకుందాం! భూలోకములో జీవించి మరణించిన సకల విశ్వాసులను కొనియాడుచూ, ఉత్థానముపట్ల ఒక గొప్ప నిరీక్షణను, నమ్మకమును మనము కలిగియున్నామని గుర్తించుదాం! “మంచి జీవితమును జీవించి మరణించినవారి ఆత్మలు దేవునిచెంత కొలువై యుండును. వారు శాంతిని బడయుదురు. వారు అమరత్వమును పొందెదరు. వారు కలకాలము దేవుని సన్నిధిలో ఉండెదరు” అని సొ.జ్ఞా. 3:1-9లో చదువుచున్నాం. అందుకే మనము మరణించిన మన ఆప్తులపట్ల, మరణించిన సకల విశ్వాసులపట్ల, ఈ గొప్ప నమ్మకాన్ని కలిగి యుంటున్నాము.

పరలోకం మన జీవితాలకు గమ్యం. కనుక మనము దేవున్ని నమ్ముకుంటూ, ఆయనను విధేయిస్తూ, నీతిగల జీవితాన్ని జీవించాలని పిలువబడుచున్నాము. దైవస్నేహములో జీవించగలిగినట్లయితే, పరలోకమున ఆయన సన్నిధిలో మనం కలకాలం జీవించగలము. కనుక, మరణం అంతం కాదు, ఆరంభం మాత్రమే! మనం శాశ్వతముగా దేవునిలో ఐఖ్యమై జీవించాలన్నదే దేవుని కోరిక కూడా! దేవుడు తన ఈ కోరికను తన కుమారుడైన యేసుక్రీస్తుద్వారా మనకు అందిస్తున్నారు. ఈ గొప్ప నిరీక్షణను, నమ్మకాన్ని క్రీస్తులో కనుగొను చున్నాము. క్రీస్తు తన మరణము, ఉత్థానములద్వారా నిత్యజీవితమును ఒసగుచున్నాడు. “క్రీస్తు రక్తము వలన మనము ఇప్పుడు దేవుని ఎదుట నీతిమంతులమైతిమి” అని రోమీ 5:9లో చదువుచున్నాం. “ఇపుడు క్రీస్తుద్వారా సమాధానము పొందిన మనము ఆ క్రీస్తు ద్వారా దేవునిలో ఆనందింతుము” అని రోమీ 5:11లో చదువుచున్నాం. దేవుడు క్రీస్తుద్వారా మన పాపములను క్షమించుచున్నాడు. తనతో సమాధానపరచు కొనుచున్నాడు. కనుక క్రీస్తుద్వారా పరలోకమునకు చేరు గొప్ప నమ్మకముతో మనము జీవిస్తున్నాము. ఈ నమ్మకము నెరవేరాలంటే, మనం క్రీస్తును రక్షకునిగా విశ్వసించాలి.

యోహాను 6:40 - “కుమారుని చూచి విశ్వసించు ప్రతివాడు నిత్యజీవమును పొందుటయే నా తండ్రి చిత్తము. అంతిమదినమున నేను వానిని లేపుదును.” ఆయన దగ్గరకు వచ్చువారికి శాశ్వత జీవమును ఒసగును. కనుక దేవుడు మనకొసగు రక్షణను పొందాలంటే, క్రీస్తును సంపూర్ణముగా విశ్వసించుటద్వారా, మనము దేవునికి ప్రతిస్పందించాలి. ఈవిధముగా, శాశ్వత జీవితమునకు విశ్వాసము, అది క్రీస్తునందు విశ్వాసము ఎంతో ప్రాముఖ్యమని అర్ధమగుచున్నది. కనుక, మరణించిన వారి నిరీక్షణ, నమ్మకం వారి విశ్వాసముపై ఆధారపడి ఉంటుంది.

కాబట్టి, అన్నింటికీ విశ్వాసమే మూలాధారము. ఈ లోక జీవిత యాత్ర ముగిసిన తరువాత నేను నిత్యజీవమునకు చేరుకుంటాను అనే విశ్వాసము ప్రతి ఒక్క క్రైస్తవ విశ్వాసికి ఉండాలి. మానవుని జీవితానికి మరణము తప్పనిసరి. మరణము తర్వాత జీవితం చాలా ప్రధానమైనది. ఈ సృష్టిలో దేవుడు సృష్టించిన ఏ జీవికీ కూడా మరణించిన తర్వాత పునరుత్థానము లేదు; కేవలం దేవుని రూపంలో సృష్టించబడిన మానవునికి మాత్రమే అది ఉంది. మరణము తరువాత నిత్యజీవము ఉంది! దేవుని దగ్గర పరలోక రాజ్యములో మహిమ శరీరముతో చేరుకుంటాము. దేవునితో పాటు కలిసి జీవించే ధన్యతను పొందుకోవడమే నిత్యజీవము అంటే. దేవుణ్ణి, దేవదూతలతో పాటు నిత్యజీవమునకు చేరుకున్న మనమూ దేవుణ్ణి స్తుతిస్తూ, నిత్యమూ దేవుని వద్ద పరలోక రాజ్యములో ఉండిపోవడమే నిత్యజీవము!

మరణం అంటే ప్రతి క్రైస్తవ విశ్వాసి ఒక గొప్ప వరంగా భావించాలి. ఎందుకంటే, మరణం తర్వాత దేవునితో కలిసి జీవించే నిత్యజీవము ఉంది. కాబట్టి, మరణానికి భయపడకుండా ‘మరణానంతరము తిరిగి మరలా నేను మహిమ శరీరముతో లేస్తాను’ అనే సంతోషము క్రైస్తవ విశ్వాసులందరిలోనూ ఉండాలి.

మన బంధువులు, తల్లిదండ్రులు, ఆప్తులు లేదా స్నేహితులు మరణిస్తే, వారిని చూచి బాధపడి తిండి తిప్పలు మానేసి దిగులుతో కుంగిపోవడం కాదు. మరణించిన వారికి ఇప్పటికైనా దేవుని వద్ద నిత్య విశ్రాంతి, నిత్యజీవము లభించబోతుందని నమ్మి, దేవునికి వారిని గూర్చి మరింతగా ప్రార్థించాలి. దేవునియందు భయభక్తులతో, విశ్వాసంతో, ఆయన అనుసరణలో జీవించగలగాలి.

మృతుల కొరకు ప్రార్ధన: మరణించిన సకల విశ్వాసుల సంస్మరణ అనేది క్యాతలిక్కులు మాత్రమే జరుపుకొనే ఒక ముఖ్యమైన, ప్రాముఖ్యమైన వేడుక. మరణించినవారి ఆత్మల కొరకు ప్రార్థించడం ఆత్మలకు ఎంతో మేలు. దైవ రాజ్యానికి చేరుకోవడానికి మన ప్రార్థన, అలాగే మరణించినవారి ఆత్మల కొరకు పూజ (దివ్య బలిపూజ) పెట్టించడం చాలా ప్రధానము. మరణించిన ఆత్మల కొరకు మనం ప్రార్థించడం, పూజలు చేయించడం వారి ఆత్మలను దేవుని సన్నిధికి చేర్చడానికి ఎంతగానో ఉపయోగపడతాయి. ప్రార్థనకు అతీతమైన శక్తి ఉంది. మరణించిన వారిని సైతం తిరిగి లేపగలిగిన శక్తి ప్రార్థనకు ఉంది. కనుక మరణించిన ఆత్మల కొరకు మనం ప్రార్థించి, పూజలు జరిపిస్తే, దేవుడు ఆ ప్రార్థనలను తన సన్నిధికి చేర్చుకొని, వాటికి ప్రతిఫలంగా ఆత్మలకు ముక్తిని దయచేస్తారు.

ఈరోజు ప్రత్యేకముగా సకల ఆత్మల కొరకు అనగా మన ఆప్తుల కొరకు మాత్రమేగాక, సకల ఆత్మల కొరకు, ముఖ్యముగా దిక్కులేని ఆత్మల కొరకు అనగా ప్రార్ధించడానికి ఎవరులేని ఆత్మల కొరకు, వారి నిత్యవిశ్రాంతి కొరకు ప్రార్ధన చేస్తాము. కతోలిక విశ్వాసం ప్రకారం మరణించిన కొందరి ఆత్మలు వారు జీవించిన జీవితమును బట్టి – అనగా పాపాత్ములు, పరలోకమునకు వెళ్లకముందు శుద్ధీకరణ పొందవలసి ఉంటుంది. అలాంటి ఆత్మలు శుద్ధీకరణ పొంది నిత్యవిశ్రాంతిని పొందాలంటే, భూలోకములోనున్న ఆత్మలు అనగా మనము వారికొరకు ప్రార్ధన చేయాలి, దానధర్మాలు చేయాలి, పూజలు పెట్టించాలి. పాత నిబంధన గ్రంథములోకూడా, మరణించిన వారికొరకు దేవాలయములో ప్రార్ధనలు చేసారు, పాపపరిహార బలిని అర్పించారు (2 మక్క 12:42-46).

ఈ సంప్రదాయమును అనుసరించి, క్రైస్తవులుకూడా ఆరంభమునుండి, ఈనాటి వరకుకూడా మరణించిన వారి కొరకు ప్రార్ధనలు చేసే సంప్రదాయాన్ని కొనసాగిస్తూ వస్తున్నారు. ప్రారంభంనుండి శ్రీసభ చనిపోయిన వారిని భక్తిమంతముగా స్మరించి గౌరవిస్తూ వస్తున్నది. వాళ్ళ విముక్తికోసం ప్రార్ధనలు అర్పిస్తున్నది. మరీముఖ్యముగా వారికోసం దివ్యపూజలు జరుపుతూ వస్తున్నది. ఈ భక్తి క్రియల మూలముగా వారు శుద్ధులై దైవదర్శనం చేసుకోగలుగుతారని శ్రీసభ నమ్మకం. వారికోసం దానధర్మాలు, పరిపూర్ణ ఫలాలు, ప్రాయశ్చిత్త కర్మలు శ్రీసభ ప్రోత్సహిస్తుంది (కతోలిక శ్రీసభ సత్యోపదేశం, 1032). కనుక, మరణించిన సకల విశ్వాసుల ఆత్మల కొరకై, మనమందరమూ ప్రార్థించుదాం!

మరణించిన వారు సజీవులగుదురు అని విశ్వసిద్దాం! చాలా కొద్దిమంది మాత్రమే, పాపమునుండి పరిపూర్ణముగా శుద్ధీకరింపబడినవారిగా మరణించి దేవుని రాజ్యములో (పరలోకము) ప్రవేశించెదరు. చాలామంది పాపములోనే మరణిస్తూ ఉంటారు. అలాంటి వారి ఆత్మలు శుద్ధీకరింపబడాలి. దేవుని దయగల ప్రేమాగ్నిలో వారి పాపాలు దహింపబడాలి. ఇదియే ఉత్తరించు స్థలముగా తల్లి శ్రీసభ బోధిస్తున్నది. “పరలోకమునకు ముందు గది” (ante-chamber) అని చెప్పవచ్చు! “క్షాళన స్థలం” లేదా “శుద్ధీకరణ స్థలం” అని సత్యోపదేశంలో చెప్పబడింది. పూర్తిగా శుద్ధిపొందలేనివారు ఉంటారు. అయితే వారికికూడా నిత్యరక్షణ లభిస్తుందని హామీ ఉన్నది. పరలోకములో ప్రవేశించడానికి పవిత్రత అవసరం. ఈ పవిత్రతను సాధించడానికి ప్రక్షాళన అవసరం (కతోలిక శ్రీసభ సత్యోపదేశం, 1030-31). ఉత్తరించు స్థలములోనున్న ఆత్మలు వారంతట వారు ప్రక్షాళన గావించలేరు. కనుక వారు బ్రతికియున్న మనపై ఆధారపడి ఉండెదరు. కనుక మన ప్రార్ధనలు, అర్పణలు, పూజలు, వారి ప్రక్షాళనకు ఎంతో అవసరము!

చనిపోయిన ఆత్మలు, మన ప్రార్థన కొరకు, దీనతతో ఎదురు చూస్తూ ఉంటారు. కనుక మనమందరమూ.... దిక్కులేని ఆత్మల కొరకు, మన బంధువుల, ఆప్తుల, స్నేహితుల, మొదలైనవారి ఆత్మల కొరకు ప్రార్థించుదాం. ప్రార్థనకున్న శక్తి, ప్రార్థనా ఆశీర్వాదములకున్న బలం, మరణించిన వారిని సైతం జీవవంతులను చేయును.

సమాధుల సందర్శన: నేడు శ్రీసభ పూర్వుల సమాధులను సందర్శించి ప్రత్యేకముగా వారి ఆత్మల నిత్యవిశ్రాంతి కొరకు ప్రార్ధన చేస్తుంది. వీలున్నచోట్ల సమాధులవద్దే దివ్యబలిపూజ అర్పించబడుతుంది. ఈరోజు మన ప్రార్ధనలన్నియుకూడా సకల ఆత్మల కోసం అర్పించబడుచున్నాయి. సమాధుల చెంత ప్రార్ధన చేయుచుండగా మన మరణం గురించికూడా ధ్యానించాలి. మన మరణం గురించి ధ్యానించడం విచారకరమైనది ఎంతమాత్రమును కాదు! ఇంకా ఎన్ని రోజులు మనకి ఇవ్వబడినాయో మనకు తెలియదు! జీవించిన ప్రతీరోజు ప్రభువును ప్రేమించాలి. అలాగే మనము ప్రభువుచేత ప్రేమింపబడాలి. అందులకు ఈ ఆత్మపరిశీలన తప్పక తోడ్పడుతుంది.

చనిపోయిన మన బంధువులు, ఆప్తులు, స్నేహితులు, కుటుంబ సభ్యుల కొరకు ప్రార్థించుట మన బాధ్యత! వారు జీవించిన కాలంలో, తెలిసి... తెలియక... చేసిన పాపములకు కాను, క్షమాపణ కొరకు, వారు పరలోక రాజ్య ప్రవేశం కొరకు, ఆ దేవాధిదేవున్ని వేడుకొనుచూ... మొర పెడుతూ... ప్రార్థించుదాం!

“నేనే పునరుత్థానమును జీవమును; నన్ను విశ్వసించువాడు మరణించినను జీవించును” అని ప్రభువే స్వయంగా చెప్పియున్నారు. ప్రతి క్రైస్తవుడు/క్రైస్తవురాలు క్రీస్తును విశ్వసించినవారే! అట్టి ఆత్మలు దైవరాజ్యమునకు చేరును. మనము కూడా ఈ సకల ఆత్మల వేడుక రోజున ఆత్మల కొరకు ప్రార్థిద్దాం!

ముగింపు: పూలతోటలో, మనకు ఇష్టమైన, అందమైన పూలు కోయబడినప్పుడు మనకి ఎంతో బాధ, దు:ఖము కలుగుతుంది. కాని, = పూలతోట అధికారి వాటిని కోసి, వాటిని తగిన స్థలములో ఉంచినప్పుడు, ఆనందిస్తాము. అలాగే, జీవితమనే అందమైన ఈ పూలతోటలో, అందమైన పూలలాంటి మన ఆప్తులు మరణించినప్పుడు మిక్కిలిగా బాధపడుతూ ఉంటాము. కాని ఈ జీవితాలకు సృష్టికర్త అయిన దేవుడే స్వయముగా వారిని పిలచి, వారికి తన రాజ్యములో తగిన స్థానమును ఒసగినప్పుడు మనము మిక్కిలిగా సంతోషించాలి. వారు దేవుని సమక్షములో క్షేమముగా ఉన్నారని భావించాలి. మనం కూడా రేపు ఆ పరలోక తోటలో దేవుని సన్నిధిలో చేరేవారమే అనే సంతోషంతో ఈ భూమిపై మన జీవితాన్ని అర్థవంతంగా గడుపుదాం

అలాగే, ఈనాడు సకల విశ్వాసుల, మృతుల స్మరణ రోజున, మనము, నేర్చుకోవల్సింది ఏమిటంటే, మనం బ్రతుకుతున్న రోజులలో, మనము నిత్యమూ దేవునియందు భయభక్తులతో జీవించగలగాలి. మన కష్టసుఖాలనెడి మన కాడిని, అంటే మన భారములను కష్టసుఖాలయందు, మోసుకొనుచూ, దేవున్ని అనుసరించగలగాలి. అప్పుడు మన బాధలు, భారాలు, తేలికవుతాయి. బరువైన భారాలతో దేవుని వద్దకు వెళ్తే, మన బరువులను, దేవుడు తేలిక చేస్తారు. మన ఆత్మలను కేవలం పరలోక రాజ్యానికే చేర్చాలి. లేకపోతే దేవునికి దూరమై నరకంలో కలిసిపోతాం అనే భయము, భక్తి, ఆందోళన, చింత, మన బ్రతుకు దినములలో, చేయు కార్యముల యందు ఉండాలి. నిత్యము దేవున్ని ఆనుకొని, మన సిలువను మనం మోసుకుంటూ, దేవుని అనుసరించే జీవన విధానము అలవరచుకుందాం. మరణించిన వారి కోసం ప్రార్థించడం ఎంత ముఖ్యమో, మనతో పాటు జీవిస్తున్న తోటి మనుషులను క్షమించడం, ప్రేమించడం కూడా అంతే ముఖ్యం!

ప్రియ సహోదరీ సహోదరులారా! విశ్వాసముతో, నమ్మకముతో, సకల ఆత్మల నిత్యవిశ్రాంతి కొరకు ప్రార్ధన చేద్దాం. ఉత్తరించు స్థలములోనున్న ఆత్మల ప్రక్షాళన కొరకు ప్రార్ధన చేద్దాం. దేవుడు తన దయగల ప్రేమతో, వారిని కనికరించి, పాపవిముక్తిని గావించి తన స్వర్గ రాజ్యములో వారిని చేర్చుదురుగాక. ఆమెన్.

పితా, పుత్ర, పరిశుద్ధాత్మ నామమునకు మహిమ కలుగునుగాక! ఆమెన్.

సకల పునీతుల పండుగ

 సకల పునీతుల పండుగ

దర్శన గ్రంధము 7:9వ వచనాన్ని ఆలకించుదాం, “అచట ఒక గొప్ప జనసమూహము ఉండెను. ఆ జనసంఖ్య లెక్కకు మిక్కుటముగా ఉండెను. అందు అన్ని జాతుల వారును, అన్ని తెగలవారును, అన్ని వర్గములవారును, అన్ని భాషలవారును కలిసి ఉండిరి. వారు సింహాసనమునకు, గొర్రెపిల్లకును ఎదురుగా నిలిచిరి. వారు తెల్లని దుస్తులు వేసుకొని ఉండిరి. చేతులయందు ఖర్జూరపు మట్టలను పట్టుకొని ఉండిరి.”

నవంబరు ఒకటవ తేదీన, శ్రీసభ, సకల పునీతుల పండుగను ఘనంగా కొనియాడుతుంది. ‘సకల పునీతులు’ అంటే ఎవరు? అనే, ఆలోచన మనలో కొందరికి వస్తూ ఉంటుంది! ‘వీరు జీవించిన జీవితములో, దేవునికి ఇష్టమైన జీవితమును జీవించి, దేవున్ని అనుసరించి, దేవుని కొరకు ఎన్నో శ్రమలను భరించి, మరణించిన వారు సకలపునీతులు. సకల పునీతులందరూ మోక్షం చేరుకున్నవారు’. పునీత మత్తయి గారు వ్రాసిన సువార్త 5:12 - “మీకు ముందు వెలసిన ప్రవక్తలను సైతము ప్రజలట్లే హింసించిరి. పరలోకములో మీకు గొప్పబహుమానము గలదు. కావున మీరు ఆనందపడడు, మహాదానందపడుడు.”

పవిత్రమైన, దేవుని అనుసరణ కలిగి జీవించి, మరణించిన వారు పునీతులు! వీరు మరణించిన వెంటనే, తిన్నగా పరలోక రాజ్యమునకు చేరుకుంటారు. అనగా పునీత పట్టా ఇవ్వబడినా, ఇవ్వబడకున్నా, పరలోకంలో దేవుని సమక్షంలో, సంతోషంగా ఉన్న వారందరినీ స్మరించుకొను పండుగ సకల పునీతుల పండుగ! దేవుని పిలుపునకు “ఇదిగో ప్రభువు దాసురాలను, నీ మాట చొప్పున నాకు జరుగును గాక” అని సంపూర్ణంగా తనను తాను సమర్పించుకున్న పరిపూర్ణ పునీతురాలికి నిలువెత్తు రూపం మరియమ్మ! జీవితాంతం పాపిగా బతికినా, చివరి క్షణంలో తన తప్పు తెలుసుకొని యేసు వైపు తిరిగి, “యేసూ! నీ రాజ్యములో నన్ను జ్ఞాపకము చేసుకొనుము” అనగానే అదే రోజు పరలోకానికి చేరిన తొలి పునీతులలో ఒకడు, ప్రభువుతో సిలువవేయబడి పశ్చాత్తాపపడిన వ్యక్తి! పాపులందరికీ సకల పునీతుల పండుగ ఇస్తున్న గొప్ప నిరీక్షణ! మత్త 5:8 – “నిర్మల హృదయులు ధన్యులు, వారు దేవుని దర్శింతురు.”

శ్రీసభ సకల పునీతుల పండుగను, క్రీస్తు శకం 8వ శతాబ్దమునుండియే జరుపుకుంటుంది. నాలుగవ గ్రెగోరి పోపుగారు, రోమునగరంలో నవంబరు ఒకటవ తేదీన సకల పునీతుల పండుగను జరిపి, మరుసటి సంవత్సరం నుండి విశ్వశ్రీసభ అంతటా, సకల పునీతుల పండుగను జరుపుకొనే విధముగా ఏర్పాటు చేసారు. అప్పటినుండి మనమందరమూ... సకల పునీతుల పండుగను జరుపుకొనుచున్నాము.

మనకు తెలియని, దేవుని దృష్టిలో ఉన్నవారు అనేకులు పునీతులైన వారు, ఈ సకల పునీతులు! మనతోనే, కలిసి జీవించి, దేవుని వద్ద ధన్యత్వమును పొందుకొని, దేవునితో, నిత్యజీవితంలో నిత్యానందమున చేరుకున్న వారే, ఈ సకల పునీతులు.

సకల పునీతులలో మనకు తెలిసిన వారి కన్నా, తెలియని వారు అనేకులు. ఎవరి జీవిత రహస్యాలు ఏమిటో మనకు తెలియదు. దేవునికి మాత్రమే తెలుసు! మొదట పాపులుగా జీవించి, తర్వాత దేవున్ని తెలుసుకొని, పశ్చాతాపం ద్వారా, వారి పాపములను కడిగి వేసుకొని, మనకు తెలియని మంచివారు పునీతులైన వారు ఎందరో, పునీతులుగా, దేవుని దగ్గరకు చేరుకొనియున్నారు. దేవునికి ఇష్టమైన జీవితం జీవించి, దేవుని అనుసరణలో ఆయన అడుగుజాడలలో, ఆయన చూపిన మార్గంలో జీవించి, తమకున్న జీవితాన్ని మొత్తం, దేవుని ఇష్టమైన కార్యాలకు ధారపోసి, ఆ విధముగా జీవించి, ఆయన కొరకు మరణించి, తమ జీవితాలను త్యాగం చేసుకున్న వారందరూ పునీతులే!

అయితే మరణించిన వారందరూ పునీతులా? అంటే కాదు. పవిత్రమైన జీవితం ఎవరైతే జీవించి, తమ జీవితంలో ఏర్పడిన కష్టసుఖాలలో దేవునితోనే జీవించి, అన్నీ దేవునికి అర్పించుకొని, దేవుని అడుగుజాడల్లో, కేవలం దేవునికి మాత్రమే ఆనుకొని, పాపము చేసినా, పాపమును తెలుసుకొని, బ్రతికుండగానే, పశ్చాత్తాప పడి, దేవుని ముందు క్షమాపణ పొందుకొని, జీవించి, మరణించినవారు సకల పునీతులు.

ఉదాహరణగా: పునీత చిన్న తెరేసమ్మగారి జీవితం తీసుకున్నట్లయితే... వీరు జీవించిన తీరు పవిత్రమైన పునీత జీవితం. అతి చిన్న వయసులోనే దేవుని సన్నిధికి చేరుకున్నారు. చిన్న వయసు నుండే, దేవుడు అంటే అమితమైన ప్రేమ, అమితమైన భక్తి విశ్వాసములు, చిన్న వయసులోనే కన్యస్త్రీ కావాలనే ఆశయం, ఆశ, ఆమెలో ఉండేవి. కనుకనే కన్యస్త్రీ కాగలిగారు.

ఆమె జీవితాన్ని ఎక్కువగా ఇతరులకు సహాయం చేయడానికి, ఇతరుల శ్రమలను భరించడానికి ఇష్టపడేవారు. కనుకనే క్రీస్తు ప్రభువు ఆమెకు బాలయేసుగా దర్శనమిచ్చారు. ఆమెతో ముచ్చటించారు. ఆమె తోట పని చేస్తుంటే బాలయేసు దర్శనమయ్యారు, ఆ చిన్న తెరేస ఆ బాలయేసుని ఎత్తుకొని ముద్దాడి, నీ పేరేంటి... అని లాలనగా అడిగారు. ముందు నీ పేరు చెప్పు అని బాలుడు అడగ్గా, “బాలయేసు యొక్క చిన్న తెరేస‌”, అని చిన్న తెరేస చెప్పగా, బాలుడు బదులుగా నా పేరు “చిన్న తెరేస యొక్క బాలయేసు” అని చెప్పి అదృశ్యమయ్యాడు. అప్పుడు అర్థమయింది చిన్న తెరేస గారికి, తాను అప్పటివరకు మాట్లాడింది స్వయముగా దివ్య బాలయేసుతోనేనని!

మన జీవితాలలో కూడా, దేవునిలో మమేకమై, ఆయన కీర్తనలు ఆలపిస్తూ... ఆయనకు ఇష్టమైన కార్యాలు చేయుచూ... ఆయనను అమితంగా ప్రేమిస్తూ ఉంటే, దేవుడు మనతో కూడా మాట్లాడుతారు, ముచ్చటిస్తారు.

చిన్న తెరేస గారు దేవునికి అంకితం చేసుకొని, ఆమె యేసు కోసమే తన జీవితం అని ఏనాడు మరువకుండా, ప్రతిక్షణం యేసు కోసమే తన జీవితాన్ని అంకితం చేసుకున్నారు. పునీత చిన్న తేరేసమ్మ ఈ విధంగా అన్నారు, “నా పరలోక జీవితాన్ని, భూలోక వాసుల మేలుకోసమే ఉపయోగిస్తాను... నా మరణానంతరం రోజాపూలు వర్షం కురిపిస్తాను, ప్రపంచమంతా నన్ను అభిమానిస్తారు” అని ప్రవచనం చెప్పారు. తన జీవితాన్ని ప్రభువుకి అంకితం చేసుకొని తన సమయాన్ని దేవునికి ఇష్టమైన రీతిలో జీవించగలిగారు. ఎన్నో పుణ్యకార్యాలు చేసుకోగలిగారు. యేసు కోసమే తన జీవితం అని ఏనాడు ఆమె మర్చిపోలేదు.

అతి చిన్న వయసులోనే వారికి క్షయరోగం ప్రాప్తించింది. ఆమె జీవిత చరిత్రను ‘ఆత్మ యెుక్క గాధ’గా పుస్తకంలో లిఖించారు. పునీతుల జీవితం ఇదే విధంగా ఉంటుందని చెప్పడానికి ఇది నిదర్శనం!

పునీత చిన్న తెరేసమ్మ మనకు మాట ఇచ్చారు! బ్రతికున్న మన కోసము, మన మేలు కొరకు, తన పరలోక జీవితాన్ని భూలోకములో ఉన్న మన కొరకు ఉపయోగిస్తానని చెప్పారు. అంటే మన కొరకు ప్రార్థిస్తారు. మనం కూడా దేవునికి ఇష్టమైన బిడ్డలుగా జీవించాలని, మనము మంచి ప్రవర్తన కలిగి జీవించాలని, క్రీస్తు కొరకు మనం కూడా పాటుపడాలని, మన యోగక్షేమముల కొరకు ప్రార్థిస్తుంటారు, సకల పునీతులు.

హెబ్రీ 12:1 – “ఈ మహాసాక్షీ సమూహము మేఘము వలెఆవరించి ఉన్నందున మనము సమస్త భారమును మనలను పెనవేసుకొని ఉన్న పాపములను వదల్చుకొని, మనయెదుటనున్న పరుగు పందెమున నిశ్చయముతో పరుగిడుదము.” కాబట్టి, సకల పునీతులు పరలోకంలో కేవలం చూస్తూ ఉండరు. వారు భూమిపై ఉన్న మన పరుగును చూస్తూ, మనం గెలిచేలా మనకు నైతిక మద్దతునిచ్చే ఒక పెద్ద ‘సాక్షుల సమూహం’ లాంటివారు. వారు మన కొరకు నిత్యమూ ప్రార్ధన చేస్తారు. విశ్వాస సంగ్రహములో “పునీతుల బాంధవ్యము అని చెప్తాం; అంటే పరలోకంలోనున్న పునీతులు, ఉత్తరించుస్థలంలోనున్న ఆత్మలు, భూలోకములో పోరాడుతున్న మనం, క్రీస్తు శిరస్సు క్రింద ఒకే కుటుంబము. అందుకే మనం పునీతుల ప్రార్ధన సహాయాన్ని కోరుతుంటాం!

శ్రీసభనందు మాత్రమే ఈ సకల పునీతుల పండుగను కొనియాడుకుంటాము. నీవు... నేను... మనమందరమూ... కూడా, పునీతుల జీవితాలను, సుమాతృకగా తీసుకొని, మనం కూడా దేవునికి ఇష్టమైన కార్యాలు చేయుచూ, ఆయన యందు, ఆయనతో సంభాషిస్తూ... తోటివారి యెడల సఖ్యత కలిగి, ప్రేమతో, క్షమాపణతో, జీవిస్తూ... మంచి మార్గంలో దేవుని బిడ్డలమై, క్రీస్తు ప్రభువు మనకు చూపిన మార్గంలో జీవించుచూ... ఆయనను స్తుతిస్తూ... ఆరాధిస్తూ... ప్రేమిస్తూ... ఆయన యందు విశ్వాసము కలిగి, మన జీవితాలను కూడా, పునీతులను ఆదర్శంగా తీసుకొని, సాటివారిలో క్రీస్తు ప్రభువును చూస్తూ... మనము సకల పునీతులను ఆదర్శంగా తీసుకొని, వారివలె, మనం కూడా, జీవించగలుగుదాం!

మనము బ్రతుకు దినములలో, మనము క్రీస్తు పేరిట మరియు మన జీవితంలో ఎన్ని శ్రమలనుభవిస్తే, మనకు అంత ప్రతిఫలము దక్కును అని గ్రహించి, క్రీస్తు పేరిట, క్రీస్తు శ్రమలలో, భాగస్తులమై జీవించగలగాలి. పునీతులందరూ కూడా అదేవిధంగా జీవించారు.

పునీతులు అంటే మనకు తెలిసిన వారేనా పునీతులు, ఆహా కానే కాదు... ఇంకా అనేకులు... మన దృష్టిలో గుర్తింపు లేని పునీతులు అనేకులు, దేవుని దృష్టిలో గుర్తింపు పొందుకొనిన వారు చాలామంది ఉన్నారు. మన కళ్ళ ముందే ఎంతో మంచి వ్యక్తిత్వం కలిగి, నిందలు, అవమానాలు భరించి క్రీస్తు పేరిట తమకు ఏర్పడిన శ్రమలను భరించి, జీవించి‌... మరణించిన వారు కూడా పునీతులే, వారు నిత్యమూ... మన కొరకు ప్రార్థిస్తూనే ఉంటారు. ఎందుకంటే వారు మంచి జీవితాన్ని దేవునికి ఇష్టమైన జీవితాన్ని జీవించారు; కాబట్టి, బ్రతికున్న, జీవిస్తున్న, మన కొరకు, మనం మంచి ప్రవర్తన కలిగి సత్యముతో, స్వార్ధము లేని, దేవునియందు విశ్వాసంతో జీవించాలని వారి ప్రార్థన నిత్యం మనకు తోడై ఉంటుంది.

మనందరం కూడా పునీతులు కావడానికి పిలువబడినామని, అనగా మన జీవిత స్థితిలో, దేవుని పరిపూర్ణతను సాధించడానికి పిలువబడినామని శ్రీసభ మనకు తెలియజేస్తుంది. మనలో ప్రతీ ఒక్కరు, గృహిణులు, రైతులు, విద్యార్థులు, ఉద్యోగులు... ప్రతిఒక్కరూ... దైనందిన జీవితంలో దేవుని ప్రేమను ఆచరించడం ద్వారా పునీతులు కాగలరనే సత్యాన్ని నేడు మనం గ్రహించాలి.

ఈనాడు సకల పునీతులను, సకల పునీతులారా! మా కొరకు ప్రార్థించండి, మేము దేవునికి ఇష్టమైన బిడ్డలముగా, మా జీవితాలను, దేవునికి అర్పించుకొని, ఒకవేళ మేము పాపము చేసినచో, మేము అభాగ్యులమని, ఆ పాపములోనే జీవించక, నిజ దేవున్ని తెలుసుకొని, పశ్చాత్తాపము పొందుకొని, సౌలు పౌలుగా మారిన విధముగా మేము కూడా, దేవుని పిలుపును హృదయపూర్వకముగా స్వీకరించి, ఆ విధముగా జీవిస్తూ దేవుని బోధనలను మా జీవితంలోనికి అన్వయించుకొని, తప్పనిసరిగా దేవుని వాక్కను మేమందరమూ కూడా... అనుసరిస్తూ...‌ జీవించులాగున, మా కొరకు ప్రార్థించమని సకల పునీతులను, మనమందరమూ ప్రార్థనా సహాయం కోరుకుందాం. ఆమెన్. సకల పునీతులారా! మా కొరకు ప్రార్థించండి! పితా, పుత్ర, పవిత్రాత్మ నామమునకు, మహిమ కలుగునుగాక! ఆమెన్.

పునీత తిమోతి మరియు పునీత తీతు అపోస్తలుడైన పౌలు ప్రియ శిష్యులు (జనవరి 26)

 పునీత తిమోతి మరియు పునీత తీతు

అపోస్తలుడైన పౌలు ప్రియ శిష్యులు (జనవరి 26)

నేడు శ్రీసభ పునీత పౌలుకు అత్యంత ప్రియ అనుచరులైన తిమోతి, పునీత తీతుల మహోత్సవాన్ని కొనియాడుచున్నది. ఆదిమ క్రైస్తవ సంఘములో, అత్యంత క్లిష్టమైన పరిస్థితులలో మేత్రాణులుగా బాధ్యతలను చేపట్టి, సంఘాలను పటిష్ట పరచారు. తమ జీవితాలను సువార్తకు, క్రైస్తవ సంఘ సేవకు అంకితం చేసుకున్నారు. 

తిమోతి 64లో ఎఫెసుకు మొదటి మేత్రాణులుగా పనిచేసారు. 93వ సం.లో ఎఫెసు నగరములో విగ్రహారాధనను వ్యతిరేకించినందులకు, వేదసాక్షి మరణాన్ని పొందాడు. 

తీతు క్రీటు సంఘమునకు మేత్రాణులుగా పనిచేసారు. ప్రార్ధన, బోధనలద్వారా క్రైస్తవ విశ్వాసాన్ని బలపరచాడు. అపోస్తోలిక ప్రేషితత్వములో గొప్ప ఉత్సాహాన్ని చూపాడు. క్రీస్తునందు సహవాసం, స్నేహం కలిగి జీవించాడు. తన ముసలి ప్రాయములో ప్రశాంతమైన మరణాన్ని పొందాడు.

తిమోతి

తిమోతి అనగా “దేవున్ని గౌరవించడం” అని అర్ధం. తిమోతి లికోనియాలోని లిస్త్రా గ్రామానికి చెందినవాడు. తల్లి యూనీకే (యునిస) మరియు అమ్మమ్మ లోయి. లిస్త్రాలో మొట్టమొదటిగా క్రైస్తవులుగా మారినదే ఈ కుటుంబమే (2 తిమో 1:5). పౌలు సువార్తా ప్రచారమునకై లిస్త్రాకు వెళ్ళినప్పుడు (క్రీ.శ. 46) తిమోతితో అనుబంధం ఏర్పడినది (అ.కా 13:1-14:28). తిమోతి తండ్రి గ్రీసు దేశస్థుడు. తల్లి భక్తిగల యూదురాలు. యూదురాలైన తిమోతి అమ్మమ్మ మొదటగా క్రైస్తవురాలిగా మారింది (2 తిమో 1:5, అ.కా 16:1-2). తిమోతి తన చిన్నతనము నుండి హీబ్రూ గ్రంథముల పట్ల విద్యాభ్యాసాన్ని పొందియున్నాడు (2 తిమో 3:15).

ఎఫెసు మరియు తెస్సలోనిక సంఘాలలో తిమోతి పనిచేసాడు. పౌలుకు ప్రీతిపాత్రుడు. ప్రభువునందు విశ్వసనీయ సహచరుడు (1 కొరి. 4:17, 1 తిమో 1:2). పౌలు అనుమతితో సున్నతి కావింప బడ్డాడు (అ.కా 16:1-3). పౌలు తన లేఖలు వ్రాయడానికి సహాయ పడ్డాడు (1తెస్స 1:1, 2 కొరి. 1:1). 

మొదటగా, లిస్త్రాను పౌలు, బర్నబాసులు సందర్శించారు. అచ్చటి ప్రజలు వారిని ‘దేవుళ్ళు’గా భావించి ఆహ్వానించారు. కాని ఆ తరువాత పౌలును రాళ్ళతో కొట్టి, అతడు మరణించెనని భావించి, పట్టణము బయటకు ఈడ్చివేసారు (అ.కా 14:6-20). చిన్నవాడైన తిమోతి, సంఘటనను కనులారా చూడనప్పటికిని, ఆ తరువాత తప్పక వినే ఉంటాడు. పౌలు రెండవసారి లిస్త్రాను సందర్శించినప్పుడు (క్రీ.శ. 50-52), పెద్దవాడైన తిమోతిని తన సహచరునిగా తీసుకున్నాడు (అ.కా 15:36-18:22). యూదుల పోరు వలన, తిమోతిని తన వెంట తీసుకొని పోదలచి అతనికి సున్నతి కావించాడు (అ.కా 16:3). హస్తనిక్షేపణ వలన పౌలు సమక్షములో, పెద్దలచేత అభిషేకింపబడ్డాడు (1 తిమో 4:14, 2 తిమో 1:6).

ఆసియా, ఐరోపా ప్రేషిత పరిచర్య ప్రయాణాలలో, తిమోతి పౌలును అనుసరించాడు. ఇరువురు కలసి మొట్టమొదటిసారిగా ఐరోపాకు వెళ్ళారు (అ.కా 16:9). వారిరువురు కలిసి గలతి, ఫిలిప్పీ, తెస్సలోనిక, బెరయాలలో సువార్తను బోధించారు (అ.కా 17:14-15, 18:5). తెస్సలోనిక క్రైస్తవులను బలపరచుటకు పౌలు తిమోతిని వారి వద్దకు పంపాడు. తిమోతి తిరిగి పౌలును కొరింతులో కలుసుకున్నాడు (1 తెస్స 3:6,అ.కా 18:5). కేవలం ఎఫెసులోనే ఇరువురు కలిసి దాదాపు రెండు సంవత్సరములు కలిసి పని చేసారు. ఎఫెసునుండి పౌలు తిమోతిని మాసిడోనియాకు (అ.కా 19:22, 1 కొరి 4:17, 16:10), బహుశా యెరూషలేము విశ్వాసుల కొరకు ధన సహాయమునకై పంపియుండవచ్చు!

క్రీ.శ. 57-58 చలికాలము, తిమోతి కొరింతులో పౌలుతోనే ఉన్నాడు. ఆ సమయముననే, తిమోతి కూడా పౌలు వెంట రోము నగరమునకు కొనిపోబడ్డాడు (రోమీ 16:21). అ.కా 20:4-5 ప్రకారం, క్రీ.శ. 58వ సంవత్సరములోని పెంతకోస్తు మహోత్సవమునకు ముందుగా, ఆరంభములో యెరూషలేమునకు ప్రయాణములో తిమోతి పౌలుతో ఉన్నాడు. తిమోతి ముందుగా వెళ్లి, పౌలు కొరకు త్రోయలో వేచి ఉన్నాడు.

పౌలు తనకు మొదటి లేఖ వ్రాయు సమయమునకు, తిమోతి ఎఫెసు నగరములో ఉన్నాడు. పౌలు మాసిడోనియాకు వెళ్ళాడు (1 తిమో. 1:3). పౌలు తిమోతిని ఎఫెసు నగరములో త్వరలో కలవాలని ఆశించి యున్నాడు (1 తిమో. 3:14-15, 4:13).

తీతు

తీతు గ్రీసు దేశస్థుడు. సున్నతి పొందని విశ్వాసముగల క్రైస్తవుడు (గలతీ 2:1-3). పౌలుకు తోటి మిషనరి (2 కొరి 8:23), నమ్మదగిన ప్రతినిధి (2 కొరి 12:18). పౌలు పరిచర్య వలన, తీతు విశ్వాసమును పొందాడు. పౌలు తీతును యెరూషలేము సమావేశమునకు (క్రీ.శ. 49) తీసుకొని వెళ్ళాడు. మొదటి ప్రేషిత ప్రయాణములో, తీతు అంతియోకు నుండి యెరూషలేము వరకు పౌలు, బర్నబాలను వెంబడించాడు.

కొరింతు సంఘములో వివాదాలు తలెత్తినప్పుడు, పౌలు తన లేఖను ఎఫెసునుండి కొరింతుకు తీతు ద్వారా పంపాడు. కొరింతు ప్రజలు మారుమనస్సు పొందుటలో తీతు విజయవంతుడైనాడు. తీతు తన చాకచక్యంతో అక్కడ సయోధ్యను కుదిర్చి, పౌలుకు శుభవార్తను అందించాడు. ఈ మంచి వార్తను తీతు మాసిడోనియాలోనున్న పౌలుకు అందచేశాడు. ఈవిధముగా కొరింతు ప్రజలు మరియు పౌలు మధ్య సఖ్యతను నెలకొల్పడములో ముఖ్యపాత్ర పోషించాడు (2 కొరి 2:1, 7:6-16).

మరల యెరూషలేములోని ప్రజలకు సహాయమును సమకూర్చుటకు పౌలు తీతును కొరింతునకు పంపాడు (2 కొరి 8:6, 16, 22, 12:17-18). తీతు 1:5 ప్రకారం, తీతు పౌలుతో క్రీటులో ఉన్నాడు. అచటి సంఘములో ఇంకను తీర్చి దిద్దబడవలసిన వానిని క్రమపరచుటకును, ప్రతి నగరము నందును దైవసంఘమునకు పెద్దలను నియమించుటకును, తీతును పౌలు క్రీటులోనే వదిలి వచ్చాడు.

తీతుకు లేఖను “విశ్వాసము నందు నా నిజమైన కుమారుడు” అని పౌలు తీతును సంబోధిస్తూ వ్రాసాడు. కుమారుడు, తండ్రి కార్యమును కొనసాగించునట్లుగా, పౌలు ఆరంభించిన అపోస్తోలిక ప్రేషిత కార్యమును, తీతు కొనసాగించవలెనని ఈ లేఖద్వారా ఆజ్ఞాపించుచున్నాడు (తీతు 1:1-4). తీతు తన ముసలి ప్రాయం వరకు సువార్త ప్రకటించి, ప్రశాంతంగా మరణించారు.

ఆదిమ సంఘ అభివృద్ధిలో పునీత తిమోతి, తీతులు చూపిన పట్టుదల, విధేయత మనందరికీ ఆదర్శం. నేడు ప్రత్యేకముగా దీకనుల కొరకు, గురువుల కొరకు మరియు మేత్రాణుల కొరకు ప్రార్ధన చేద్దాం. వారు కూడా ఈ పునీతుల వలె క్రీస్తు సువార్త కోసం ఉత్సాహంగా పనిచేసేలా దేవుని కృపను వేడుకుందాం.

శ్రీసభ తొలినాటి పండితులు వీరిని "అపోస్తలుల వారసత్వానికి ప్రతిరూపాలు"గా అభివర్ణించారు.

పునీత జాన్ క్రిసోస్టమ్ తిమోతి గురించి వ్యాఖ్యానిస్తూ, “తిమోతి అనారోగ్యంతో ఉన్నప్పటికీ, పౌలుతో కలిసి కఠినమైన ప్రయాణాలు చేశాడు. అతని భక్తి శరీరం కంటే ఆత్మ శక్తిపై ఆధారపడి ఉండేది” అని కొనియాడారు. తీతు గురించి చెబుతూ, “తీతు ఒక బలమైన స్తంభం వంటివాడు. క్రీటు వంటి కఠినమైన ప్రదేశంలో కూడా సంఘాన్ని నిలబెట్టగల ధీశాలి” అని పేర్కొన్నారు. చరిత్రకారుడైన యూసేబియస్ తన ‘చర్చి హిస్టరీ’లో, తిమోతిని ఎఫెసు నగరానికి మొట్టమొదటి మేత్రాణులుగా మరియు తీతును క్రీటు దీవిలోని సంఘాలకు అధిపతిగా ధృవీకరించారు. అపోస్తలుల బోధనలను తదుపరి తరాలకు చేరవేసిన “జీవమున్న వారధులు” అని వర్ణించారు.

పోపు 16వ బెనెడిక్ట్ గారు 2006లో చేసిన ప్రసంగంలో, వీరిద్దరి గురించి ఇలా చెప్పారు: “తిమోతి మరియు తీతు మనకు ఒక ముఖ్యమైన విషయాన్ని నేర్పుతున్నారు, అదేమిటంటే, సువార్త సేవ అనేది కేవలం ఒక వ్యక్తికి సంబంధించినది కాదు, అది ఒక బృందానికి, టీముకు సంబంధించినది. పౌలు ఒంటరిగా పని చేయలేదు; అతను వీరిద్దరిపై ఆధారపడ్డాడు. ఇది క్రైస్తవ సేవలో 'సహకారం' యొక్క ప్రాముఖ్యతను తెలియజేస్తుంది.” “తిమోతి పౌలుకు కుమారుడి వంటివాడు, కానీ సేవలో అతనికి సాటిలేని సహచరుడు. పౌలు జైలులో ఉన్నప్పుడు కూడా తిమోతి ధైర్యంగా నిలబడ్డాడు”. “తీతు ఒక శాంతిదూత. వివాదాల్లో ఉన్న కొరింతు సంఘాన్ని తన ప్రేమతో, వివేకంతో మళ్ళీ పౌలు వైపుకు తిప్పగలిగాడు.”

పోపు ఫ్రాన్సిస్ గారు తమ సందేశాలలో వీరిని “మిషనరీ ఉత్సాహానికి” గుర్తులుగా పేర్కొన్నారు: “తిమోతి మరియు తీతు తమ సుఖాలను వెతుక్కోలేదు. వారు పౌలు అడుగుజాడల్లో నడుస్తూ, క్రీస్తు కోసం కష్టాలను అనుభవించడానికి సిద్ధపడ్డారు. నేటి గురువులు మరియు మేత్రాణులు వీరిద్దరి వలె ప్రజల మధ్యకు వెళ్ళే 'గొర్రెల కాపరులు'గా ఉండాలి.”

శ్రీసభ పండితుల ప్రకారం, తిమోతి మరియు తీతు కేవలం చారిత్రక వ్యక్తులు కాదు; వారు “అపోస్తోలిక పరంపర”కు మొదటి సాక్షులు. వీరి ద్వారానే అపోస్తలుల బోధనలు నేటి మన వరకు సురక్షితంగా చేరాయి.

పునీత తిమోతి మరియు తీతుల జీవితాల నుండి, నేటి క్రైస్తవులమైన మనం నేర్చుకోవాల్సిన కొన్ని ఆసక్తికరమైన అంశాలను, స్ఫూర్తిదాయకమైన సందేశాన్ని తెలుసుకుందాం!

తరాల మధ్య వారధి: తిమోతి జీవితంలో అతని తల్లి యూనీకే, అమ్మమ్మ లోయిల పాత్ర చాలా ముఖ్యమైనది (2 తిమోతి 1:5). ఇది నేటి క్రైస్తవ కుటుంబాలకు ఒక గొప్ప పాఠం. తల్లిదండ్రులు, పెద్దలు తమ పిల్లలకు చిన్నతనం నుండే విశ్వాసాన్ని ఎలా పంచివ్వాలో వీరి కుటుంబం నిదర్శనం!

వయస్సు ఒక అడ్డంకి కాదు: తిమోతి చిన్న వయస్సులోనే పెద్ద బాధ్యతలు చేపట్టాడు. అందుకే పౌలు “నీవు వయసున చిన్నవాడవని ఎవరును నిన్ను అవమానింపకుండునట్లు చూచుకొనుము” (1 తిమోతి 4:12) అని ధైర్యం చెప్పాడు. ఇది నేటి యువతకు గొప్ప ప్రోత్సాహం!

సంక్షోభ పరిష్కర్తగా తీతు: తీతు కేవలం బోధకుడే కాదు, ఒక మంచి 'అడ్మినిస్ట్రేటర్'. కొరింతు సంఘంలో గొడవలు / వివాదాలు జరిగినప్పుడు, పౌలు నమ్మి పంపిన వ్యక్తి తీతు. క్లిష్ట పరిస్థితుల్లో శాంతిని నెలకొల్పడం ఎలాగో తీతు జీవితం మనకు నేర్పుతుంది!

నేటి క్రైస్తవులకు సందేశం ఏమిటంటే,

సువార్త బాధ్యత అందరిది: తిమోతి, తీతులు కేవలం పౌలు వెనుక నడవడం మాత్రమే కాదు, స్వయంగా బాధ్యతలను భుజాన వేసుకున్నారు. నేడు క్రైస్తవులు కేవలం చర్చికి వెళ్ళేవారిగా మాత్రమే కాకుండా, తమ పరిసరాల్లో క్రీస్తు ప్రేమను చాటిచెప్పే బాధ్యతను తీసుకోవాలి!

విశ్వాసంలో వారసత్వం: మన విశ్వాసం మనతోనే ముగిసిపోకూడదు! తిమోతి అమ్మమ్మ నుండి తల్లికి, తల్లి నుండి తిమోతికి విశ్వాసం ఎలా ప్రవహించిందో, మన తరువాతి తరాలకు కూడా మనం దైవభక్తిని వారసత్వంగా అందించాలి!

క్రీస్తునందు స్నేహం - సహకారం: పౌలు, తిమోతి, తీతుల మధ్య ఉన్న బంధం కేవలం గురు-శిష్యుల బంధం కాదు, అది క్రీస్తులో పెనవేసుకున్న గొప్ప స్నేహం. సంఘ సేవలో ఒకరికొకరు సహకరించుకోవడం, ఒకరిని ఒకరు ప్రోత్సహించుకోవడం ద్వారానే దేవుని రాజ్యాన్ని నిర్మించగలమని వీరి జీవితాలు మనకు చెబుతున్నాయి!

శ్రమలలో సహనం: తిమోతి వేదసాక్షిగా మరణించాడు, తీతు చివరి వరకు క్రీటులో సేవ చేస్తూ గడిపాడు. విశ్వాసం కోసం ఎన్ని కష్టాలు ఎదురైనా, వెనకడుగు వేయకూడదనే పట్టుదలకు వీరిద్దరూ ప్రతీకలు!

 

పునీత జోజప్పగారి పండుగ: విశ్వాసానికి ప్రతిరూపం మత్తయి సువార్త 1:16, 18-21, 24 ఆధారంగా...

 పునీత జోజప్పగారి పండుగ: విశ్వాసానికి ప్రతిరూపం

మత్తయి సువార్త 1:16, 18-21, 24 ఆధారంగా...

ప్రియ సహోదరీ సహోదరులారా, పునీత జోజప్పగారి మహోత్సవం. ముందుగా మీ అందరికీ పునీత జోజప్పగారి పండుగ శుభాకాంక్షలు!

మత్తయి సువార్త 1:18వ వచనం నుండి - “యాకోబు కుమారుడైన యోసేపు, మరియమ్మ భర్త. ఆ మరియమ్మకే ‘క్రీస్తు’ అనబడే ‘యేసు’ జన్మించారు. యేసుక్రీస్తు జనన వృత్తాంతం ఇలా ఉంది: యేసు తల్లియైన మరియమ్మకు యోసేపుతో వివాహం నిశ్చయమైనది. కాని వారు ఇరువురును కాపురము చేయక ముందే పవిత్రాత్మ ప్రభావము వలన గర్భము ధరించినది. ఆమె భర్తయగు యోసేపు నీతిమంతుడగుటచే, మరియమ్మను బహిరంగముగా అవమానింప ఇష్టము లేక రహస్యముగా పరిత్యజించుటకు నిశ్చయించుకొనెను. యోసేపు ఇట్లు తలంచుచుండగా, ప్రభువు దూత కలలో కనిపించి, ‘దావీదు కుమారుడవగు యోసేపూ! నీ భార్యయైన మరియమ్మను స్వీకరించుటకు భయపడవలదు. ఏలయన, ఆమె పవిత్రాత్మ ప్రభావము వలన గర్భము ధరించినది. ఆమె ఒక కుమారుని కనును. నీవు ఆయనకు ‘యేసు’ అను పేరు పెట్టుము. ఏలయన ఆయన, తన ప్రజలను వారి పాపముల నుండి రక్షించును అని చెప్పెను... నిదుర నుండి మేలుకొనిన యోసేపు, ప్రభువు దూత ఆజ్ఞాపించినట్లు తన భార్యను స్వీకరించెను.”

ప్రియ సహోదరీ సహోదరులారా, దేవుని అనుసరణను పాటించిన వారు... దేవుడు దయచేయు భాగ్యమును పొందుకుంటారు! ఈరోజు మనం జరుపుకునే పునీత జోజప్పగారి పండుగ మనకు ఎంతో ఆశీర్వాదకరం! జోజప్పగారు కేవలం ఒక వ్యక్తి మాత్రమే కాదు, ఒక గొప్ప బాధ్యతకు చిహ్నం! జోజప్పగారి పేరు వినగానే మనకు గుర్తుకు వచ్చేది ‘మౌనం’. అవును, బైబిలు గ్రంథంలో ఒక్క మాట కూడా మాట్లాడకుండానే, దేవుని చిత్తాన్ని తన చేతలతో, బాధ్యతలతో ప్రపంచానికి చాటిచెప్పిన మహనీయుడు పునీత జోజప్పగారు!

‘నీతిమంతుడు’ అని సువార్తలో కీర్తించబడిన ఆయన, మరియమ్మకు ప్రాణప్రదమైన భర్తగా, బాలయేసుకు అత్యంత ఆప్యాయత కలిగిన సాకుడు తండ్రిగా తన జీవితాన్ని దేవుని ప్రణాళికకు అర్పించుకున్నారు. ‘నమ్మకం’ అంటే కేవలం ప్రార్థన చేయడం మాత్రమే కాదు, కష్టకాలంలో కూడా దేవుని మాట మీద నమ్మకంతో ముందడుగు వేయడం అని నిరూపించిన విశ్వాసానికి ప్రతిరూపం పునీత జోజప్పగారు. నేటి ఈ పండుగ వేళ, ఆయన జీవితంలోని గొప్పతనాన్ని, ఆయన జీవితం మనకు ఇచ్చే ఆదర్శాన్ని ధ్యానించుకుందాం!

జోజప్పగారి విశిష్టత: ప్రియ సహోదరీ సహోదరులారా, కన్యమరియమ్మ సంరక్షక భర్త, బాలయేసుకు సాకుడు తండ్రి, విశ్వశ్రీసభ పాలక పోషకుడు, కార్మిక వర్గ పాలకుడు అయిన పునీత జోజప్పగారు విధేయతకు మారుపేరు! దేవుని చిత్తానికి తలవొగ్గడం అంటే ఏమిటో జోజప్పగారి జీవితం మనకు నేర్పుతుంది. వివాహం నిశ్చయమైన సమయంలో ఎదురైన క్లిష్ట పరిస్థితిని ఆయన ఎంతో వినయంతో, దైవచిత్తంతో స్వీకరించారు. కేవలం ఒక కల ద్వారా వచ్చిన దైవ సందేశాన్ని నమ్మి, ఎటువంటి తర్కాలు చేయకుండా మరియమ్మను ఆదరించారు. ఆయన అత్యంత నీతిమంతుడు. మరియమ్మ గర్భవతి అని తెలిసినప్పుడు, ఆనాటి యూదా సాంప్రదాయాల ప్రకారం ఆమెను బహిరంగంగా అవమానపరిచే అవకాశం ఆయనకు ఉండేది. కానీ, ఆయనలో ఉన్న కరుణ, వినయం, దైవభక్తి వల్ల ఆమెకు ఎటువంటి కష్టం కలగకూడదని భావించి, రహస్యంగా విడిచి పెట్టాలని నిర్ణయించుకున్నారు. జోజప్పగారు వినయము కలిగిన వ్యక్తిత్వము కలవారైనవారు కాబట్టి, మరియమ్మను బహిరంగముగా అవమానించడం ఇష్టం లేక రహస్యంగా విడిచి పెట్టాలని ఆయన నిర్ణయించుకున్నారు. నిజంగా, ఇది ఆయనలోని గొప్ప హృదయాన్ని తెలియజేస్తుంది. అంతలోనే ప్రభువు దూత, ఆయనకు కలలో కనిపించి, “దావీదు కుమారుడవగు యోసేపూ! నీ భార్యయైన మరియమ్మను, స్వీకరించుటకు భయపడవలదు. ఏలయన, ఆమె పవిత్రాత్మ ప్రభావమువలన గర్భము ధరించినది, ఆమె ఒక కుమారునికి కనును. నీవు ఆయనకు ‘యేసు’ అను పేరు పెట్టుము. ఏలయన ఆయన, తన ప్రజలను, వారి పాపములనుండి, రక్షించును” అని చెప్పగానే, యోసేపు నిద్ర నుండి మేల్కొని, దూత ఆజ్ఞాపించినట్లు, మరియమ్మను స్వీకరించారు. బాలయేసును పెంచి పెద్ద చేయడంలో జోజప్పగారు చూపిన క్రమశిక్షణ, శ్రద్ధ ఎనలేనిది! ఎంతో బాధ్యతతో, శ్రద్ధతో... దేవుని యందు విధేయతతో... వినయముతో.... పెంచి పెద్ద చేయడం మనం గమనించవచ్చు! ఎన్నో వ్యతిరేక మాటలతో... జోజప్పగారిని అనేకమంది బాధించి ఉండి ఉండవచ్చు! కానీ ఎవరి మాటలను వారు లెక్కచేయకుండా, హృదయానికి స్వీకరించి, బాధపడకుండా, అదొక ఘనతగా, భాగ్యముగా, దేవుని ఆజ్ఞయే ఆయన బాధ్యత అని స్వీకరించి, ఆవిధముగానే క్రీస్తు ప్రభువును పెంచి పెద్ద చేశారు! బాల యసునకు బాల్యంలో జరిపించవలసిన నియమములను భక్తిశ్రద్ధలతో పూర్తి చేశారు!

ప్రియ సహోదరీ, సహోదరులారా, మానవ దృష్టికి అసాధ్యమైనదిగా అనిపించిన ఈ విషయాన్ని దేవుడు కలలో దూత ద్వారా యోసేపు గారికి తెలియజేశాడు. “పవిత్రాత్మ ప్రభావం” అని దేవుడు స్పష్టం చేసినప్పుడు, జోజప్పగారు తన సొంత ఆలోచనలను పక్కనపెట్టి, దేవుని ప్రణాళికను విశ్వసించారు. “భయపడకుము” అన్న దేవుని పిలుపును అందుకున్న వెంటనే, జోజప్పగారు ఎటువంటి సందేహం లేకుండా మరియమ్మను తన భార్యగా స్వీకరించారు. ఇది జోజప్పగారు దైవానికి ఇచ్చిన సంపూర్ణ విధేయతకు నిదర్శనం! మరియమ్మకు పుట్టబోయే బిడ్డకు “యేసు” అని పేరు పెట్టమని దూత చెప్పడం ద్వారా, ఆ బిడ్డకు సాకుడు తండ్రిగా బాధ్యత వహించే గొప్ప ఆధిక్యతను దేవుడు జోజప్ప గారికి ఇచ్చారు. “యేసు” అంటే “రక్షకుడు” అని అర్థం. తన ప్రజలను పాపాల నుండి రక్షించే రక్షకుడిని భూమిపై సంరక్షించే బాధ్యతను జోజప్ప గారు స్వీకరించారు.

శ్రమయేవ జయతే - కార్మికుల పాలకుడు: కుటుంబాన్ని పోషించడానికి జోజప్పగారు వడ్రంగి పనిని ఎంచుకున్నారు. ఆ కాలంలో ఎంతో కాయకష్టంతో కూడిన పని! శ్రమను కేవలం జీవనోపాధిగా మాత్రమే కాకుండా, దేవునికి ఇచ్చే ఒక అర్పణగా ఆయన భావించారు! కొలొస్సీ 3:23లో ఇలా చదువుచున్నాం: “ఏ పని చేసినప్పటికినీ దానిని చిత్తశుద్ధితో మనుష్యుల కొరకు చేయుచున్న కార్యము వలెగాక, దేవుని కార్యముగా భావించి చేయుడు”. కష్టపడి పని చేస్తూ, ఆ వచ్చిన ఆదాయంతో తిరుకుటుంబాన్ని పోషించారు. యేసు ప్రభువు కూడా తప్పకుండా తన తండ్రికి పనిలో సహాయపడి ఉంటారు! అందుకే, కాయకష్టం చేసే ప్రతి ఒక్కరికీ జోజప్పగారు ఆదర్శప్రాయులు! ఆయన ఏకాగ్రతను, కష్టపడే తత్వాన్ని గుర్తించే శ్రీసభ ఆయనను “కార్మిక వర్గ పాలక పునీతునిగా” గౌరవిస్తోంది.

“శ్రమయేవ జయతే” అంటే శ్రమించేవాడే విజేత అని అర్థం. నేటి కాలంలో ఎంతోమంది కార్మికులు, ఉద్యోగస్తులు తమ కుటుంబాల కోసం పడుతున్న కష్టాన్ని మనం జోజప్పగారి కష్టంతో పోల్చవచ్చు! శారీరక శ్రమ చేసేవారిని చిన్నచూపు చూడకూడదు. మనం చేసే పని చిన్నదైనా, పెద్దదైనా దానిని జోజప్పగారి వలె చిత్తశుద్ధితో చేస్తే, అది దైవానికి ప్రీతికరమైన సేవ అవుతుంది. పునీత జోజప్పగారు మనకు ఇచ్చే గొప్ప పాఠం ఏమిటంటే, మన చేతులతో చేసే పని, మన హృదయంతో చేసే ప్రార్థన కలిసినప్పుడే జీవితం పరిపూర్ణమవుతుంది! అందుకే, ప్రతి కార్మికుడు, ప్రతి తండ్రి తమ కష్టంలో పునీత జోజప్పగారిని ఆదర్శంగా తీసుకుంటే, వారి శ్రమకు దైవాశీస్సులు తప్పక లభిస్తాయి!

అపోహలకు సమాధానం: కొంతమంది మత్తయి సువార్తలోని 13:55 వచనాన్ని చూపిస్తూ, మరియమ్మకు ఇతర సంతానం ఉందని పొరబడుతుంటారు. కానీ, నాటి యూదా సంప్రదాయంలో బంధువులను, శిష్యులను, అనుసరించేవారిని కూడా ‘సహోదరులు’ అని పిలిచేవారు. పరిశుద్ధగ్రంధం రాసిన గ్రీకు, హీబ్రూ భాషల్లో ‘సహోదరుడు’ అనే పదానికి కేవలం ‘ఒకే తల్లిదండ్రులకు పుట్టిన వారు’ మాత్రమే అనే అర్ధం కాదు, విస్తృతమైన అర్థాలు ఉన్నాయి: ఆ కాలంలో రక్త సంబంధీకులను, దగ్గరి బంధువులను కూడా సహోదరులుగానే పిలిచేవారు. ఒకే సమాజానికి చెందిన వారిని, విశ్వాసంలో తోటివారిని ‘సహోదరులారా’ అని సంబోధించడం నాటి యూదా సంప్రదాయం! యేసుక్రీస్తును దైవకుమారుడిగా నమ్మి అనుసరించిన వారందరూ ఆయనకు సోదర సమానులే. జోజప్పగారు, మరియమ్మలు దేవుని ప్రణాళికలో అత్యంత పవిత్రమైన బాధ్యతను నెరవేర్చిన పునీతులు. వారు అత్యంత పవిత్రమైన పాత్రను పోషించారు. వారి జీవితం పూర్తిగా దేవుని మహిమ కొరకు అర్పించబడింది. పరిశుద్ధ గ్రంధం వచనాలను విడిగా కాకుండా, గ్రంథం మొత్తం చెబుతున్న సందర్భాన్ని బట్టి అర్థం చేసుకున్నప్పుడే, సత్యం బోధపడుతుంది!

నేటి తండ్రులకు సందేశం: ప్రతి భర్త, ప్రతి తండ్రి జోజప్పగారిని ఆదర్శంగా తీసుకోవాలి! కుటుంబం పట్ల ప్రేమ, బాధ్యత కలిగి ఉండాలి. కుటుంబం అంటే బాధ్యతాయుతంగా ప్రవర్తించడమేనని జోజప్పగారి జీవితం ద్వారా గ్రహించాలి. కుటుంబం పట్ల నిస్వార్థమైన ప్రేమను కలిగి ఉండటం వారి నుండే నేర్చుకోవాలి. దేవుని ఆజ్ఞను, దేవుడు అప్పగించిన బాధ్యతను నెరవేర్చడంలో ఎన్ని అవాంతరాలు ఎదురైనా.. కుటుంబాన్ని విడిచిపెట్టకుండా, తన భార్య అయిన కన్య మరియమ్మకు తోడుగా ఉంటూ, ఆమెను గౌరవిస్తూ, బాల యేసు యెడల పూర్తి బాధ్యతను వహించిన గొప్ప వ్యక్తి జోజప్పగారు!

1 తిమోతి 5:8లో “తన కుటుంబమును గూర్చి శ్రద్ధ వహింపనిచో అతడు అవిశ్వాసి కంటే చెడ్డవాడు” అని చదువుచున్నాం! జోజప్పగారు ఎక్కడా మాట్లాడినట్లు కనిపించదు, కానీ ఆయన పనులే ఆయన వ్యక్తిత్వాన్ని చాటిచెప్పాయి. మాటల కంటే చేతలతో కుటుంబాన్ని ఎలా రక్షించాలో నేర్పారు జోజప్పగారు! ఆయన నిశ్శబ్దంగా తన బాధ్యతలను నిర్వహించారు. తండ్రులు మాటలద్వారా కాకుండా, బాధ్యతాయుతమైన ప్రవర్తన ద్వారా బిడ్డలకు, భార్యకు రోల్ మోడల్స్‌గా నిలవాలి.

భార్యను గౌరవిస్తూ, కష్టసుఖాల్లో తోడుండాలి. కన్యమరియమ్మను ఎంతో గౌరవించి, కష్టకాలంలో ఆమెకు అండగా నిలిచి, దైవచిత్తాన్ని గౌరవించిన గొప్ప భర్త జోజప్పగారు! భార్య యొక్క ఆశయాలను, కష్టాలను గౌరవిస్తూ, కష్టసుఖాల్లో ఆమెకు అండగా నిలవడం ద్వారా కుటుంబంలో సమానత్వం, ప్రేమ వెల్లివిరుస్తాయి.

పిల్లలను దైవమార్గంలో, క్రమశిక్షణతో పెంచాలి. బాలయేసును తన సొంత బిడ్డలా భావించి, రక్షణ కల్పిస్తూ, క్రమశిక్షణతో పెంచి పెద్ద చేసిన ఉత్తమ సాకుడు తండ్రి జోజప్పగారు! బిడ్డలకు ఐహిక సుఖాల కంటే, దైవభయం, క్రమశిక్షణ, నైతిక విలువలు నేర్పడం ఒక తండ్రిగా ప్రధాన బాధ్యత. బిడ్డలను దేవునికి అప్పగించే బాధ్యతను తండ్రి భుజాన వేసుకోవాలి.

సమాజం నుండి వచ్చే వ్యతిరేకతను లెక్కచేయకుండా దేవుని బాటలో నడవాలి. సమాజం నుండి వచ్చే వ్యతిరేకతలను, అవాంతరాలను జోజప్పగారు ఎంతో ఓర్పుతో ఎదుర్కొన్నారు. దేవుని ఆజ్ఞను శిరసావహించి, తన కుటుంబ భద్రత కోసం ఎంతో శ్రమించారు. జీవితంలో కష్టాలు ఎదురైనప్పుడు ఫిర్యాదు చేయకుండా, దేవుని మీద భారం వేసి నిశ్శబ్దంగా పోరాటం సాగించాలి.

ప్రతి భర్త మరియు తండ్రి, జోజప్పగారి వలె ఓర్పును, నిశ్శబ్ద పోరాటాన్ని, దేవుని పట్ల అచంచలమైన విశ్వాసాన్ని కలిగి ఉండాలి. అప్పుడే ఆ కుటుంబం ‘తిరుకుటుంబం’ వలె ఆశీర్వదించబడుతుంది. జోజప్పగారిని ఆదర్శంగా తీసుకుంటే, నేటి ఆధునిక కాలంలో కూడా ప్రతి కుటుంబం నజరేతులోని తిరుకుటుంబంవలె ప్రశాంతంగా, ఆశీర్వాదకరంగా ఉంటుంది!

చివరగా, పునీత జోజప్పగారి జీవితం మనకు ఇచ్చే గొప్ప సందేశం ఒక్కటే - 'నిశ్శబ్దమైన విశ్వాసం'. ఆయన దేవునితో ఎక్కువ వాదించలేదు, కానీ దేవుడు చెప్పిన ప్రతి మాటను ఆచరణలో పెట్టారు. నేటి ప్రపంచంలో శబ్దం పెరిగిపోయింది, కానీ అంతర్గత శాంతి తగ్గిపోయింది. జోజప్పగారి వలె మనం కూడా మన కుటుంబ బాధ్యతలను, మన వృత్తిని, మన కష్టాన్ని దేవునికి అర్పణగా మలుచుకుందాం. ఆయన వలె కష్టపడి పనిచేసే గుణాన్ని, భార్యాబిడ్డల పట్ల బాధ్యతను, దేవుని పట్ల అచంచలమైన నమ్మకాన్ని మనం అలవరచుకుందాం.

మన కుటుంబాలను ‘నజరేతు తిరుకుటుంబం’ వలె మార్చుకోవాలని మనం కోరుకుందాం. పునీత జోజప్పగారు మన కుటుంబాలకు రక్షణగా, ఆశీర్వాదంగా ఉండి, మనల్ని ఎల్లప్పుడూ దేవుని మార్గంలో నడిపించాలని కోరుకుంటూ, ఈ పండుగ రోజున ఆయన కృపను మనందరం వేడుకుందాం.

ప్రార్థన: ఓ పునీత జోజప్పగారా! ఏ ఆధారం లేని వారికి అండగా నిలవండి. మరియమ్మకు, యేసుప్రభువుకు మీరు ఎలాగైతే సంరక్షకులుగా ఉన్నారో, మా కుటుంబాలకు కూడా అలాగే తోడుగా ఉండండి. మీ నీతిని, వినయాన్ని మేము కూడా అలవరచుకునేలా మా కొరకు ప్రార్థించండి. ఆమెన్!

అందరికీ పునీత జోజప్పగారి పండుగ శుభాకాంక్షలు!

 

పునీత జోజప్పగారి పండుగ: విశ్వాసానికి మరియు నిశ్శబ్దానికి ప్రతిరూపం

పూజ్య గురువులకు, పెద్దవుటపల్లి విచారణ, తుట్టగుంట గ్రామవిశ్వాసులకు మరియు పునీత జోజప్పగారి భక్తులందరికీ పండుగ శుభాకాంక్షలు! ఈ రోజు మన గ్రామంలో, మన దేవాలయ ద్వితీయ వార్షికోత్సవ వేళ పునీత జోజప్పగారి మహోత్సవాన్ని జరుపుకోవడం ఎంతో ఆనందదాయకం!

దేవుని వాక్యం (మత్తయి 1:16-24): సువార్తలో మనం చదివినట్లు, యోసేపు గారు "నీతిమంతుడు". దేవుని వాక్కు ఆయన చెవిన పడగానే, తన స్వంత ఆలోచనలను పక్కన పెట్టి, దైవచిత్తానికి తలవొగ్గిన మహనీయుడు!

1. నిశ్శబ్దమే ఆయన భాష - బాధ్యతే ఆయన సందేశం

బైబిలు గ్రంథంలో పునీత జోజప్పగారు మాట్లాడిన ఒక్క మాట కూడా మనకు వినిపించదు. కానీ ఆయన చేతలు ప్రపంచానికే పాఠాలు నేర్పాయి.

మౌనంలో దైవస్వరం: లోకం అల్లరిలో దేవుని స్వరాన్ని వినలేదు. కానీ జోజప్పగారు తన మౌనంలో దేవుని దూత మాటను విన్నారు.

ఆచరణాత్మక విశ్వాసం: "విశ్వాసం అంటే మాట్లాడటం కాదు, దేవుని కోసం నడవటం" అని ఆయన నిరూపించారు. మరియమ్మను ఆదరించడంలో, బాలయేసును హేరోదు నుండి రక్షించి ఈజిప్టుకు తీసుకువెళ్లడంలో ఆయన చూపినది అచంచలమైన ధైర్యం.

2. శ్రమయేవ జయతే: కార్మికుల పాలకుడు

తుట్టగుంట గ్రామంలో ఎంతో మంది రెక్కాడితే గాని డొక్కాడని కష్టజీవులు ఉన్నారు. మీ అందరికీ జోజప్పగారు ఒక గొప్ప తోడు.

పవిత్రమైన పని: వడ్రంగి పని చేస్తూ, చేతులు కాయలు కాసినా, ఆ కష్టాన్ని దేవుని సేవగా భావించారు.

ఆదర్శం: "ఏ పని చేసినా అది మనుష్యుల కోసం కాదు, దేవుని కోసం చేస్తున్నాం" (కొలొస్సీ 3:23) అనే వాక్యానికి జోజప్పగారు నిలువెత్తు రూపం. మన వృత్తి ఏదైనా, దానిని చిత్తశుద్ధితో చేస్తే అది ప్రార్థనతో సమానం.

3. నేటి తండ్రులకు మరియు భర్తలకు దిక్సూచి

ఈ వార్షికోత్సవ వేళ, మన కుటుంబాల్లోని పురుషులు జోజప్పగారి నుండి మూడు విషయాలు నేర్చుకోవాలి:

గౌరవం: మరియమ్మ గారికి కష్టం వచ్చినప్పుడు ఆమెను తృణీకరించక, ఆమె గౌరవాన్ని కాపాడిన ఉత్తమ భర్త ఆయన. నేటి భర్తలు తమ భార్యలను గౌరవించినప్పుడే ఆ ఇల్లు నజరేతు ఇల్లుగా మారుతుంది.

సంరక్షణ: పిల్లలకు కేవలం ఆహారం పెట్టడమే కాదు, వారిని దైవ మార్గంలో పెంచడం తండ్రి బాధ్యత. బాలయేసును ధర్మశాస్త్రం ప్రకారం పెంచిన జోజప్పగారు ప్రతి తండ్రికి రోల్ మోడల్.

నిశ్శబ్ద పోరాటం: సమస్యలు వచ్చినప్పుడు పారిపోకుండా, నిశ్శబ్దంగా బాధ్యతను మోయడం జోజప్పగారి ప్రత్యేకత.

4. అపోహల నివృత్తి - సత్యం వైపు అడుగు

చాలామంది యేసుప్రభువుకు సోదరులు ఉన్నారని వాదిస్తుంటారు. కానీ, బైబిలు పరిభాషలో 'సహోదరులు' అంటే కేవలం సొంత తమ్ముళ్లు అని కాదు, రక్తసంబంధీకులు మరియు బంధువులు అని అర్థం. కన్య మరియమ్మ నిత్య కన్యగా, జోజప్పగారు ఆమె పవిత్ర సంరక్షకునిగా దైవ ప్రణాళికను నెరవేర్చారు. వారి పవిత్రత మనకు శిరోధార్యం.

ముగింపు: ప్రియ సోదరీ సోదరులారా, ఈ రెండు సంవత్సరాల కాలంలో పునీత జోజప్పగారు మన గ్రామ దేవాలయం ద్వారా మనకు ఎన్నో ఆశీర్వాదాలు అందించారు. ఈ పండుగ కేవలం వేడుక మాత్రమే కాదు, మన జీవితాలను మార్చుకునే సమయం.

ఆయన వలె విధేయత కలిగి ఉందాం.

ఆయన వలె నీతిమంతులుగా జీవిద్దాం.

ఆయన వలె మన కుటుంబాలను దైవ మార్గంలో నడిపిద్దాం.

ప్రార్థన: ఓ పునీత జోజప్పగారా, తుట్టగుంట గ్రామ ప్రజల పైన, ఈ దేవాలయానికి వచ్చే ప్రతి భక్తుని పైన మీ చల్లని చూపు ఉంచండి. మా కష్టాల్లో తోడుగా ఉండండి. మా పిల్లలను దైవభీతిలో పెంచే జ్ఞానాన్ని మాకు ప్రసాదించండి. ఆమెన్.

పునీత జోజప్పగారి పండుగ శుభాకాంక్షలు!